ކިރުގެ ބާވަތްތައް ބޭނުންކުރުމުން ބަނޑަށް އުނދަގޫވާ މީހުންނަށް، ކޮންމެ ފަހަރަކު ބޭސްގުޅަ ކެއުމުގެ ބަދަލުގައި ހަމުގައި ތަތްކޮށްލައިގެން ބޭނުންކުރެވޭ ހާއްސަ ޕެޗެއް ތައާރަފުކޮށް، އާންމުންގެ ބޮޑު ސަމާލުކަމެއް ހޯދައިފިއެވެ. ވެލްނެސް އުފެއްދުންތައް ތައްޔާރުކުރާ ކުންފުންޏަކުން ބާޒާރަށް ނެރުނު މި ޕެޗަކީ ކިރުގައި އެކުލެވޭ ލެކްޓޯޒް ހަޖަމުކުރުމަށް އެހީތެރިވެދޭ އެންޒައިމް އެކުލެވޭ ގޮތަށް އުފައްދާފައިވާ ޕެޗެކެވެ.
އާންމުކޮށް ލެކްޓޯޒް އިންޓޮލަރެންސް ހުންނަ މީހުން ޗީޒާއި ކިރު ނުވަތަ އައިސްކްރީމް ފަދަ ތަކެތި ކެއުމުގެ ކުރިން ބޭނުންކުރަން ޖެހެނީ ބޭސްގުޅައެވެ. ނަމަވެސް، މި އާ ޕެޗު ހަމުގައި ތަތްކޮށްލުމުން 8 ގަޑިއިރާއި 12 ގަޑިއިރާ ދެމެދުގެ ވަގުތަކަށް އޭގެ އަސަރު ދެމިހުންނަ ކަމަށް އެ ކުންފުނިން ބުންޏެވެ. މީގެ ސަބަބުން ކޮންމެ އެއްޗެއް ކެއުމުގެ ކުރިން ބޭސް ކާން ހަނދާން ބަހައްޓަން ޖެހޭ ޖެހުމަށް ނިމުމެއް އަންނާނެ ކަމަށް ބެލެވެއެވެ.
މި ޕެޗު ބޭނުންކުރާ ގޮތަށް ބަލާއިރު، ކިރު އެކުލެވޭ އެއްޗެއް ކެއުމުގެ 15 މިނެޓާއި 30 މިނެޓާ ދެމެދުގެ ވަގުތެއްގައި ހަމުގެ ސާފު ތަނެއްގައި ތަތްކޮށްލުމުން ފުދެއެވެ. ވޯޓާޕްރޫފް އަދި ވީގަން މިންގަނޑުތަކަށް ފެތޭ ގޮތަށް ތައްޔާރުކޮށްފައިވާ މި ޕެޗު ބޭނުންކުރި މީހުންގެ ތެރެއިން 85 ޕަސަންޓު މީހުންނަށް ބަނޑު ފުފުމާއި ރިއްސުން ފަދަ އުނދަގޫތަކުން ލުއި ލިބުނު ކަމަށް ތަފާސްހިސާބުތަކުން ދައްކައެވެ.
މި ޕެޗު ޓެސްޓުކުރި ބައެއް މީހުން ސޯޝަލް މީޑިއާގައި ބުނެފައިވަނީ، މިއީ އެމީހުންގެ ދިރިއުޅުމަށް އައި ވަރަށް ބޮޑު ހިތްހަމަޖެހުމެއް ކަމަށެވެ. "މި ޕެޗުގެ ސަބަބުން އެއްވެސް ޖެހިލުމެއް ނެތި، އާންމު މީހަކު ފަދައިން ޗީޒާއި ކިރުގެ ބާވަތްތައް ކެއުމުގެ ފުރުސަތު ލިބިއްޖެ،" މި އުފެއްދުން ބޭނުންކުރި މީހަކު ބުންޏެވެ.
މި އުފެއްދުމަށް އާންމުންގެ ބޮޑު ތަރުހީބެއް ލިބެމުން ދިޔަ ނަމަވެސް، ހަމުގެ ތެރެއިން އެންޒައިމް އެތެރެހައްޓަށް ގޮސް ހަޖަމުކުރުމުގެ ނިޒާމަށް މަސައްކަތްކުރާ މިންވަރާ މެދު ސިއްހީ މާހިރުން އަންނަނީ އިތުރު ދިރާސާތައް ބޭނުންވާ ކަމަށް ބުނަމުންނެވެ. އެހެންނަމަވެސް، ކިރުގެ ބާވަތްތައް ކެއުމުން އުނދަގޫވާ އެތައް ބަޔަކު މިހާރު އަންނަނީ ބޭސްގުޅަތަކާ ދުރަށް ޖެހިލައި، މި އާ ޓްރެންޑު ތަޖުރިބާކުރަމުންނެވެ.
ރެފަރެންސް: ޑެލިޝް / ބެރިއާ 2026