ދުނިޔޭގައި އެކި މިޒާޖުގެ މީހުން އުޅެއެވެ. ކޮންމެ މީހަކީވެސް ތަފާތު މީހެކެވެ. އެއީ އެމީހަކަށް ހާއްސަ ތަފާތު ކަމެކެވެ. މި ތަފާތު ތަކަކީ އެކަކު އަނެކަކަށް ކުރާ އިހްތިރާމާއި ގަދަރަށް ބުރޫ އަރައިގެން ވާނޭ ކަން ކަމެއް ނޫނެވެ. ނަމަވެސް މި ފަނާކުރަނިވި ދުނިޔޭގައި ބައެއް މީސްމީހުންގެ މިޒާޖުގެ ސަބަބުން އެމީހުން މުޖުތަމައުން ބާކީވެފައި ތިބޭމަންޒަރު ފެނެއެވެ. މިއީ ހިތާމަ ހުރި މަންޒަރެކެވެ. އެކަމާއި ވިސްނާ، އެކަން ކަމަށް ހައްލެއް ހޯދަން ޖެހިފައިވާ އިޖްތިމާއީ މައްސަލައެކެވެ.

ބައެއް މީހުންނަކީ އެމީހުންގެ ދިރިއުޅުމުގައި ވަރަށް އަނގަގަދަ މިޒާޖެއްގެ ބަޔަކަށް ވެދާނެއެވެ. އެމީހުންނީ "ބޮލިރަވަ" އެއްހެން ހުއްޓާނުލާ ވާހަކަ ދައްކާ ބަޔަކަށް ވެދާނެއެވެ. މިއީ ބައެއް މީހުންނަށް ވަރަށް އުނދަގޫވާ މިޒާޖެކެވެ. މިފަދަ މީހުންނާއި އެކީ އުޅެން އުނދަގޫ މީހުންވެސް ތިބޭނެއެވެ. އެހެން ނަމަވެސް ވިސްނަންވީ އެ މިޒާޖުދެކެ ތިބާ ފޫހިވަނީ ތިބާގެ މިޒާޖެއްގެ ސަބަބުން ކަމެވެ.

ބަސްމަދު، ޖުމުލަ އެއް ނުކިޔާ މީހުންވެސް މަދެއް ނޫނެވެ. ކިތަންމެ މީހުން ގިނަ އަދި މަދު ތަނެއްގައި ނަމަވެސް ވާހަކަ ނުދައްކާ ނުވަތަ ވާހަކަ މަދު މިޒާޖެއްގެ ބަޔަކު އުޅިދާނެއެވެ. އެއީ އެބައެއްގެ މިޒާޖެވެ. އެ ސަބަބަށްޓަކައި އެމީހަކީ ނުވަތަ އެބަޔަކީ ޖަމާއަތުން ފޭގައި ތިބެން ޖެހޭނޭ ބައެއް ނޫނެވެ. އާންމުކޮށް ފެންނަ މަންޒަރަކީ އެފަދަ މީހުން މުޖުތަމައުގައި ބާކީވާ މަންޒަރެވެ. އެފަދަ މީހުންގެ މާގިނަ އެކުވެރިންނެއް، އަދި ރަހުމަތްތެރިންނެއް ނުތިބެއެވެ. މިހެން މި ވަނީ ހަގީގަތުގައި އެމީހާގެ ބަސްމަދު ކަމުންނޭ ބުނެވިދާނެއެވެ. ނަމަވެސް މުޖުތަމައުގައި ދެންތިބި މީހުންނަކީވެސް އެމީހަކަށް ހާއްސަ މިޒާޖެއް ލިބިފައި ތިބި ބައެކެވެ. އެހެން ކަމުން ބަސްމަދު މީހާ ބާކީ ކުރެވޭއިރު، އެއީ ތިމާގެ މިޒާޖު އެމީހާއަށްވެސް ކަމުނުދަނީ ކަމުގައި ވެދާނެއެވެ. 

މިޒާޖުގެ ތަފާތުކަމުން އެއްވެސް މީހަކު ބާކީ ކުރުމަކީ އެ ބާކީ ކުރާ މީހާގެ މިޒާޖު ގޯސްވުން ކަމުގައި ދެން ތިބި މީހުން ދެކެން ވާނެއެވެ. އަނެކެއްގެ މިޒާޖަކީ ތިމާ އެ މިޒާޖަކާއި ނުގުޅޭ މިޒާޖެއްނަމަވެސް، އެމީހެއްގެ މިޒާޖަކަށް ތިބާ އިހްތިރާމް ކުރަންވާނެއެވެ. ގަދަރު ކުރަން ވާނެއެވެ. މިޒާޖު ތަފާތު ކަމަކީ އެއްވެސް ހާލެއްގައި އިންސާނުންގެ މެދުގައި ތަފާތުކުރުން ގެންގުޅެގެން ވާނޭ ކަމެއް ކަމެއް ނޫންނެވެ. ކޮންމެ މިޒާޖަކަސް އެންމެންނާއި އެކުގައި އުޅެވެން ޖެހޭނެއެވެ. އެންމެން އެކަން ދަނެ، އެކަމަށް އިހްތިރާމްކޮށް ގަދަރު ކުރާނަމަ، މިއީ ނުވާނޭ ކަމެއް ނޫނެވެ.