ރާއްޖޭގެ ޓޫރިޒަމް ސިނާއަތުގެ ތާރީހުގައި ފަވާލެވޭ ބަރޮސް މޯލްޑިވްސްއަށް 53 އަހަރު ފުރުން ފާހަގަކުރުމަށް ތައްޔާރުވަމުންދާއިރު، މިއީ 1973 ވަނަ އަހަރުގެ ޑިސެމްބަރު މަހު ފެށި ތާރީހީ ދަތުރެއްގެ އުފާވެރި މުނާސަބަތެކެވެ.
މީގެ ބައި ގަރުނަށްވުރެ ކުރިން، 1970 ގެ އަހަރުތަކުގެ ކުރީކޮޅު ދިވެހިރާއްޖެއަކީ ބައިނަލްއަގުވާމީ ދުނިޔެއަށް އެހާ ބޮޑަށް އެނގިފައިވާ މަންޒިލެއް ނޫނެވެ. އޭރު ރާއްޖޭގެ އިގްތިސާދު މައިގަނޑު ގޮތެއްގައި ބިނާވެފައި އޮތީ މަސްވެރިކަމާއި ދަނޑުވެރިކަމުގެ މައްޗަށެވެ. ވައިގެ ދަތުރުފަތުރުގެ ހަރުދަނާ ނިޒާމެއް ނެތްއިރު، އދ. ގެ ތަރައްގީގެ ޕްރޮގްރާމް ފަދަ ބައިނަލްއަގުވާމީ އިދާރާތަކުން އޭރު ދެކެމުން އައީ ރާއްޖެއަކީ ޓޫރިޒަމް ތަރައްގީކުރުމަށް އެކަށީގެންވާ ވަސީލަތްތައް ހުރި ގައުމެއް ނޫން ކަމަށެވެ. ނަމަވެސް 1971 ވަނަ އަހަރު އިޓަލީގެ ޓްރެވަލް އޭޖެންޓެއް ކަމަށްވާ ޖޯޖް ކޯބިން ރާއްޖެއަށް ކުރި ދަތުރަކީ މި ހުރިހާ ވިސްނުމެއް ބަދަލުކޮށްލި ތާރީހީ ނުކުތާއެވެ.

ޖޯޖް ކޯބިންއާއެކު ދިވެހި ވިޔަފާރިވެރިން ކަމަށްވާ އަހުމަދު ނަސީމާއި، މުހައްމަދު އުމަރު މަނިކު އަދި ހުސެއިން އަފީފް ގުޅިގެން ކުރެއްވި ބުރަ މަސައްކަތުން، 1972 ވަނަ އަހަރުގެ އޮކްޓޫބަރު މަހުގެ 3 ވަނަ ދުވަހު ރާއްޖޭގެ އެންމެ ފުރަތަމަ ރިސޯޓް، ކުރުނބާ ވިލެޖް ހުޅުވުނެވެ. އެއީ އަކިރިއާއި ފަނުން ހަދާފައިވާ 30 ކޮޓަރީގެ އާދައިގެ ރިސޯޓެކެވެ. ކުރުނބާ ހުޅުވުމާއެކު ލިބުނު ބޮޑު ކާމިޔާބީއަކީ ދިވެހި ޒުވާން ވިޔަފާރިވެރިންނަށް ލިބުނު ވަރަށް ބޮޑު ހިތްވަރެކެވެ. އޭގެ ފަހުން ބަނޑޮސް އައިލެންޑް ރިސޯޓް ހުޅުވުނުއިރު، ދިވެހި ޓޫރިޒަމްގެ ތާރީހުގައި ތިންވަނައަށް ހުޅުވުނު ރިސޯޓަކީ ބަރޮސް މޯލްޑިވްސްއެވެ.
1973 ވަނަ އަހަރުގެ ޑިސެމްބަރު މަހު ބަރޮސް ހުޅުވުނުއިރު އެ ރަށަކީ ދަނޑުވެރިކަމާއި ރުއްގަހުގެ މަސައްކަތް ކުރަމުން އައި ފަޅުރަށެކެވެ. ސައްތައިން ސައްތަ ދިވެހި ކުންފުންޏެއް ކަމަށްވާ ޔުނިވާސަލް އެންޓަޕްރައިސަސްއިން ބަރޮސް ތަރައްގީކުރީ އެ ރަށުގެ ގުދުރަތީ ރީތިކަމަށް އެއްވެސް ގެއްލުމެއް ނުލިބޭނެ ފަދަ ގޮތަކަށެވެ. އޭރު ބަރޮސްގައި ހުރީ ދޮންވެލި ތަޅުންގަނޑަކާއެކު ރުކުފަނުން ހިޔާކޮށްފައިވާ އެންމެ 28 ކޮޓަރިއެވެ. ޒަމާނީ ކަރަންޓާއި ފިނިކުރި ކޮޓަރިތަކުގެ ބަދަލުގައި، އޭރު ބަރޮސްއަށް އައި ޔޫރަޕްގެ ޓޫރިސްޓުން ބޭނުންވީ ގުދުރަތީ މާހައުލުގައި އަމިއްލަ މިނިވަންކަމާއެކު ވަގުތު ހޭދަކޮށްލާށެވެ.
އެ ދުވަސްވަރު ބަރޮސްއަށް އައި މެހުމާނުންނާއި ރިސޯޓުގެ ދިވެހި މުވައްޒަފުންނާ ދެމެދު އޮތީ ވަރަށް ގާތް އާއިލީ ގުޅުމެކެވެ. އިރުއޮއްސުމުން އަތިރިމަތީގައި އަލިފާންގަނޑެއް ރޯކޮށްގެން ދިވެހި މުވައްޒަފުންނާއެކު މަސް ފިހުމާއި، ތަރިތަކުގެ ދަށުގައި ވަގުތު ހޭދަކުރުމަކީ އޭރުގެ ޓޫރިސްޓުން އެންމެ ގަޔާވި ކަންތައްތަކެވެ. އޭރު ރިސޯޓް ހުޅުވާފައި ހުންނަނީ ހަމައެކަނި ޔޫރަޕްގެ ފިނި މޫސުމުގެ މަސްތަކުގައެވެ. ރަށުގެ ގުދުރަތީ ރުއްގަސްތަކަށް ބަދަލެއް ނުގެނެސް، ވެލިގަނޑު ހިއްކުމެއް ނެތި ތަރައްގީކުރި ބަރޮސް ވެގެންދިޔައީ ދެމެހެއްޓެނިވި ޓޫރިޒަމްގެ އެންމެ ފުރަތަމަ ނަމޫނާއަށެވެ.

1980 ގެ އަހަރުތަކަށް އެޅުމާއެކު ބަރޮސްއަށް ޒިޔާރަތްކުރާ ޓޫރިސްޓުންގެ އަދަދު އިތުރުވެ، ރިސޯޓުގެ ހިދުމަތްތައް ފުޅާކުރަން ފެށިއެވެ. މިގޮތުން 1984 ވަނަ އަހަރު ބަރޮސް ވެގެންދިޔައީ ރާއްޖޭގެ ރިސޯޓެއްގައި އެންމެ ފުރަތަމަ ފެން އުފައްދާ ޕްލާންޓެއް ބެހެއްޓި ރިސޯޓަށެވެ. މިއީ އޭރުގެ ލޮނުފެނުން ފެންވެރުމުގެ އާދަކާދަ ބަދަލުކޮށްލި ތާރީހީ ކުރިއެރުމެކެވެ. އަދި 1985 ވަނަ އަހަރު ހިރިގަލާއި އުވައިން ރާނާފައިވާ ކޮޓަރިތައް އިތުރުކޮށް، ރިސޯޓުގެ ކޮޓަރީގެ އަދަދު 40 އަށް އިތުރުކުރެވުނެވެ.
1990 ގެ އަހަރުތަކަކީ ރާއްޖޭގެ ޓޫރިޒަމް މަތީ ފަންތީގެ ލަގްޒަރީ މަންޒިލަކަށް ބަދަލުވާން ފެށި ދުވަސްވަރެވެ. މި ބަދަލާއެކު 1990 އަދި 1992 ވަނަ އަހަރު ބަރޮސްގެ ފަޅުތެރޭގައި މޫދު ކޮޓަރިތައް ބިނާކުރެވުނެވެ. މިއީ ރާއްޖޭގައި މޫދު ކޮޓަރި ތައާރަފުކުރި އެންމެ ފުރަތަމަ ރިސޯޓްތަކުގެ ތެރޭގައި ބަރޮސް ހިމެނިގެންދިޔަ ކަމެކެވެ. 1996 ވަނަ އަހަރު އޭރު ހުރި އާދައިގެ ކޮޓަރިތައް ތަޅާލުމަށްފަހު، ދިވެހި ވަޑާމުގެ ހުނަރު ފެންނާނެހެން ލަކުޑިއާއި ފަނުން ޒަމާނީ ވިލާތައް ބިނާކޮށް، ބަރޮސްގެ ފެންވަރު އިތުރަށް މަތިކުރެވުނެވެ.
2004 ވަނަ އަހަރުގެ ސުނާމީ ކާރިސާގައި ރާއްޖޭގެ ގިނަ ރަށްތަކަކަށް ބޮޑެތި ގެއްލުންތަކެއް ލިބުނު ނަމަވެސް، ބަރޮސްގެ ގުދުރަތީ ފަރުތަކާއި ގަސްގަހާގެހީގެ ސަބަބުން އެ ރަށަށް މާބޮޑު ގެއްލުމެއް ނުލިބި ސަލާމަތްވިއެވެ. އޭގެ އެއް އަހަރު ފަހުން، 2005 ވަނަ އަހަރު ދިވެހި އާކިޓެކްޓް މުހައްމަދު ޝަފީގު (ސައްޕޭ) ގެ ފަރުމާއާއެކު ބަރޮސް އެއްކޮށް އާބާތުރަފިލުވައި، ދިވެހިވަންތަ ލަގްޒަރީ ރިސޯޓަކަށް ބަދަލުކޮށްލިއެވެ. ދިވެހި ދޯންޏެއްގެ ރިޔާ ސިފަވާގޮތަށް ފަރުމާކޮށްފައިވާ ލައިޓްހައުސް ރެސްޓޯރަންޓަކީ މި ބަދަލުގެ އެންމެ ފާހަގަކޮށްލެވޭ އެއް ރަމްޒެވެ.
އެންމެ 75 ވިލާއާއެކު ހިންގަމުން އަންނަ ބަރޮސްއަކީ މިއަދުވެސް ދިވެހިންގެ އަމިއްލަ މިލްކުވެރިކަމުގެ ދަށުގައި އޮތް މަދު ރިސޯޓްތަކުގެ ތެރެއިން އެއް ރިސޯޓެވެ. ތިމާވެށި ހިމާޔަތްކުރުމަށް 2006 ވަނަ އަހަރުން ފެށިގެން މުރަކަ އިންދުމުގެ ހާއްސަ މަޝްރޫއުތައް ހިންގަމުން އަންނައިރު، 2026 ވަނަ އަހަރުގެ ޓްރެވަލް އެންޑް ލެޝާ އެވޯޑްސްގައި ދުނިޔޭގެ ދެވަނައަށް އެންމެ މޮޅު ރިސޯޓުގެ މަގާމާއި އޭޝިއާގެ އެއްވަނަ ރިސޯޓުގެ މަގާމު ބަރޮސްއިން ވަނީ ހޯދާފައެވެ. މިއީ 1973 ގައި ފެށި ކުޑަކުޑަ މަސައްކަތް ދުނިޔޭގެ ފެންވަރުގައި ބަލައިގެންފައިވާ ކަމުގެ އަލިގަދަ ހެއްކެކެވެ.

އަންނަ ޑިސެމްބަރު މަހުގެ 3 ވަނަ ދުވަހު ބަރޮސްގެ 53 ވަނަ އަހަރީ ދުވަސް ފާހަގަކުރާއިރު، މި ހާއްސަ ހަފްލާގައި ދިވެހި މަޝްހޫރު އާޓިސްޓް އަލީ އިޝާން (ރައްޕެ) ގެ އާ 12 އުފެއްދުމެއް ދައްކާލުމަށް ވަނީ ހަމަޖެހިފައެވެ. ވިދިވިދިގެން ދެވަނަ އަހަރަށް ބަރޮސްއާ ގުޅިގެން ރައްޕެ ތައްޔާރުކުރި މި އާޓް އެގްޒިބިޝަނުގައި ދިވެހި ސަގާފަތާއި އާދަކާދަ ދައްކުވައިދޭ ކުރެހުންތަކާއި އަތްތެރި މަސައްކަތްތައް ހިމެނެއެވެ. މި މުނާސަބަތަކީ ހަމައެކަނި ރިސޯޓެއްގެ އަހަރީ ދުވަހެއް ނޫނެވެ؛ މިއީ ދިވެހި ޓޫރިޒަމްގެ ބިންގާ އެޅުނު ގޮތާއި، ދިވެހިންގެ އަމިއްލަ މަސައްކަތުން މި ސިނާއަތް ދުނިޔޭގެ އެންމެ އުހަށް ގެންދިޔަ ގޮތުގެ ތާރީހު އަލުން އާކޮށްދޭ މުހިންމު ފުރުސަތެކެވެ.
53 އަހަރު ފަހުން ބަރޮސްގެ އަހަރީ ދުވަސް ދިވެހި ފަންނުވެރިޔާ ރައްޕެގެ އާޓް އެގްޒިބިޝަނަކާއެކު ފާހަގަކުރާއިރު، މިއީ މާޒީއާއި މުސްތަގުބަލު ގުޅުވާލަދޭ ފުރިހަމަ ބޮޅެކެވެ. އޭރު އެ ރިސޯޓަށް އައި ޒުވާން ޓޫރިސްޓުން މިއަދު އެމީހުންގެ ދަރިންނާއި ކާފަދަރިންނާއެކު އެނބުރި ބަރޮސްއަށް އަންނަނީ އެ ރަށުން ލިބޭ ހިތްހެޔޮ މެހުމާންދާރީގެ ސަބަބުންނެވެ. ދިވެހި ޓޫރިޒަމްގެ 54 އަހަރުގެ ދިގު ތާރީހުގައި، ބަރޮސް މޯލްޑިވްސް އަބަދުވެސް ދެމިއޮންނާނީ ދިވެހިންގެ ހުނަރާއި، ސަގާފަތް އަދި ދެމެހެއްޓެނިވި ތަރައްގީގެ އެންމެ އުޖާލާ މިސާލުގެ ގޮތުގައެވެ.
