87،000 އަށްވުރެ ގިނަ މީހުން ބައިވެރިކޮށްގެން ހެދި ދިރާސާއަކުން ދައްކާގޮތުގައި، ދުވާލުގެ ވަގުތުތަކުގައި އިރުގެ އަލިކަމާއި އަލިކަން ލިބޭ މާހައުލުތަކުގައި ގިނަ ވަގުތު ހޭދަކުރުމަކީ ސިކުނޑީގެ ދުޅަހެޔޮކަމަށް ނުހަނު ބޮޑު ފައިދާތަކެއް ލިބިގެންދާ ކަމެކެވެ. މި ދިރާސާއިން ދައްކާގޮތުގައި ދުވާލު އަލިކަން ލިބޭ މިންވަރު އިތުރުވުމަކީ ޑިމެންޝާ (ހަނދާން ނެތޭ ބަލި) ޖެހުމުގެ ފުރުސަތު %16 ކުޑަކޮށްދޭ ކަމެކެވެ. އަދި އަލިކަން ލިބޭ ވަގުތު އިތުރުވީވަރަކަށް މި ބަލިން ރައްކާތެރިވުމުގެ ނިސްބަތް އިތުރަށް ބޮޑުވެގެންދާކަން ވަނީ ފާހަގަކުރެވިފައެވެ.
މި ދިރާސާގެ އެންމެ ފާހަގަކޮށްލެވޭ އެއް ކަމަކީ، ދުވާލަކު 42 މިނިޓަށްވުރެ ކުޑަ ވަގުތުކޮޅަކު އަލިކަމުގައި އުޅޭނަމަ، އެއީ އާންމުކޮށް ޑިމެންޝާ މެދުވެރިވުމަށް މެދުވެރިވާ އެހެނިހެން 6 ސަބަބަށްވުރެ ބޮޑަށް ބަލީގެ ނުރައްކާ ކުރިއާލައި އަންގައިދޭ ވަރުގަދަ ނިޝާނެއް ކަމަށް ވުމެވެ. މީގެ މާނައަކީ އަލިކަމުން މަހުރޫމުވެފައިވާ މިންވަރަކީ ސިކުނޑީގެ ދުޅަހެޔޮކަމަށް ނުރައްކާތެރި އަސަރުތަކެއް ކުރުވާ ކަމެއް ކަމެވެ.
މިފަދަ ނަތީޖާތަކުން ދޭހަވަނީ އަލިކަމަކީ ހަމައެކަނި ހަށިގަނޑަށް ބޭނުންވާ ވިޓަމިން ޑީ ލިބިދޭ ވަސީލަތެއް ނޫން ކަމާއި، އެއީ ސިކުނޑީގެ އެތެރޭގެ ގަޑި ނުވަތަ 'ސާރކޭޑިއަން ރިދަމް' ހިފެހެއްޓުމަށް ނުހަނު ބޭނުންތެރި މުހިންމު ބައެއް ކަމެވެ. އަލިކަން ލިބޭ މިންވަރު މަދުވުމުން ސިކުނޑީގެ މަސައްކަތްތަކަށް ނޭދެވޭ އަސަރުކޮށް، ހަނދާންބަލިވުމުގެ މައްސަލަތައް ކުރިމަތިވުމުގެ ފުރުސަތު ބޮޑުވެގެންދެއެވެ.
"ވިލޭ" އިންސްޓިޓިއުޓުން ޝާއިއުކޮށްފައިވާ މި ހޯދުންތަކުން ދޭހަވަނީ ދިރިއުޅުމުގެ ވައްޓަފާޅިއަށް ގެންނަ ކުދިކުދި ބަދަލުތަކުން ބޮޑެތި ފައިދާތަކެއް ލިބިދާނެ ކަމެވެ. އެގޮތުން، ކޮންމެ ދުވަހަކުވެސް އިރުގެ އަލިކަން ލިބޭ ފަދަ މާހައުލުތަކުގައި މަދުވެގެން 42 މިނިޓަށްވުރެ ގިނައިން ވަގުތު ހޭދަކުރުމަކީ، މުސްކުޅި އުމުރުގައި ޑިމެންޝާ ޖެހުމުގެ ނުރައްކަލުން ސަލާމަތްވުމަށް އެޅޭނެ ވަރަށް މުހިންމު ފިޔަވަޅެކެވެ.
ހަވާލާ: ސައިންސް ޑެއިލީ 2026.