އިންޑިއާގެ މަދްޔަ ޕްރަދޭޝްގައި އިމާރާތެއްގެ ތިންވަނަ ބުރީގެ ބެލްކަނީގައި ހުރެ ކުޅުޖަހަން އުޅުމުގެ ތެރޭގައި ހައި ޓެންޝަން ކަރަންޓު ލައިނެއްގައި ޖެހި 65 އަހަރުގެ ފިރިހެނަކު މަރުވެއްޖެ އެވެ. މި ހާދިސާ ހިނގާފައިވަނީ ހުކުރު ދުވަހުގެ މެންދުރުފަހުގެ ވަގުތެއްގައި މަދްޔަ ޕްރަދޭޝްގެ ވިދީޝާ ޑިސްޓްރިކްޓްގައި އޮންނަ ގަންޖްބަސޯދާގަ އެވެ.
ހާދިސާ ހިނގި ވަގުތު އެ މީހާ ހުރީ އޭނާ ދިރިއުޅޭ ގޭގެ ތިންވަނަ ބުރީގެ ބެލްކަނީގަ އެވެ. ކުޅުޖެހުމުގެ ތެރޭގައި އިމާރާތާ ވަރަށް ކައިރިން އަޅާފައިވާ 11 ކޭވީ (11,000 ވޯލްޓް) ގެ ހައި ޓެންޝަން ކަރަންޓު ލައިނެއްގައި އޭނާ ޖެހި، ވަގުތުން ކަރަންޓުގައި ޖެހުނު ކަމަށް ރިޕޯޓުތައް ބުނެ އެވެ.
މަންޒަރު ދުށް މީހުން ބުނި ގޮތުގައި އެ މީހާ ކަރަންޓުގައި ޖެހުމާއެކު ބާރު އަޑުފައްގަނޑެއް އިވިގެން ދިޔަ އެވެ. އަދި ބާރުގަދަ ކަރަންޓު ޝޮކެއް ލިބުމާ ގުޅިގެން އޭނާގެ ހަށިގަނޑު ވަނީ ވަރަށް ބޮޑަށް އަނދައިފަ އެވެ.
މި ހާދިސާއާ ގުޅިގެން ކަމާބެހޭ އޮފިޝަލުން ބުނީ މައުލޫމާތު ލިބުމާއެކު ފުލުހުން އެ ސަރަހައްދަށް ގޮސް އޭނާގެ ހަށިގަނޑު ހޮސްޕިޓަލަށް ގެންދިޔަ ކަމަށެވެ. ނަމަވެސް ހޮސްޕިޓަލަށް ގެންދިޔަ އިރުވެސް އޭނާ އޮތީ މަރުވެފައި ކަމަށް ޑޮކްޓަރުން ވަނީ ކަށަވަރުކޮށްދީފަ އެވެ.
ފުލުހުންގެ އޮފީހުން ބުނީ މި މައްސަލައިގެ މައުލޫމާތު ލިބިގެން ތަހުގީގު ފަށާފައިވާ ކަމަށާއި، އިމާރާތާ އެހާ ކައިރިން ހައި ޓެންޝަން ކަރަންޓު ލައިނެއް އަޅާފައި ހުރި މައްސަލަ ވެސް ބަލަމުން އަންނަ ކަމަށެވެ. އަދި މަރުވި މީހާގެ ހަށިގަނޑު ޕޯސްޓްމޯޓަމް ހެދުމަށްފަހު އާއިލާއާ ހަވާލުކުރުމުގެ މަސައްކަތް ކުރަމުންދާ ކަމަށްވެސް ބުންޏެވެ.