އަންހެނުންގެ މެދުގައި އާންމުކޮށް ފެންނަ ރަހިމުގެ ބައްޔެއް ކަމަށްވާ އެންޑޯމެޓްރިއޯސިސްގެ ސަބަބުން އުފެދޭ ސިސްޓްތައް ކުޑަކޮށް، އޭގެ ސަބަބުން ކުރިމަތިވާ ގަދަ ވޭނަށް ސެލެނިއަމް ސަޕްލިމެންޓުން ބޮޑު ލުޔެއް ލިބޭކަން އާ ދިރާސާއަކުން ދައްކައިފިއެވެ. މި ދިރާސާ ކުރިއަށް ގެންގޮސްފައިވަނީ އީރާނުގެ ތަބްރީޒް ޔުނިވާސިޓީ އޮފް މެޑިކަލް ސައިންސަސްގެ ރިސާޗަރުންގެ ޓީމަކުންނެވެ. އެ މީހުން މި ދިރާސާގެ ހޯދުންތައް ސައިންޓިފިކް ޖާނަލް އެއް ކަމަށްވާ "ބަޔޮލޮޖިކަލް ޓްރޭސް އެލިމެންޓް ރިސާޗް" ގައި ވަނީ ޝާއިއުކޮށްފައެވެ.
މި ކްލިނިކަލް ޓްރަޔަލްގައި އެންޑޯމެޓްރިއޯސިސް އަދި ބިސްރަވައިގައި ސިސްޓް ހުރި 66 އަންހެނުން ވަނީ ބައިވެރިކޮށްފައެވެ. މި ދިރާސާގައި ބައިވެރިވި ހުރިހާ އެންމެންނަށް ވެސް އާންމުކޮށް މި ބައްޔަށް ދޭ ހޯމޯން ފަރުވާއެއް ކަމަށްވާ ޑައިނޯޖެސްޓްގެ ދެ މިލިގްރާމް ކޮންމެ ދުވަހަކު ދިނެވެ. އަދި އޭގެ ތެރެއިން އެއް ގްރޫޕަށް ކޮންމެ ދުވަހަކު 200 މައިކްރޯގްރާމްގެ އޯގަނިކް ސެލެނިއަމް ދިންއިރު، އަނެއް ގްރޫޕަށް ދިނީ އެއްވެސް ބޭހެއް ނުހިމެނޭ ޕްލަސީބޯއެކެވެ.
ތިން މަސް ދުވަހަށް ކުރިއަށް ގެންދިޔަ މި ދިރާސާގެ ނަތީޖާއިން ދެއްކި ގޮތުގައި ސެލެނިއަމް ބޭނުންކުރި މީހުންގެ ސިސްޓުގެ ސައިޒު ވަނީ 4.82 ސެންޓިމީޓަރުން 3.78 ސެންޓިމީޓަރަށް ކުޑަވެފައެވެ. ނަމަވެސް ޕްލަސީބޯ ބޭނުންކުރި ގްރޫޕްގެ މީހުންގެ ސިސްޓުގެ ސައިޒު ވަނީ 4.07 ސެންޓިމީޓަރުން 5.31 ސެންޓިމީޓަރަށް ބޮޑުވެފައެވެ. މީގެ އިތުރުން މައްސަރު ކަންތަކުގައި ވާ ތަދާއި، ޖިންސީ ގުޅުން ހިންގުމުގައި ވާ ތަދާއި، ކުޑަކަމުދާއިރު އަދި ބޮޑުކަމުދާއިރު ވާ ތަދަށް ވެސް ސެލެނިއަމް ބޭނުންކުރި މީހުންނަށް ބޮޑު ލުޔެއް ލިބުނު ކަމަށް ދިރާސާއިން ދެއްކިއެވެ.
ދިރާސާކުރި ޓީމުން ފާހަގަކުރި ގޮތުގައި އެންޑޯމެޓްރިއޯސިސް އަކީ ހަށިގަނޑުގައި ދުޅަހެޔޮކަން ގެއްލި އިންފްލެމޭޝަން އުފެދުމާ ގުޅިފައިވާ ކަމެކެވެ. ސެލެނިއަމް އަކީ ވަރުގަދަ އެންޓިއޮކްސިޑެންޓެއް ކަމަށްވާތީ، މިއީ ހަށިގަނޑުގެ ދިފާއީ ނިޒާމު ވަރުގަދަކޮށް ދުޅަހެޔޮކަން ދަމަހައްޓަން އެހީތެރިވެދޭ މާއްދާއެކެވެ. ސެލެނިއަމް ބޭނުންކުރުމަކީ މި ބައްޔާ ދެކޮޅަށް މައިގަނޑު ފަރުވާއާ އެކު އިތުރު އެހީއެއްގެ ގޮތުގައި ބޭނުންކުރެވިދާނެ ކަމެއް ކަމަށް ރިސާޗަރުން ބުންޏެވެ.
މި ހޯދުމަކީ މި ބަލި ތަހައްމަލުކުރާ މީހުންނަށް އުންމީދީ ހޯދުމަކަށް ވިޔަސް، ސިއްހީ މާހިރުން ލަފާދެނީ ޑޮކްޓަރެއްގެ ލަފައާ ނުލައި އަމިއްލައަށް މިފަދަ ސަޕްލިމެންޓްތައް ބޭނުން ނުކުރުމަށެވެ. ސަބަބަކީ ސެލެނިއަމް މާ ގިނައިން ބޭނުންކޮށްފިނަމަ ވިހަވުމުގެ ފުރުސަތު އޮތުމާއި، މިއީ އަސްލު ބޭހުގެ ބަދަލުގައި އެކަނި ބޭނުންކުރަން އެކަށީގެންވާ ފަރުވާއަކަށް ނުވާތީއެވެ.
ރިފަރެންސް:
ތެއިހޫމަނޭޝްފަރު، އެފް.، ހާޖީޒާދޭ، ކޭ.، ނާސިރުކަންދީ، އެމް.، ޝަހްނާޒީ، އެމް.، އަދި ފަރުޝްބާފް-ޚަލީލީ، އޭ. (2025). އެފިކަސީ އޮފް އޯގަނިކް ސެލެނިއަމް ސަޕްލިމެންޓޭޝަން އޮން އެންޑޯމެޓްރިއޯމާ ރިގްރެޝަން އެންޑް ޕެއިން އިން ވިމެން ވިތު އެންޑޯމެޓްރިއޯސިސް: އަ ޓްރިޕަލް-ބްލައިންޑް ރެންޑަމައިޒްޑް ކޮންޓްރޯލްޑް ކްލިނިކަލް ޓްރަޔަލް. ބަޔޮލޮޖިކަލް ޓްރޭސް އެލިމެންޓް ރިސާޗް.