ރުހުމުގެ ލޮލަކަށް އައިބެއް ނުފެންނާނޭ ބުނާ ބަހަކީ ދިވެހި އަދަބީ ބަސްތަކުގެ ތެރެއިން ހަރު ބަހެކެވެ. މިއީ ހަގީގަތުގައި ވަރަށްވެސް ތެދު ބުނުމެކެވެ.

މިބަހުގެ ބަހަވީ މާނައަށް ބަލައިލާނަމަ މި ބަހުން އެ ބުނެދެނީ މީހަކާ ދިމާލަށް އެހެން މީހަކު ރުހުމާއެކު ބަލާނަމަ، އެ މީހެއްގެ އެއްވެސް އުނިކަމެއް ނުވަތަ އައިބުކަމެއް އަނެކާގެ ލޮލަކަށް ނުފެންނާ ކަމުގެ ވާހަކައެވެ.

މިބަހުގެ ހަގީގީ މާނައާއި ބަހަވީ މާނަ ވަރަށް އެއްގޮތެވެ. އެގޮތުން މިބަހުގެ ބަހަވީ މާނައަކީ ތިމާ ތާއީދު ކުރާ މީހަކު ނުވަތަ ތިމާ އެމީހަކަށް ތައުރީފު ކުރާ މީހަކު ނުވަތަ ތިމާ އެމީހަކު ދެކި ލޯބިވާ މީހަކު، އެ މީހެއްގެ ދިރިއުޅުމުގައި ނުވަތަ އެމީހަކު ކުރާ ކަމެއްގައި ނުވަތަ އެމީހަކު ބުނާ ބަހެއްގައި، ގޯސް އުޅުމެއް ނުވަތަ ގޯސް ކަމެއް ނުވަތަ ގޯސް ބަހެއް ވާ ކަމުގައި ވީނަމަވެސް، ތިބާ އަށް އެއީ ގޯހެއް ކަމަށް ނުފެންނަ ވާހަކައެވެ.

މިސާލަކަށް ތިމާ ތާއީދު ކުރާ ސިޔާސީ މީހަކު އޭނާ ކުރާ ކޮންމެ ކަމެއް ތިމާ އަށް ކަމުދާނަމަ، އެއީ އޭގެ ސަބަބުން ގިނަ ބަޔަކަށް ގެއްލުންވާ އަދި ގެއްލުން ވާކަން އިނގޭ ކަމެއް ނަމަވެސް ތިމާ އެކަން އެއީ ގޯސްކަމެއް ކަމަށް ގަބޫލު ނުކުރާހާލަތުގައި ރުހުމުގެ ލޮލަކަށް އައިބެއް ނުފެންނާނޭ ބުނެއުޅެއެވެ.