ދުނިޔޭގެ އެކި ކަންކޮޅުތަކުގައި ތަފާތު އެކި ހާދިސާތައް އަބަދުމެ ހިނގައެވެ. އިބުރަތްތެރި ކިތަންމެ ހާދިސާއެއްވެސް މެއެވެ. ނަމަވެސް އެކަންކަމާއިމެދު ވިސްނާ ފިކުރުނުކުރާ ބަޔަކަށް އެެއިން އެއްވެސް ކަމެއްގައި ފައިދާއެއް ނުކުރާނެއެވެ. މިއީ މަޝްހޫރު ދީނީ ޢިލްމުވެރިޔާ މުފްތީމެންކުގެ ދަރުހަކުން ނަގާފައިވާ އިބުރަތުންފުރިގެންވާ ވާހަކަކޮޅެކެވެ.

މުސްލިމު ޒުވާން އަންހެން ކުއްޖެއްގެ ވާހަކައެވެ. އުމުރުން ގާތްގަނޑަކަށް ވިއްސަކަށް އަހަރުގެ އަންހެން ކުއްޖެކެވެ. ރީތި ހަށިގަނޑެއްގެ ވެރި ކުއްޖެކެވެ. ފިރިހެނުންގެ ހިތްތައް އަތުލައިގަންނަ ފަދަ އުޖާލާކަމެއް އެކުއްޖާގެ މޫނުގައި ވެއެވެ.

ބަވަނަ ވެފައިވާ މި ދުނިޔޭގައި މީސްމީޑިޔާގެ އެކި އެކި މަންސަތަކަކީ ޒުވާނުން އޭގެ ތެރެއަށްގޮސް ހުސްވެފައިވާ އެއްޗެއްސެވެ. މި ޒުވާނާވެސް ވީ ހަމަ އެފަދައިންނެވެ. އަދި ހާއްސަކޮށް "ޓިކްޓޮކް" ގެ ނަމުން މަޝްހޫރުވެގެން ދިޔަ މީސްމީޑިޔާގެ މި މަންސާގައި އެކުއްޖާ އަމުދުން ފޯރިގަދައެވެ. ތަފާތު އެކި ބަނޑިތައް ލައްވަމުން ނަށާ ވީޑިއޯތައް އެހާމެ ގިނައެވެ. ބައެއް ފަހަރަށް އައުރަ ކަޝްފުވެފައިވާ މަންޒަރުތައްވެސް އެ މަންސައަށް ލެވިފައި ހުރެއެވެ. އެ ޒުވާނާވެގެން ދިޔައީ އެތައް ބައެއްގެ މަޤުބޫލުކަމާއި ތަރުހީބު ލިގެންވި ޒުވާނަކަށެވެ. މި ތަރުހީބާ މަޝްހޫރުކަން ވެގެން ދިޔައީ އެ ޒުވާނާގެ ޢަމަލުތައް އިތުރައް ކަސިޔާރުވާން ދިމައިވި މަގަކަށެވެ.

ދުވަސްތައް ފާއިތުވަމުން ދިޔައީ އެ ޒުވާނާގެ އެ ސަކަރާތުގައި ހޭދަކުރަމުންނެވެ. ދުނިޔެއަށް އައި ކޮވިޑުގެ ޢާލަމީ ވަބާގައި އެ ޒުވާނާއަށްވެސް ކޮވިޑު ޖެހިއްޖެއެވެ. ހާލު ދެރަވެސް ވިއެވެ. އެނދުމަތިވެސް ކުރެވުނެވެ. ޓިކްޓޮކް މެދުވެރިކޮށް އެ ޒުވާނާ އެކަން އާންމުވެސް ކުރިއެވެ. 

ހޮސްޕިޓަލުގައި އެނދުމަތިވުމަށްފަހު، މާގިނަ ދުވަސްތަކެއް ނުވެއެވެ. އެޒުވާނާގެ ހާލު ބޮޑުވެ އައިސީޔޫއަށް ގެންދެވުނެވެ. ވެންޓިލޭޓަރަށްވެސް ލާން ޖެހުނެވެ. ވެންޓިލޭޓަރަށް ލުމަށްފަހު މާގިނަ ވަގުތެއް ހޭދަނުވެ އެ ޒުވާނާ ނިޔާވެއްޖެއެވެ. ޒުވާނާ ނިޔާވުމާއެކު ގިނަބަޔަކު އޭނާއަށް ހެޔޮ ދުއާކުރާކަން މީސްމީޑިޔާގައި ހާމަކުރިއެވެ.

ދުވަސްތަކެއް ފަހެވެ. އެ ޒުވާނާގެ ޓިކްޓޮކް ވީޑިއޯތައް އެކި މީސްމީހުން އާންމުކުރަމުން ދިޔައެވެ. އަދި އޭނާގެ އެކައުންޓުގައި އޭނާގެ ހުރިހާ ވީޑިއޯއެއް ފެންނާން ހުއްޓެވެ. އެކަމާ އޭނާގެ އާއިލާއިން ވަރަށް ހިތާމަ ކުރިއެވެ. ވަރަށް ލަދުވެސް ގަތެވެ. އައުރަ ކަޝްފުވާ އެތައް މަންޒަރެއް އޭގައި ހުރީތީއެވެ. އެކަން ހުއްޓުވުމަށް އޭނާގެ ބޭބެ ޓިކްޓޮކު މެދުވެރިކޮށް ކުރި މަސައްކަތް ވީ ނާކާމިޔާބެވެ. މިއަދާޖެހެންދެންވެސް އެ ޒުވާނާގެ އެ މަންޒަރުތައް ދައުރުވާން ނުވަތަ ފެންނާން އެބަހުއްޓެވެ. އެހެން ނަމަވެސް އެ ޒުވާނާ މިއަދު ކޮބައިތޯއެވެ؟

އެހެން ކަމުން މީސްމީޑިއާގެ އެކި އެކި މަންސަތައް ބޭނުންކުރާ ޒުވާނުން ސަމާލުވާށެވެ. މާދަމަވެސް، މިއަދުވެސް މަރުވެދާނެއެވެ. ތިބާ މަރުވެގެން، ފަސްގަނޑުގެ ދަށަށް ދާންޖެހޭ ހިނދު، ތިބާގެ ހުތުރު ޢަމަލުތަކާއި ހަރަކާތްތައް މީހުނަށް ފެންނާނޭހެން ހުންނަން ތިބާ އެދޭނެހެއްޔެވެ. މީސްމީޑިއާ ބޭނުން ކުރުމުގައި ސަމާލުވެ ރައްކާތެރިވާންވީ މި ސަބަބަށްޓަކައެވެ. މާތް ﷲ އަޅަމެން އެންމެންގެ ފާފަތައް ފުއްސަވާ ސުވަރުގޭގެ ދާއިމީ ނިއުމަތް މިންވަރު ކުރައްވާށި! އާމީން!