ދިރިއުޅުމުގައި ކުރިމަތިވާ ދަތިތަކާއި އިމްތިހާނުތަކަކީ މާތް ﷲ ގެ ލޯބި އެ އަޅަކަށް ލިބޭ ކަމުގެ އަލާމާތެއް ކަމަށާއި، އެފަދަ ވަގުތުތަކުގައި އުންމީދު ކަނޑާނުލައި ކުރިއަށް ދިއުމަށް މަޝްހޫރު ދީނީ އިލްމުވެރިޔާ މުފްތީ އިސްމާއިލް މެންކް ނަސޭހަތްތެރިވެވަޑައިގެންފިއެވެ.

އޮސްޓްރޭލިއާގެ ބްރިސްބޭންގައި ދެއްވި ދަރުސެއްގައި ވާހަކަފުޅު ދައްކަވަމުން އޭނާ ވިދާޅުވީ، ދުނިޔެމަތީގައި އިންސާނާ ލައްވާފައިވަނީ އިމްތިހާނު ކުރެއްވުމަށް ކަމަށާއި، ކިތަންމެ ބޮޑު ހިތާމައެއް ނުވަތަ ދަތިކަމެއް ކުރިމަތިވި ނަމަވެސް އެއީ ދާއިމީ ކަމެއް ނޫން ކަމަށެވެ. ރޭގަނޑުގެ އެންމެ އަނދިރި ވަގުތަށް ފަހު ފަތިހުގެ އަލިކަން ފާޅުވާ ފަދައިން، ދިރިއުޅުމުގެ އެންމެ އުނދަގޫ ދުވަސްތަކަށް ފަހު އުފާވެރިކަމާއި ފަސޭހަކަން ލިބޭނެ ކަމުގެ ޔަގީންކަން އޮންނަން ޖެހޭ ކަމަށް އޭނާ ވިދާޅުވިއެވެ.

މުފްތީ މެންކް އިތުރަށް ވިދާޅުވީ މާތް ﷲ އަޅަކު ދެކެ ލޯބިވެވޮޑިގެންފި ނަމަ، އެ އަޅަކާ އެކަލާނގެއާ އިތުރަށް ކުއްތަން ކުރެއްވުމަށްޓަކައި ތަފާތު އިމްތިހާނުތައް ކުރިމަތި ކުރައްވާ ކަމަށެވެ. އެގޮތުން ކީރިތި ރަސޫލާ ﷺ ގެ ހަޔާތްޕުޅުން މިސާލު ނަންގަވަމުން އޭނާ ފާހަގަކުރެއްވީ، އެކަލޭގެފާނަކީ އެންމެ މާތް އަދި ﷲ ގެ ހަޒުރަތުގައި އެންމެ ލޮބުވެތި އިންސާނާ ކަމުގައި ވީނަމަވެސް، އެކަލޭގެފާނުގެ ދަރިދަރިކަލުން އަވަހާރަވުމާއި މީސްތަކުންގެ ފަރާތުން ކުރިމަތިވި ފުރައްސާރައާއި ބޮޑެތި ދަތިތައް ތަހައްމަލު ކުރެއްވި ކަމަށެވެ. އެހެންކަމުން، ދަތި އުނދަގޫ ހާލަތްތަކާއި މީހުން ދައްކާ ނޭދެވޭ ވާހަކަތަކަކީ މާތް ﷲ ގެ ލޯބިވޮޑިގަތުން ލިބޭ ކަމުގެ ހެއްކެއްގެ ގޮތުގައި ދެކި، ކެތްތެރިކަމާ އެކު އެކަލާނގެ ހަޒުރަތުން ވާގި އެދުމަށް އޭނާ ގޮވާލެއްވިއެވެ.

އިންސާނުންނަށް ދިމާވާ މައްސަލަތަކަކީ ވަކި އަދަދަކަށް ގުނާލެވޭހާ މަދު ކަންތައްތަކެއް ނަމަވެސް، މާތް ﷲ ދެއްވާފައިވާ ނިއުމަތްތަކަކީ ގުނައި އަދަދު ނުކުރެވޭހާ ގިނަ ކަންތައްތަކެއް ކަން މުފްތީ މެންކް ހަނދާންކޮށްދެއްވިއެވެ. އޭނާ ވިދާޅުވި ގޮތުގައި އިންސާނާގެ ބަލިކަށިކަމުން، ދިރިއުޅުމުގައި ދިމާވާ މަދު ދަތިކަމަކަށް ވިސްނައި މާޔޫސްވާ އިރު، އެކަލާނގެ ދެއްވާފައިވާ ގުނާ ނުލެވޭހާ ގިނަ ނިއުމަތްތަކުގެ މަތިން ހަނދާން ނައްތާލައެވެ. އަދި އެއްވެސް ނަފްސަކަށް އެ ނަފްސަކަށް ނުއުފުލޭ ވަރުގެ ބުރައެއް މާތް ﷲ ނުޖައްސަވާނެ ކަމަށާއި، ކޮންމެ އިމްތިހާނަކީ ވެސް އިންސާނާ އިތުރަށް ވަރުގަދަކޮށްދީ، ކުރިއަށް ވުރެ ރަނގަޅު މީހަކަށް ހެދުމަށް މެދުވެރި ކުރައްވާ ކަމެއް ކަމަށް ވިދާޅުވިއެވެ.

"ތިބާއަކީ ބޭކާރު މީހެއް ކަމަށް އެއްވެސް މީހަކު ބުނާ ބުނުމަށް ހިތްވަރު އެލުވާނުލާ. ﷲ ގެ ރަހުމަތުން މާޔޫސްވުމަށް އެއްވެސް މީހަކަށް ފުރުސަތު ނުދީ. މާޒީގައި ކޮންމެ ފަދަ ކަމެއް ކުރެވިފައި އޮތް ނަމަވެސް، އެއީ މާޒީ. ތައުބާވެ ﷲ ގެ ހަޒުރަތުން ފާފަ ފުއްސެވުމަށް އެދިއްޖެ ނަމަ އެ ހުރިހާ ކަމެއް ފޮހެވިގެންދާނެ،" މުފްތީ މެންކް ވިދާޅުވިއެވެ.

މީގެ އިތުރުން، އެހެން މީހުންނަށް ދިމާވާ ދަތިތަކާއި ބަލިކަށިކަންތައްތަކާ މެދު މަލާމާތްކޮށް ފާޑުކިޔުމުގެ ބަދަލުގައި، އެ މީހުންނަށް ހެޔޮ ދުއާކޮށްދީ އެހީތެރިވުމަށް ވެސް އޭނާ ނަސޭހަތްތެރިވެވަޑައިގެންނެވިއެވެ. އަދި އެހެން މީހުންނަށް އެހީތެރިވުމުގައި ދެމިހުންނަ އަޅަކަށް މާތް ﷲ ގެ އެހީތެރިކަން އަބަދުވެސް ލިބިގެންދާނެ ކަމަށް ވިދާޅުވެ، ކޮންމެ ދުވަހަކީ ވެސް ކުރީ ދުވަހަށް ވުރެ ހެޔޮ ގޮތުގައި ހޭދަކުރެވޭ ދުވަހަކަށް ހެދުމަށް މުފްތީ މެންކް ވަނީ އިލްތިމާސް ކުރައްވާފައެވެ.

ރެފަރެންސް:

މުފްތީ މެންކުގެ ދަރުހަކުން