މިއީ ދިވެހި ރާއްޖޭގެ އުތުރުގެ ރަށެއްގައި ހިނގައިދިޔަ ހަގީގީ ހާދިސާއެކެވެ. މި ވާހަކަ ހިއްސާ މި ކޮށްލެވެނީ އެ ފަރާތުގެ އިޒުނާއި އެކުގައެވެ. މި ވާހަކައިގައި ބޭނުން ކުރެވިފައިވަނީ އަސްލު ނަންތަކެއް ނޫނެވެ.

މަރީ އަކީ ތުއްތު ދެކުދިންގެ މަންމަ އެވެ. އޭނާގެ ޒަވާޖީ ހަޔާތަށް 10 އަހަރު ވެދާނެއެވެ. އޭނާގެ ފިރިމީހާގެ ގޭގައި އެ ތިންބެއިން އުޅެމުން އައީ އެކުދިންގެ ބައްޕައާއި ވަކިންނެވެ. އެހެނީ އެކުދިންގެ ބައްޕަ ވަޒީފާ އަދަަކުރަމުން އައީ ރިސޯޓެއްގައި ކަމަށް ވާތީއެވެ.

ރިސޯޓުގެ މާހައުލަކީ ދިވެހިންގެ ވައްޓަފާޅިއާއި މުޅިން ތަފާތު ވައްޓަފާޅިއެއް އޮންނަ ތަންތަނެވެ. މަނިކަކީ އެކުދީންގެ ބައްޕައެވެ. ފެށުނީއްސުރެ ރިސޯޓުގައި ވަޒީފާއަދާކުރަމުންދާ މަނިކު ވަޒީފާ އަދާކުރަނީ އެރިސޯޓްގެ ރެސްޓޯރަންޓެއްގައެވެ. މިހެން އުޅުމުގެ ތެރޭގައި މަނިކާއި ދިމާވި އެކުވެރިންތަކެއްގެ ސަބަބުން މަނިކު ހިނގަމުން ދިޔަ ސީދާމަގު ކަސިޔާރުވާން ފެށިއެވެ. މަދު މަދުން ބަނގުރާ ބޮވެން ފެށުނެވެ. އޫރު މަސްވެސް ކެވެން ފެށުނެވެ. ދުވަސްތަކެއް ކުރިން ފެށުނު މި ނުބައި އާދަ މިއަދު މަނިކުގެ ކަށީގައި ހިފައިފިއެވެ. ނަމަވެސް މިއިން އެއްވެސް ކަމެއް މަނިކުގެ އާއިލާއަކަށް ނޭނގެއެވެ.

ދުވަސްތައް ފާއިތުވަމުން ދިޔައެވެ. އެއްދުވަހެއްގެ ރޭގަނޑުގެ ވަގުތު މަރީގެ ފޯނަށް މީހަކު ގުޅިއެވެ. އެއީ ރިސޯޓުންނެވެ. މަނިކު ކުއްލިގޮތަކަށް ވަރަށް ބޮޑަށް ބަލިވެގެން މާލެ ގެންދަން އުޅޭ ކަމުގެ ހަބަރު ދިނެވެ. މަރީ އެކަމާ ވަރަށް ދެރަވިއެވެ. އެހެން ނަމަވެސް އޭނާގެ ދެ ދަރިން، އެކުދިންގެ މާމަގެ ގާތުގައި ބޭތިއްބުމަށްފަހު މަރީވެސް މާލެ ދިޔައެވެ. އޭރު މަނިކު އޮތީ ހޮސްޕިޓަލުގައި އެނދުމަތި ކޮށްފައެވެ. ވެގެން އުޅޭގޮތް ސާފެއް ނުވެއެވެ.

އިރުކޮޅެއްފަހުން ޑަކްޓަރު އައެވެ. ހެދި ލޭގެ ޓެސްޓުތަކުން މަނިކުގެ ފުރަމޭގައި މައްސަލަ ތަކެއް ހުރިކަމަށް ބުންޏެވެ. ނަމަވެސް އަދި މުޅިން ސާފު ނުވާތީ އިތުރު ޓެސްޓުތަކެއް ހަދަން ޖެހޭނޭ ކަމަށް ޑަކްޓަރު ބުންޏެވެ. އަދި އިތުރަށް އެއް ސުވާލު ކޮށްލިއެވެ. މަނިކުގެ ކައިރީގައި މަރީވެސް ހުއްޓައެވެ.

ޑަކްޓަރުގެ ސުވާލުން ލޯ ކިރިޔަ ކިރިޔާ ހުޅުވިފައި އޮތް މަނިކުގެ ދެލޯ ބޮޑުވެގެން ދިޔައެވެ. މަރީވެސް ހައިރާންވިއެވެ. ޑަކްޓަރުވެ ސުވާލަކަށް ވީ މަނިކު ބަނގުރާ ބޮންތޯއެވެ. މަނިކަށް ބަލައިލެވުނީ މަރީއާއި ދިމާލަށެވެ. މަނިކު ޖަވާބެއް ނުދިނެވެ. ޑަކްޓަރު އަނެއްކާ ސުވާލު ތަކުރާރުކޮށްލަމުން ކިޔައިދޭން ފެށިއެވެ. ބަނގުރަލުން ފުރަމެއަށް ދޭ ގެއްލުންތަކާއި ނުރައްކަލުގެ ވާހަކައެވެ. ފުރަމޭގެ މަސައްކަތް ހުއްޓި ފުރަމެއަށް ކެންސަރު ޖެހި ފުރަމޭ ގިރޭ ގޮތް ވެދާނެ ކަމުގެ ވާހަކައެވެ. ތަކުރާރުކޮށް ޑަކްޓަރު ސުވާލުކުރުމުން މަނިކު ޖަވާބުދިނެވެ. ބަނގުރާ ނުބޯކަމަށް ބުންޏެވެ. އެހެންނަމަވެސް މަނިކު ގޮވައިގެން ރިސޯޓުން އައި ޑަކްޓަރު މަނިކުގެ ކައިރިއަށް އައީ އެވަގުތެވެ. އެ ޑަކްޓަރު ހުރިހާއެއްޗެއް ކިޔައިދިނެވެ. މަނިކު ހުރީ ހަދާނެ ގޮތެއް ބުނާނެ އެއްޗެއް ނޭނގިފައެވެ. މަރީގެ މުޅިހަށިގަނޑު ގަނޑުވިހެން ހީވިއެވެ. މަނިކު އާދަވެގެން ކޮންމެ ދުވަހަކުމެ ބަނގުރާ ބޯވާހަކަވެސް ރިސޯޓު ޑަކްޓަރު ކިޔައިދިނެވެ.

މަރީ ލަސްނުކޮށް އެތަނުން ތެދުވެގެން ދިޔައެވެ. ދިޔަ ނުދިޔަ ތަނެއް މަނިކަކަށް ނޭނގޭނެއެވެ. އޭގެ ފަހުން މަރީ މަނިކުގެ ގާތަކަށް ނުދެއެވެ. އިތުރު ވާހަކައެއްވެސް ނުދައްކައެވެ. މަރީ ކުރިހާވެސް ކަމަކީ މަނިކުގެ އެ އަމަލުތައް އެއީ ތެދުތޯބެލުމަށް ރިސޯޓުން މަރީ ދަންނަ އެކި މީސް މީހުންނާއި ގުޅައިގެން އެކަން ސާފުކުރުމެވެ. ކަމުގައި އެއްވެސް ޝައްކެތް ނެތް މިންވަރަށް ކަން ސާފުވުމުން، މަރީ ބޭނުންވީ އެމީހުންހެ އެ ގުޅުން ނިންމާލާށެވެ. ތުއްތު ތުއްތު ދެކުދިން އެއާއިލާގައި ތިބި ނަމަވެސް އެފަދަ ފިރިއަކާއެކީ ނުވަތަ އެފަދަ ބައްޕައަކާއި އެކު އެކުދިން ބޮޑުކުރަން މަރީ ބޭނުން ނުވީއެވެ. މަނިކު ހޮސްޕިޓަލުގައި ފަރުވާހޯދީ މަރީގެ އެހީތެރިކަން ނުލިބިއެވެ. މަނިކު ގެ ފުރަމޭގެ އެއްބައި ގިރިފައިވާ ކަމަށާއި މަސައްކަތް ނުކުރާކަމަށް ޑަކްޓަރު ބުންޏެވެ. ލިވާ ސިރޯސިސް ނަމަކަށް ކިޔާ ބައްޔެއް މަނިކުގެ ފުރަމެއަށް ވަނީ ޖެހިފައެވެ. ފަރުވާއަށްފަހު މަނިކު އެނބުރި ދިޔައީ ފުރަތަމަ ރަށަށެވެ. އެހިސާބުން މަރީ، ވަރިވުމަށް އެދި ކޯޓަށް ސިޓީ ލިއެވެ. މަނިކުގެ ހިތް ކުދި ކުދިވިއެވެ. މަރީއަށްވެސް އެއީ ކުރަން ފަސޭހަ ކަމަކަށް ނުވިއެވެ. އެހެނަސް އެކަން އެގޮތަށް ވެ ނިމިއްޖެއެވެ.

"ސަޅި" ކަމެއް ކަމަށް ދެކި ބޮއުނު ބަނގުރަލުގެ ރަހަ މަނިކަށް ދިނީ ވަރަށްވެސް ހިތިކޮށެވެ. ލޯބި އާއިލާ ރޫޅުނެވެ. ހަށިގަނޑުގެ މުހިންމު އެއް ގުނަންމުޅިން ބަލިކޮށްލިއެވެ.