ދުނިޔޭގައި އިންސާނާ އުޅެމުންދާއިރު، އިންސާނާއަށް ދުޅަހެޔޮ ނަފްސެއް ބޭނުން ވެއެވެ. މިއީ ދިރިއުޅުން ފަސޭހަކޮށްދީ ނަފްސަށް ލުއިކަން އިހުސާސް ކުރުވާނޭކަމެކެވެ. ނަފްސުގެ ހަމަ ޖެހުމަކީ އެ އިންސާނާ ކުރާ ކޮންމެ ކަމެއް ކާމިޔާބު ވުމާއި ސީދާ ގުޅިފައިވާ ކަމެކެވެ. އެހެން ކަމުން ނަފްސަށް ހަމަޖެހުން ހޯދުމަކީ ކޮންމެހެން ވެސް ކުރަން ޖެހޭނޭ ކަމެކެވެ.

ހަލަބޮލި މި ދުނިޔޭގައި އިންސާނާ ކުރާ މަސައްކަތްތައް ކިތަންމެހާވެސް ގިނައެވެ. އަދި ކުރަން ވިސްނާފައި ހުންނަ ކަންތައްވެސް ކިތަންމެ ގިނައެވެ. މިއާއިއެކު ނުކުރެވި ހުންނަ ކަންތައްތައްވެސް އެހާމެ ގިނައެވެ. އަަދޭހެވެ! މިއީ އިންސާނާ އެކަންކަމާއި އޭނާގެ މުޅި ދުވަސް ހޭދަކުރާ ކަންކަމެވެ. މިއީ އިންސާނާ ދުނިޔޭގައި އުޅުމަށް ކުރަން ޖެހޭ ހަރަދުތައް ކުރުމަށް،ފައިސާ ހޯދުމަށް ކުރާ މަސައްކަތްތަކެވެ. ނަމަވެސް ހަނދާނުގައި ބަހައްޓަންވީ ކަމަކީ އެހެން ކަންކަމަށް ކިތަންމެ ގިނަ ވަގުތެއް މަސައްކަތުގައި ހޭދަކުރިނަމަވެސް، އަމިއްލަ ނަފްސަށްވެސް ވަގުތު ހޭދަކުރަން ޖެހޭނެއެވެ. ނަފްސުގެ ހަމަ ޖެހުމާއި ނަފްސަށް ތަސައްލީ ހޯދުމަށް ވަގުތުކޮޅެއް ހޭދަ ކުރަންޖެހޭނެއެވެ. ތިމާ ކުރާ އެހެން މަސައްކަތްތަކުގެ ފެންވަރު ރަނގަޅުވާނީވެސް އޭރުންނެވެ.

ނަފްސުގެ ހަމަޖެހުމަކީ އޭގެ ސަބަބުން އިންސާނާގެ ސިކުނޑީގެ ބުރަކަން ލުއިކޮށްދޭނޭ ކަމެކެވެ. މިކަމަށް މަގުފަހިކޮށްދެނީ އެންޑްރޮފިންސް ނަމަކަށް ކިޔާ ހޯމޯނެކެވެ. ނަފްސަށް ލިބޭ ކޮންމެ ހަމަޖެހުމަކާއި އެކު މި ހޯމޯނު ސިކުނޑިން އުފައްދައެވެ. އަދި ލޭގެ ތެރެއިން މުޅި ހަށިގަނޑަށް ފޮނުވައިދެއެވެ. މިއީ ގުނަވަންތަކަށް ލުއިކަން ފޯރުކޮށްދީ، ހިތައް ހަމަޖެހުން ގެނެސްދީ މޫނުމަތިން ހިނިތުންވުން ވެރިކޮށްދިނުމަށް އެހީތެރިވެދޭ ހޯމޯނެކެވެ. އެހެން ކަމުން ހިނިތުންވެ ހުރުމަށް ނަފްސުގެ ހަމަޖެހުން ވަތަށްވެސް މުހިންމެވެ.

މި ހަލަބޮލި ދުނިޔޭގައި، ގުދުރަތީ މާހައުލެއްގައި ސާފު ވައިން ނޭވައިލުމަކީ ނަފްސަށް ހަމަޖެހުން ގެނުވާނޭ ކަމެކެވެ. އުޑާއި ކަނޑު ފެނުމަކީ ހިތް އުފާ ކޮށްދޭނޭ ކަމެކެވެ. ގުދުރަތީ ދިރުން ތަކާއި ދޯޅަވުމަކީ ސިކުނޑި ތާޒާކޮށްދޭނޭ ކަމެކެވެ. މޫދަށް އެރިލުމަކީ ނަފްސަށް ފިނިކަން ގެނުވާނޭ ކަމެކެވެ. އާއިލާ އާއި އެކު ވަގުތު ހޭދަކުރުމަކީ ނަފްސު ދުކި ވާ ލޯބި އިތުރުކޮށްދޭނޭ ކަމެކެވެ.

ކަަންކަން ތަރުތީބު ވެފައިވަނީ މި މަގުންނެވެ. އެހެން ކަމުން ކޮންމެ މީހެއްގެ ވެސް ދިރިއުޅުމުގައި ހޭދަކުރާ ކޮންމެ ދުވަހަކީ އިސްވެ ދެންނެވުނުފަދަ، ނަފްސަށް ހަމަޖެހުން ލިއްބައިދޭނޭ ކަމެއް ކުރާމީހަކަށްވުން ވަރަށްވެސް މުހިންމެވެ.