ވާން އެންޑެލް ރިސާޗް އިންސްޓިޓިއުޓުން ކުރިއަށްގެންދިޔަ ކްލިނިކަލް ޓްރަޔަލްއަކުން ދައްކާގޮތުގައި، ކޮންމެ ދުވަހަކު ވިޓަމިން ސީ ބޭނުންކުރުމަކީ ލޭގެ ކެންސަރުގެ ކުރީގެ މަރުހަލާތަކުގައާއި ކެންސަރަށް ބަދަލުވުމުގެ ނުރައްކާ އޮންނަ ލޭގެ ބަލިތައް ތަހައްމަލުކުރަމުންދާ މީހުންގެ ދިރިއުޅުމުގެ ފުރުސަތު ބޮޑުކޮށްދޭކަމެކެވެ. މި ހޯދުމަކީ ކެންސަރުގެ ފަރުވާއަށް ލިބުނު އުއްމީދީ ކުރިއެރުމެކެވެ.
މި ދިރާސާގައި ބައިވެރިވި ބަލިމީހުންގެ ތެރެއިން ދުވަހުން ދުވަހަށް ވިޓަމިން ސީގެ ސަޕްލިމެންޓް ނެގި މީހުންގެ ކިބައިން ސިއްހީ ގޮތުން ދިމާވާ ނޭދެވޭ އަސަރުތައް ނުވަތަ ކޮމްޕްލިކޭޝަންތައް މަދުކަން ފާހަގަކުރެވުނެވެ. މީގެއިތުރުން، މި ބަލިމީހުންގެ ދިރިއުޅުމުގެ އުމުރު ދިގުވުމުގެ ފުރުސަތު ބޮޑުވެގެންދިޔަކަން ސައިންސްވެރިންނަށް ވަނީ ކަށަވަރުވެފައެވެ.
މިއީ އާންމުކޮށް ލިބެން ހުންނަ އާދައިގެ ވިޓަމިން ސީ ފަދަ މާއްދާއަކުން ލުކީމިއާ ނުވަތަ ލޭގެ ކޭންސަރާ ގުޅުންހުރި ނުރައްކާތަކުން ރައްކާތެރިވުމަށް އެހީތެރިވެދޭނެކަމުގެ ބޮޑު އުއްމީދެއް ގެނެސްދިން ކަމެކެވެ. ސައިންސްވެރިން ގަބޫލުކުރާ ގޮތުގައި މިއީ ހެޔޮ އަގުގައި ފަސޭހައިން ލިބެން ހުންނަ އެއްޗަކަށްވާތީ، މީގެ ސަބަބުން ގިނަ ބަޔަކަށް ފަރުވާގެ ނަފާ ފެންނާނެއެވެ.
މި ހޯދުމުގެ ސަބަބުން ކުރިއަށް އޮތް ތަނުގައި ލޭގެ ބަލިތަކަށް ދެވޭ ފަރުވާތަކަށް ބޮޑެތި ބަދަލުތަކެއް އައުން އެކަށީގެންވެއެވެ. އަދި އާންމުކޮށް ބޭނުންކުރާ ވިޓަމިން ސީ ފަދަ ސަޕްލިމެންޓްތަކުން ކޭންސަރު ފަދަ ނުރައްކާތެރި ބަލިތަކާ ދެކޮޅަށް ކުރެވޭ މަސައްކަތަށް އިތުރު ބާރެއް ލިބިގެންދާނެކަމަށް މާހިރުން އުއްމީދުކުރެއެވެ.
ހަވާލާ: ސައިންސް ޑެއިލީ 2026.