ލޯބީގެ ހަގީގީ މާނަ މިހާރު މިވަނީ މުޅިން އޮޅުވާލައިފައެވެ. ލޯބީގެ މާނައަކީ ނުވަތަ ލޯބީގެ މަސްދަރު ތަކަކީ ޖިންސީ ގުނަވަނާއި އެހެންވެސް ގުނަވަންތައް ކަމަށް މިވަނީ ދެކެވެން ފަށާފައެވެ. މިއީ ޒަމާން ގެނައި ބަދަލެއް ހެއްޔެވެ؟ ނުވަތަ މިއީ ތަހުޒީބުވުމުގެ ނަތީޖާ ހެއްޔެވެ؟

ކޮންމެއަކަސް ލޯބި ހަދަންޖެހޭނީ ވަރަށް ބޮޑަށް ތަޅުލެވި ގައިދުރު ކުރެވިފައިވާ އެއްޗަކަށެވެ. ލޯބީގެ ތަޅު ހުޅުވަން ޖެހޭނީ އެކަމަށް އޮތް، އެކަމުގެ ހާއްސަ ތަޅުދަނޑިންނެވެ. ލޯބި މާނަ ކުރަންވާނީ އޭގެ ހަގީގީ މާނައިގައެވެ. އެއްވެސް ހާލެއްގައި އެ މާނާގައި ޖިންސީ ގުނަވަނެއް ނުވަތަ ގުޅުމެއް ހިމެނިގެން ނުވާނެއެވެ. އެހެނަސް ކައިވެނި ލޯބީގެ މާނައިގެ ތެރޭގައި ހިމެނޭނެއެވެ. އެހެންކަމުން ކޮންމެ މީހަކުވެސް މިކަމަށް ވަރަށް ބޮޑަށް ސަމާލުކަން ދޭން ޖެހޭނެއެވެ.

ޒިނޭ ހުއްޓުވަން އެންމެންވެސް ބޭނުންވެއެވެ. ޚާއްސަކޮށް އެމީހެއްގެ ދަރިން ޒިނޭކުރުމުން ދުރުކުރުވަން ހުރިހާ މައިން ބަފައިންވެސް ބޭނުންވާނެއެވެ. އެހެންކަމުން ފުރަތަމަ ކަމެއްގެ ގޮތުންވެސް ކުރަން އޮތް ކަމަކީ ޙަރާމް ކަންކަން ހުއްޓުވުމަށްޓަކައި ޙަލާލް ކަންކަން ފަސޭހަކޮށްދިނުމެވެ. އެއީ ދަރިން ކައިވެންޏަށް ތައްޔާރުކޮށްދީ ކައިވެނިކުރާ އުމުރަށް އެޅުމުން އަވަހަށް ކައިވެނިކުރުމަށް ބާރުއެޅުމެވެ.

ދަރިންގެ ކައިވެނިކޮށްދޭންޖެހޭ ހިސާބަށް ކަންކަން ދިއުމުން އެކަން މައިންބަފައިންނަށް އެނގެން ޖެހޭނެއެވެ. ހިލޭ ފިރިހެނުންނާ ގުޅުން އުފައްދާކަން އެނގެން ފަށާ ހިސާބުން އަވަސްވެގަންނަންވީ ކައިވެނިކޮށްދިނުމަށެވެ. ދަރިފުޅު އެވެނި މިވެނި ހިސާބަކަށް ކިޔަވަންދެން މަޑު ނުކުރާށެވެ. ކައިވެނި ކުރިނަމަވެސް ކިޔެވިދާނެއެވެ. އާދޭހެވެ! ކިޔެވޭނެވެސްމެއެވެ.

ޒަމާނަށް އައިސްފައި މިވާ ބަދަލުތަކާއިއެކު ކިތަންމެ އިތުބާރު ކުރެވޭ ދަރިފުޅަށްވެސް ގޯސް މަގަކުން ފިޔަވަޅު ނެގިދާނެއެވެ. ލޯބީގެ ނަމުގައި ފަރަންޖީންގެ ސަގާފަތްތަކަށް ތަބާވެވިދާނެއެވެ. އެމީހުން ދައްކުވާ މަންޒަރުތަކުގައި އުޅޭހެން އުޅެން ބޭނުން ވެދާނެއެވެ. އެމީހުންގެ މަޅީގައި އަދުގެ ޒުވާނުން ޖެހުމަކީ ވަރަށްވެސް ފަސޭހަ ކަމެކެވެ. ވީއިރު ކޮންމެ މަޔަކާއި ބަފަޔަކު، ނުވަތަ ކޮންމެ ބެލެނިވެރިއަކު އެމީހެއްގެ ބެލުމުގެ ދަށުގައިވާ ކޮންމެ މީހަކީ، ހަގީގީ ލޯބިވާން އެނގޭ ބަޔަކަށް ހަދާށެވެ. ކުޅޭކުޅޭ އެއްޗެއް ފަދައިން، ޣަރީޒާތަކުގެ މޮއެ މަތިން ފުމޭ އެއްޗަކަށް ލޯބި ހެދިޔަ ނުދޭށެވެ. ލޯބީގެ ހައިބަތު އެއަށްވުރެ ބޮޑުކަމާއި ލޯބީގެ މާނަ، ކަނޑަށްވުރެ ފުންކަން އިހުސާސްކޮށްދޭށެވެ.

ހަގީގީ ލޯބީގެ މާނަައިގެ ތެރޭގައި އަޅާލުމާ އޯގާތެރިކަމާއި، ވަފާތެރިކަމާއި އަބުރުވެރިކަމާއި، އަދުލުވެރިކަމާއި، އިތުބާރާ ކުލުނާ އަދި މިނޫންވެސް މިފަދަ މާތް ކިތަންމެ ސިފައެއް ވާނޭކަން ހަމަޔަގީނެވެ.