ރޯދަ މަހަށް ތައްޔާރުވުމުގެ ގޮތުން ރާއްޖޭގެ އެކި ކަންކޮޅުތަކުގައިވާ މިސްކިތްތައް މަރާމާތުކޮށް ހާލަތު ރަނގަޅުކުރުމަށް، އިސްލާމިކް މިނިސްޓްރީއާއި އުރީދޫ މޯލްޑިވްސް ގުޅިގެން "އުރީދޫ މަސްޖިދުނާ" އިނީޝިއޭޓިވް ރަސްމީކޮށް ފަށައިފި އެވެ. މި ޕްރޮގްރާމް އިފްތިތާހުކޮށްފައިވަނީ މިއަދު ބޭއްވި ހާއްސަ ނޫސްވެރިންގެ ބައްދަލުވުމެއްގަ އެވެ.
މި އިނީޝިއޭޓިވްގެ ދަށުން އުރީދޫގެ އިޖުތިމާއީ ޒިންމާ (ސީއެސްއާރު) ގެ ދަށުން ކޮންމެ އަހަރަކުވެސް ރާއްޖޭގެ އެކި ސަރަހައްދުތަކުން ފަސް މިސްކިތެއް މަރާމާތުކުރުމަށް ވަނީ އަމާޒު ހިފާފަ އެވެ. އަދި އެ މަސައްކަތްތައް ކޮންމެ އަހަރެއްގެ ވެސް ރޯދަ މަހުގެ ކުރިން އެއްކޮށް ނިންމުމަށް ވަނީ ހަމަޖެހިފަ އެވެ.
އިސްލާމިކް މިނިސްޓްރީން ބުނީ މިއީ ދީނީ އިމާރާތްތަކާއި ވަސީލަތްތައް ހަރުދަނާކުރުމަށާއި، ރާއްޖޭގެ އެކި ރަށްރަށުގެ އާބާދީތަކުގެ ބޭނުންތަކަށް އެހީތެރިކަން ފޯރުކޮށްދިނުމަށް ދެ ފަރާތް ގުޅިގެން ފެށި ވަރަށް މުހިންމު މަސައްކަތެއް ކަމަށެވެ.
މީގެ އިތުރުން މިއީ ރާއްޖޭގެ އިސްލާމީ އުމްރާނީ ތަރައްގީ ކުރިއެރުވުމުގައި ސަރުކާރާއި އަމިއްލަ ކުންފުނިތަކާ ގުޅިގެން ކުރާ މަސައްކަތްތައް ހަރުދަނާކުރުމަށް މިނިސްޓްރީން ކުރަމުންދާ ދެމެހެއްޓެނިވި މަސައްކަތެއްކަން ވެސް އެ އޮފީހުން ފާހަގަކުރި އެވެ.
މި އެއްބާރުލުމުގެ މައިގަނޑު އަމާޒަކީ މިސްކިތްތައް ދެމެހެއްޓެނިވި ގޮތެއްގައި ބެލެހެއްޓުމަށް އެހީތެރިވެދީ، ރައްޔިތުންނަށް ފަސޭހަކަމާއެކު އަޅުކަން ކުރެވޭނެ އެކަށީގެންވާ މާހައުލެއް ގާއިމުކޮށްދިނުމެވެ.