މަދުން ނޫނީ ނުފެންނަ, ސިކުނޑި ހަލާކުކޮށްލާ ޖަރާސީމެއް ކަށްވާ "ނައެގްލެއިރާ ފައުލެރީ" ގެ ސަބަބުން އެމެރިކާއިން ކުޑަ ކުއްޖަކު މަރުވެއްޖެއެވެ.
ރިޕޯޓުތައް ބުނާ ގޮތުގައި އުމުރުން ހަތް އަހަރުގެ ޑޭވިޑް ޕްރުއިޓް މަރުވެފައިވަނީ ސިކުނޑި ކާލާ "ނައެގްލެރިއާ ފައުލެރީ"ގެ ސަބަބުންނެވެ. މި ޖަރާސީމަކީ އިންސާނާގެ ސިކުނޑީގެ ސެލްތަކާއި ޓިޝޫތަކަށް ގެއްލުންދީ، ސިކުނޑީގެ ސެލްތައް ހަލާކުކޮށް އަދި އެ ޖަރާސީމުގެ ތެރެއަށް ފޮރުވާލާ ނުވަތަ "ކާލާ" އިންފެކްޝަނެކެވެ.
މި ޖަރާސީމު އެކުއްޖާ އަށް ޖެހިފައިވަނީ ކެލިފޯނިއާގެ އުތުރުގެ ސަރަހައްދެއްގެ ކޯރަކުން ކަމަށް ރިޕޯތުތައް ބުނެއެވެ.
އެ ކުއްޖާ އިންފެކްޓް ވެފައިވާކަން އެގައުމުގެ ސިއްހީ އިދާރާއިން ހާމަ ކޮށްފައިވީ ނަމަވެސް، އިންފެކްޓް ވެފައިވަނީ އެގައުމުގެ ކޮން ކޯރަކުން ކަމެއް ހާމަ ކޮށްފައެއް ނުވެއެވެ. އެ އިންފެކްޝަންގެ ސަބަބުން އެކުއްޖާ މަރުވެފައިވަނީ އޭގެ ތިން ދުވަސް ފަހުންނެވެ.
ސިއްހީ ތަޖުރިބާކާރުން ބުނާ ގޮތުގައި "ނައެގްލެރިއާ ފައުލެރީ" އަކީ ވަރަށް މަދުން ނޫނީ ނުފެންނަ ބައްޔެކެވެ. 1971 ވަނަ އަހަރުން ފެށިގެން މިހާތަނަށް މި ބަލީގައި ކެލިފޯނިއާއިން މަރުވެފައިވަނީ 10 މީހެކެވެ. އަދި މި ޖަރާސީމު ނުވަތަ ޕެރެސައިޓް އާއްމުކޮށް ފެންނަނީ ރީތިފެން ހުންނަ ކޯރުތަކުން ކަމަށް ވެސް ވަނީ ބުނެފައެވެ.
އެގޮތުން ފެނުގައި ހުންނަ، މި ޖަރާސީމު ނުވަތަ ޕެރަސައިޓް، އިންސާނާގެ އަނގައިން ނުވަތަ ނޭފަތުން ހަށިގަނޑުގެ ތެރެއަށް ވާސިލްވެއްޖެނަމަ ސިކުނޑިއާއި ހަމައަށް ދަތުރުކޮށް އިތުރަށް އާލާވެ ސިކުނޑިއަށް ގެއްލުންދޭނެއެވެ.
މި ބަލި ޖެހޭމީހުންގެ 97 އިންސައްތަ މަރުވާ ކަމަށް ލަފާ ކޮށްފައިވެއެވެ. އެހެންކަމުން މިއީ ވަރަށް ނުރައްކާތެރި ޖަރާސީމެކެވެ.
މި ޖަރާސީމުގެ އަލާމާތެއް ފެންނަން ފަށަނީ އިންފެކްޓްވާތާ ފަސް ދުވަސް ފަހުންނެވެ. އެގޮތުން ހޮޑު ލެވޭ ގޮތް ވުމާއި ހުން އައުން ފަދަ އަލާމާތްތައް ހިމެނޭ ކަމަށް ރިޕޯޓުތައް ބުނެެެއެވެ.