އިޒްރޭލުގައި ދާދިފަހުން ބޭއްވި ޕާލިމަންޓު އިންތިހާބަށް ފަހު، އެއްވެސް ޕާޓީއަކަށް ނުވަތަ ކޯލިޝަނަކަށް ސަރުކާރެއް އެކުލަވާލުމަށް ބޭނުންވާ މެޖޯރިޓީ ނުލިބި ގައުމު ސިޔާސީ ބޮޑު ހުއްޓުމަކަށް ގޮސްފައިވާއިރު، އެ ގައުމުގެ އަރަބި ޕާޓީތަކުން ވަނީ ތާރީހީ ކާމިޔާބީއެއް ހޯދައި 19 ގޮނޑި ކާމިޔާބުކޮށްފައެވެ. މި ނަތީޖާއާ އެކު، ބޮޑުވަޒީރު ބެންޖަމިން ނަތަންޔާހޫގެ ވެރިކަން ނިމުމަކަށް ގެނައުމުގެ ނުވަތަ އޭނާ މަގާމުގައި ބެހެއްޓުމުގެ މައިގަނޑު ބާރު މިހާރު ވަނީ އަރަބި މެންބަރުންގެ އަތްމައްޗަށް ދޫވެފައެވެ.
ޖުމްލަ 120 ގޮނޑި ހިމެނޭ އިޒްރޭލުގެ ނެސެޓްގެ މެޖޯރިޓީ ހޯދުމަށް މަދުވެގެން 61 ގޮނޑި ބޭނުންވާއިރު، ނަތަންޔާހޫގެ ފަހަތުގައި ތިބި ކަނާތުފިޔައިގެ އަދި ދީނީ ހަރުކަށި ފެކްޝަންތަކަށް ލިބުނީ އެންމެ 53 ގޮނޑިއެވެ. އަދި އިދިކޮޅު ލީޑަރު ގާދީ އައިސެންކޮޓް އިސްވެ ހުންނަވައިގެން އުފައްދާފައިވާ މައި އިދިކޮޅު އިއްތިހާދަށް ކާމިޔާބު ކުރެވުނީ 48 ގޮނޑިއެވެ. އެހެންކަމުން މައި ދެ ފެކްޝަނުން ވެސް ސަރުކާރެއް ހެދުމަށްޓަކައި އަރަބި ޕާޓީތަކުގެ އެހީތެރިކަމަށް ބަރޯސާވާން ވަނީ މަޖުބޫރުވެފައެވެ.
މި އިންތިހާބަކީ ފަލަސްތީނުގެ ގައްޒާއަށް ނަތަންޔާހޫގެ ސަރުކާރުން ދިން ލާއިންސާނީ ހަމަލާތަކާއި ހިންގި ގަތުލުއާންމުތަކާ ގުޅިގެން އުފެދުނު ބައިނަލްއަގުވާމީ ނުތަނަވަސްކަމުގެ ތެރޭގައި ބޭއްވުނު މުހިންމު ވޯޓެކެވެ. ނަތަންޔާހޫގެ ސަރުކާރުން ހިންގި ހަނގުރާމައިގެ ޖަރީމާތަކުގެ ސަބަބުން ގައްޒާގެ ބޮޑު ބައެއް ސުންނާފަތިވެ، އެތައް ހާސް ކުށެއްނެތް އާންމުން ވަނީ ޝަހީދުކޮށްލާފައެވެ. ހޮސްޕިޓަލްތަކަށާއި، ސްކޫލްތަކަށާއި، ރެފިއުޖީ ކޭމްޕުތަކަށް އަމާޒުކޮށް ދިން ހަމަލާތަކުގެ ސަބަބުން ބައިނަލްއަގުވާމީ ކޯޓުތަކުގައި ވެސް ނަތަންޔާހޫއާ ދެކޮޅަށް ހަނގުރާމައިގެ ޖަރީމާގެ މައްސަލަތައް އޮތީ ރަޖިސްޓްރީވެފައެވެ.
ގައްޒާގެ އާންމުން ކާބޯތަކެއްޗާއި ބޭސްފަރުވާއިން މަހުރޫމުކޮށް، ބަނޑަށްޖެއްސުމުގެ ސިޔާސަތެއް ގެންގުޅުމަކީ ނަތަންޔާހޫ ސަރުކާރުން ހިންގި އެންމެ ބޮޑު އެއް ޖަރީމާގެ ގޮތުގައި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ފާހަގަކުރެއެވެ. މީގެއިތުރުން ހުޅަނގު އައްސޭރީގައި ފަލަސްތީނު ރައްޔިތުންނާ ދެކޮޅަށް އިޒްރޭލު ސިފައިންނާއި ހަރުކަށި ޔަހޫދީ ވަޒަންވެރިން ހިންގި އަނިޔާވެރި އަމަލުތައް ހުއްޓުވުމުގެ ބަދަލުގައި، ސަރުކާރުން ވަނީ އެކަމަށް ހިތްވަރުދީފައެވެ. މިފަދަ ބޮޑެތި ޖަރީމާތަކުގެ ސަބަބުން އިޒްރޭލުގެ ސިޔާސީ މަސްރަހު ވެސް އޮތީ ދުވަހަކު ވެސް ބައިބައިނުވާ މިންވަރަށް ބައިބައިވެފައެވެ.
ހަނގުރާމައިގެ ސަބަބުން ގައުމުގެ އިގްތިސާދަށް ލިބުނު ބޮޑެތި ގެއްލުންތަކާއި، ރަހީނުން ސަލާމަތްނުކުރެވި ދިގުލައިގެން ދިޔަ މައްސަލައިގައި އިޒްރޭލުގެ އާންމުންގެ ބޮޑު ނުރުހުމެއް އޮތް ނަމަވެސް، އިންތިހާބުގެ ނަތީޖާއިން ފެނިގެންދިޔައީ ސިޔާސީ ބޮޑު ބައިބައިވުމެކެވެ. އިދިކޮޅު ފަރާތްތަކުން ނަތަންޔާހޫގެ އަނިޔާވެރި ވެރިކަން ނިންމުމަށް ގޮވާލި ނަމަވެސް، ސާފު އަޣުލަބިއްޔަތެއް ހޯދުމަށް އެ ފަރާތްތައް ވަނީ ނުކުޅެދިފައެވެ. މި ހާލަތުގައި އަރަބި ޕާޓީތަކުން ހޯދި 19 ގޮނޑިއަކީ ނަތަންޔާހޫގެ ބާރުތައް ކަނޑުވާލުމަށް އޮތް ހަމައެކަނި ހިސާބީ ފުރުސަތެވެ.
އިދިކޮޅު ކޯލިޝަނުގެ 48 ގޮނޑިއާ އަރަބި ޕާޓީތަކުގެ 19 ގޮނޑި އެއްކޮށްލައިފިނަމަ ޖުމްލަ 67 ގޮނޑިއާއެކު ފަސޭހަކަމާއެކު އާ ސަރުކާރެއް އެކުލަވާލެވިދާނެއެވެ. ނަމަވެސް، ޒަޔަނިސްޓް އިދިކޮޅު ލީޑަރުންގެ މެދުގައި އޮތް ނަސްލީ އަދި ފިކުރީ ތަފާތުކުރުންތަކުގެ ސަބަބުން މިފަދަ އިއްތިހާދެއް އުފެއްދުމަށް ބޮޑެތި ހުރަސްތަކެއް ވަނީ ކުރިމަތިވެފައެވެ. ނަތަންޔާހޫއާ ދެކޮޅުވި ނަމަވެސް، އަރަބި ޕާޓީތަކާ އެކު ކޯލިޝަން ހެދުމަށް އިދިކޮޅު ލީޑަރުން ފަސްޖެހެނީ އެމީހުންގެ އަމިއްލަ ސިޔާސީ މަސްލަހަތު ގެއްލިދާނެތީއެވެ.
އިދިކޮޅު ލީޑަރު ގާދީ އައިސެންކޮޓްގެ އިތުރުން ކުރީގެ ބޮޑުވަޒީރު ނަފްތާލީ ބެނެޓް އަދި ކަނާތުފިޔައިގެ ލީޑަރު އަވިގްދޯ ލިބާމަން ފަދަ ބޭފުޅުން ވަނީ އަރަބި ޕާޓީތަކާ އެކު ރަސްމީ ސަރުކާރެއް އެކުލަވާނުލާނެ ކަމަށް ކުރިން ތަކުރާރުކޮށް ވިދާޅުވެފައެވެ. ފަލަސްތީނުގެ ހައްގުތަކަށް ވަކާލާތުކުރާ އަރަބި މެންބަރުންނާ އެކު މަސައްކަތްކުރުމަކީ ގައުމީ ސަލާމަތަށް އޮތް ނުރައްކަލެއްގެ ގޮތުގައި މި ލީޑަރުން ދެކެއެވެ. މިފަދަ ހަރުކަށި ވިސްނުންތަކުގެ ސަބަބުން، ނަތަންޔާހޫ ބަލިކުރުމަށް ލިބިފައިވާ ރަނުގެ ފުރުސަތު އިދިކޮޅަށް ގެއްލުމުގެ ބިރު ވަނީ ބޮޑުވެފައެވެ.
އަރަބި ޕާޓީތަކުން ބުނަމުންދަނީ އެމީހުންގެ ތާއީދު ސަރުކާރަކަށް ލިބޭނީ ފަލަސްތީނު ރައްޔިތުންނާ ދެކޮޅަށް ހިންގާ ހަނގުރާމައާއި ހަމަލާތައް ވަގުތުން ހުއްޓާލައި، އަރަބި ރައްޔިތުންގެ ހައްގުތައް ކަށަވަރުކޮށްދިނުމުން ކަމަށެވެ. އަދި ނަތަންޔާހޫ ހިންގި ފަދަ ލާއިންސާނީ ޖަރީމާތަކަށް ދެން އެއްވެސް ޖާގައެއް ނުދެވޭނެ ކަމަށް ވެސް އެ ޕާޓީތަކުގެ ލީޑަރުން ފާހަގަކުރެއެވެ. ނަމަވެސް، މި ޝަރުތުތަކަކީ އިޒްރޭލުގެ އިދިކޮޅު ހަރުކަށި ޔަހޫދީ ލީޑަރުންނަށް އެއްބަސްވާން ފަސޭހަ ކަންތައްތަކެއް ނޫނެވެ.
އިދިކޮޅު ފަރާތްތަކުގެ މެދުގައި އުފެދިފައިވާ މި ބައިބައިވުމުގެ ފުރިހަމަ ފައިދާ ނަގަމުންދަނީ ހުދު ނަތަންޔާހޫއެވެ. އިދިކޮޅަށް ސަރުކާރެއް ނުއުފެއްދިއްޖެ ނަމަ، އިޒްރޭލުގެ ގާނޫނު އަސާސީ ބުނާ ގޮތުން ދެން އޮންނަ އިންތިހާބަކާ ހަމައަށް ވަގުތީ ބޮޑުވަޒީރުގެ މަގާމުގައި ދެމިހުންނާނީ ނަތަންޔާހޫއެވެ. މިއީ އޭނާގެ މައްޗަށް އުފުލިފައިވާ ކޮރަޕްޝަނުގެ މައްސަލަތަކުންނާއި ހަނގުރާމައިގެ ޖަރީމާތަކުގެ ތަހުގީގުތަކުން ރެކުމަށް ލިބޭނެ އިތުރު ހިމާޔަތެކެވެ.
މި ނުރައްކާތެރި ސިޔާސީ ކާރިސާ ހައްލުކުރުމަށް ދެން އޮތް ހަފުތާތަކުގެ ތެރޭގައި އެއްވެސް ފަރާތަކަށް 61 ގޮނޑި ހަމަނުކުރެވިއްޖެ ނަމަ، އިޒްރޭލުގެ ރައްޔިތުންނަށް ޖެހޭނީ އަނެއްކާވެސް އާ އިންތިހާބަކަށް ދާށެވެ. އެހާތަނަށް ވެރިކަމުގެ ބާރުތަކުގައި ނަތަންޔާހޫ ދެމިހުންނާނެ ކަމަށް ބެލެވޭއިރު، މުޅި ސަރަހައްދުގެ ސުލްހައާއި ހަމަޖެހުން ވަނީ މި ސިޔާސީ ތާށިވުމުގެ ތެރޭގައި އިތުރަށް ނުރައްކަލަށް ހުށަހެޅިފައެވެ.