ބަނބުކެޔޮ ގަހަކީ ރާއްޖޭގައި އާންމުކޮށް ހެދޭ އެއްޗެއް. އަދި އެއިން ކާނާ ލިބޭ ގަހެއް. އެހެން ނަމަވެސް ދުވަހަކުވެސް ބަނބުކެޔޮ ގަހެއްގާ މަލެއް ފޮޅިފައި އިންދާ ދުށިންތަ؟ ފަހަރުގައި މަލެއް ފޮޅިފައި އިންދާ ނުފެނިދާނެ. އެހެން ނަމަވެސް މަލެއް ނެތި ތަރުކާރީއެއް ނުވަތަ މޭވާއެއް އައުމަކީ ސައިންޓިފިކް ގޮތުން ގަބޫލު ކުރެވޭ ކަމެއް ނޫން. ބަނބުކެޔޮ ތޮޅި އަކީ ބަނބުކެޔޮ މަލޭ ބުނާ މީހުން އުޅޭ. އެހެން ނަމަވެސް އަސްލު ބަނބުކެޔޮ ތޮޅިއަކީ ބަނބުކެޔޮ މަލެއް ނޫން. މީގެ ކޮންމެ ތޮޅިއެއްގައި ކުދި ކުދި އެތައް ހާހެއްހާ ތިކިތަކެއް ފެންނަން ހުރޭ. ބަނބުކެޔޮ މަލަކީ މިއީ. މިއިން ކޮންމެ ތޮޅިއެއްގައި ހުންނަ މި ކުދި ކުދި މާތައް ފަރުވާތެރިކަމާއެކު ބަލައިފި މީހަކަށް ނޫނީ ނުފެންނާނެ. އަދި މަލެއްގެ ސިފަ ވެސް އެއިން ނުޖަހަފާނެ. ބަނބުކެޔޮ ގަހުގައި ދެ ވައްތަރެއްގެ ތޮޅި އަޅާ. ފިރިހެން ތޮޅިއާއި އަންހެން ތޮޅި. ފިރިހެން ތޮޅީގައި ހުންނަ މި ދެންނެވި މާތަކުން ޕޯލެން ކޮޅެއް އަންހެން ތޮޅީގެ މަލެއްގައި ޖެހުމުން އަންހެން މާ ބަނބުކޭލަކަށްވޭ. އާންމުކޮށް ކޮންމެ ކުރިއެއްގައި ފިރިހެން ތޮޅި އަކާއި އަންހެން ތޮޅިއެއް އަޅާ. ދެ ތޮޅި ކައިރި ކައިރީގައި ނުކުތުމުން ވަޔާ ހެލޭވަގުތު ދެތޮޅި ދެތޮޅިއާ ޖެހިގެންވެސް ޕޮލިނޭޓު ވޭ. (މާ ޖެހޭ). އެހެން ކަމުން ކޮންމެހެން ސުއިންޕެއްގެ ބޭނުން ބަނބުކޭލަކަށް ބޭނުމެއް ނުވޭ. ފިރިހެން ތޮޅި ދުވަސްވުމުން އޭގައި ހުންނަ މާތައް މަރުވެ، ހިކިގެން ވެއްޓޭ. ބަނބުކޭލުގައި ހުންނަ ތިކިތަކެއް ފަދަ ނިޝާން ތަކަކީ އަންހެން ތޮޅީގައި ހުރި މާތަކުގެ ނިޝާންތައް.