ދުނިޔޭގައި އަބަދުވެސް އެކި އެކި ޖަރީމާތައް، އެކި އެކި މީހުން އަންނަނީ ކުރަމުންނެވެ. އޭގެ ތެރޭގައި ފައިސާ އާއި މުދަލުން ހިންގާ ޖަރީމާތަކާއި ނަފުސާއި ފުރާނައިން ހިންގާ ޖަރީމާތައްވެސް ހިމެނެއެވެ. މިފަދަ ކޮންމެ ޖަރީމާއަކީ އޭގެ ސަބަބުން ގިނަ ބަޔަކަށް ބޮޑެތި ވޭންތަކާއި ތުރާތަކާއި އަނިޔާތަކެެއް ކުރުވާ ޖަރީމާތަކެކެވެ. ހަމަ އެއާއި އެކު ބޮޑެތި ލޭ އޮހޮރުވުންތަކާއި ގަތުލު އާންމު ތަކަކީވެސް މިފަދަ ޖަރީމާތަކުގެ ސަބަބުން ހިނގާ ނޭއްގާނީ އަމަލު ތަކެކެވެ.

ނިރުބަވެެރިކަމާއި ހަރުކަށި ކަމާއި ދެކޮޅަށް ދުނިޔޭގައި ކުރެވޭ މިފަދަ ޖަރީމާތަކަކީ މީގެ ތެރެއިން އެންމެ ބޮޑު އަދި އެންމެ ނުރައްކާތެރިކަން ބޮޑު ހަމަލާތަކެވެ. 2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ވީ ދުވަހު، ދުނިޔޭގެ އެންމެ ބޮޑު ބާރު ކަމުގައިވި، އެމެރިކާގެ އެންމެ މަގުބޫލު އެއް އިމާރާތް ކަމަށްވާ ޓުވިން ޓަވަރު ނުވަތަ ވޯލްޑް ޓްރޭޑް ސެންޓަރަށް ދެވުނު ނިރުބަވެރި ހަމަލާ، މަޝްހޫރު "9/11" ގެ ހާދިސާ ވެގެން ދިޔައީ ދުނިޔޭގައި މުޅިން ތަފާތު ފިތުނަވެރިކަމެއް އުފެދިގެން ދިޔަ ހާދިސާ އަކަށެވެ. މި ހާދިސާ އަށް ފަހުގައި ނަފްރަތާއި ރުޅިވެރިކަން މުޅި ދުނިޔޭގައި ފެތުރެން ފެށިއެވެ. އެ ހަމަލާގެ އެންމެ އަޑީގައި ހުރި ކަމަށް ބުނާ އުސާމާ ބިން ލާދިން އަކީ އިސްލާމީ ލީޑަރެެއް ކަމަށް މަޝްހޫރު މީހެކެވެ. އެ ފަހުން މުސްލިމުން ނާއި މެދު މުޅި ދުނިޔެ ދެކެމުން ދިޔަ ނަޒަރިއްޔާ ކަސިޔާރުވިއެވެ. ނަތީޖާ އަކީ "އިސްލާމް ފޯބިއާ" މުޅި ދުނިޔޭގައި ފެތުރެމުން ދިއުމެވެ.

މިކަމުގެ ސަބަބުން ދެން އުފެދެން ފެށި ނުބައި އަލިފާން ތަކުގެ ސަބަބުން، ހަރުކަށި ކަމާއި ނިރުބަވެރިކަމާއި ދެކޮޅަށް މުޅި ދުނިޔޭގައި އެކި ފެންވަރުގައި ހަނގުރާމަތައް ދިޔައީ ކުރެވެމުންނެވެ. އެގޮތުން އެ ތާރީޚުން ފެށިގެން އަދާ ހަމައަށް އެފަދަ ހަނގުރާމަތަކާއި ޖަރީމާތަކުގައި މަރުވެފައިވާ މީހުންގެ ޖުމުލަ އަދަދު ހޯދުމަށް އިނގިރޭސި ވިލާތުގެ މަދަނީ ޖަމުއިއްޔާއެއް ކަމަށްވާ "ވޮޗްޑޯގް އެއާރވޭސް" އިން ކުރި 20 ބޮޑު ދިރާސާއެއްގެ ނަތީޖާ މި ވަނީ އާންމުކޮށްފައެވެ.

އެ ދިރާސާގައި ބުނާގޮތުން ފާއިތުވެ ދިޔަ 20 އަހަރުގެ ތެރޭގައި ހަރުކަށިކަމާއި ދެކޮޅަށް ކުރެވުނު އެކި އެކި ހަނގުރާމަ ތަކުގައި މަދުވެގެން 98000 މީހުން މަރުވެފައިވާ ކަމަށްވެއެވެ. މިއީ އަހަރެއްގެ މައްޗަށް 4900 މީހުންނެވެ. މި ދިރާސާގައި ބުނާގޮތުން އެންމެ ގިނަ މީހުން އެއް އަހަރެއްގެ ތެރޭގައި މަރުވެފައި ވަނީ 2003 ވަނަ އަހަރުއެވެ. އެ އަހަރު އެކަނިވެސް މަދުވެގެން 18000 މީހުން ވަނީ މުރުވެފައެވެ. އެއީ އިރާގުގައި ހިނގައިދިޔަ ހަނގުރާމަތަކުގެ ސަބަބުން މަރުވި މީހުންގެ އަދަދު ގިނަވުމުން ކަމަށް އެ ރިޕޯޓުގައި ބުނެފައި ވެއެވެ.

އިތުރަށް އެ ރިޕޯޓުގައި ބުނެފައިވަނީ، ހަމަ އެކަނި ވައިގެ މަގުން ދިން ހަމަލާތަކުގައިވެސް މަދުވެގެން 22000 މީހުން މަރުވެފައި ވާނެ ކަމަށެވެ. އަދި މިއީ ދިރާސާތަކެއްގެ މައްޗަށް ބިނާކޮށް އަންދާޒާ ކުރާ އަދަދު ތަކެއް ކަމަށާއި އަސްހު ހަގީގީ އަދަދުތައްް ހޯދުމަކީ ފަސޭހަކަމެއް ނޫން ކަމަށްވެސް އެ ރިޕޯޓުގައި ބަޔާން ކޮށްފައިވެއެވެ.

މިފަދަ ހަނގުރާމަ ތަކާއި ޖަރީމާތަކުގައި މަރުވާ އާންމުގެ ނިސްބަތަކީ ވަރަށްވެސް ބޮޑު ނިސްބަތެކެވެ. ނަމަވެސް ވޮޗްޑޯގުގެ މި ދިރާސާގައި އާންމުންނާއި ހަނގުރާމަވެރިން ވަކި ވަކިން ބަޔާން ކޮށްފައެއް ނެތެވެ. އެހެން ނަމަންވެސް މިފަދަ ހަމަލާތަކުގައި ކުށެއްނެތް ކުޑަކުދިންނާއި އަންހެނުންނާއި ގިނަ އަދަދަކަށް އާންމުން މަރުވާ ކަމުގެ ރިޕޯޓުތައް ކޮންމެ ދުވަހަކުމެ މީޑިއާތަކުން ފެނެއެވެ. އެހެން ކަމުން މިފަދަ ހަނގުރާމަތަކާއި ޖަރީމާތަކުގައި ދުނިޔެއާއި ވަކިވެފައި މިވަނީ ހާދަހާވާ ގިނަ ބައެކެވެ. އޭގެތެރެއިން ކުށެއް ނެތް މައުސޫމު އެންމެންނަށް ސުވަރުގޭގެ ދާއިމީ ނިއުމަތް މިންވަރު ކުރައްވާށިއެވެ. އާމީން!