ގިނަ މީހުންނަށް ޤަބޫލުކުރެވިފައި އޮންނަނީ ހިތަށް ޖެހޭ ހަމަލާތަކުން ސަލާމަތްވުމަށްޓަކައި ހަށިގަނޑުގައި ހުންނަ ނުބައި ކޮލެސްޓރޯލް ނުވަތަ ލައިޕޯޕްރޮޓީންގެ މިންވަރު ދަށްކޮށްލުމަކީ ފުދޭވަރެއް ކަމަށެވެ. އެހެންނަމަވެސް، ކޮލެސްޓރޯލްގެ މިންވަރު އެންމެ ރަނގަޅު މިންގަނޑުގައި ހުރި ނަމަވެސް، ބައެއް މީހުންނަށް ހިތުގެ ހަމަލާތައް ކުރިމަތިވާކަން ދާދިފަހުން ކުރެވުނު ދިރާސާތަކުން ވަނީ ހާމަވެފައެވެ. ސައިންސްވެރިން ވިދާޅުވާގޮތުގައި މިއީ ހަމައެކަނި ކޮލެސްޓރޯލް މައްޗަށް ދިއުމުގެ ސަބަބުން ދިމާވާ ކަމަކަށް ނުވުމުން، މިއާ މެދު އިތުރަށް ސަމާލުވާންޖެހެއެވެ.
ޗަލްމާރސް ޔުނިވަސިޓީ އޮފް ޓެކްނޮލޮޖީގެ ދިރާސާއަކުން ހޯދާފައިވާގޮތުގައި، މީގެ އަސްލަކީ ކޮލެސްޓރޯލް ނޫން އެހެން ސަބަބުތަކެކެވެ. އެގޮތުން، ހަށިގަނޑުގައި ހިނގާ އިންފްލެމޭޝަންތަކާއި ލޭހޮޅިތަކަށް ލިބޭ ގެއްލުންތަކާ ގުޅުންހުރި ވަކިކަހަލަ ފެޓް އުފުލާ ދެވައްތަރެއްގެ ޒައްރާތަކެއް ވަނީ ފާހަގަކުރެވިފައެވެ. މި ޒައްރާތަކުގެ ސަބަބުން ކޮލެސްޓރޯލްގެ މިންވަރު ދަށްކޮށް ހުރެއްޖެނަމަވެސް، ލޭހޮޅިތަކަށް ނުރައްކާތެރި އަސަރުތަކެއް ކޮށްފާނެއެވެ.
މި ހޯދުންތަކުން ދައްކައިދެނީ ހިތުގެ ބަލިތަކުން ރައްކާތެރިވުމަށް ހަމައެކަނި ކޮލެސްޓރޯލް ކޮންޓްރޯލްކުރުމަށްވުރެ މާ ފުޅާ ދާއިރާއެއްގައި ވިސްނަންޖެހިފައިވާ ކަމެވެ. ލޭހޮޅިތައް ދުޅަވުމަށް މެދުވެރިވާ ސަބަބުތަކާއި އެހެނިހެން ބައޯމާކަރުތައް ދެނެގަނެވިއްޖެނަމަ، ބަލި މީހުންނަށް ފަރުވާދިނުމުގައި މުޅިން އާ ހަރުފަތަކަށް ވާސިލުވެވޭނެއެވެ.
މިކަމުގެ ސަބަބުން މުސްތަޤުބަލުގައި ހިތުގެ ބަލިތައް ދެނެގަތުމަށާއި ޕްރިވެންޓިވް މެޑިސިންގެ ދާއިރާއިން އާ އުކުޅުތަކެއް އުފެއްދުމަށް ބޮޑު އެހީތެރިކަމެއް ލިބިގެންދާނެއެވެ. އަދި ހިތުގެ ހަމަލާތަކުން ސަލާމަތްވުމަށް ދެވޭ ފަރުވާތައް އިތުރަށް ފުރިހަމަކޮށް، ބަލީގެ ނުރައްކާ ކުޑަކުރުމަށް އާ މަގުތަކެއް ހުޅުވިގެންދާނެ ކަމަށް ސައިންސްވެރިން ލަފާކުރައްވައެވެ.
ހަވާލާ: ސައިންސް ޑެއިލީ 2026.