ސިހުރު ހެދުމާއި ސިހުރުގެ ނަޖިސް ކުޅިވަރު ކުޅޭ މީހުން މުސްލިމު އުންމަތުގައި މަދެއް ނޫނެވެ. މި ކުޑަ ކުޑަ ދިވެހި ރާއްޖޭގައި މި މުޑުދާރު ވަބާގެ ވަކި މި ވަނީ ވަރަށްގަދައަށް ހިއްޕާލާފައެވެ. މިއީ އޭގެ ގެއްލުމާއި ހަލާކު އިންތިހާއަށް ބޮޑު ކަމެކެވެ. ސިހުރުވެރިޔާ ހަދާ ސިހުރުން ރައްކާތެރިވުމަށް ކުރެވިދާނެ ކަންތައްތަކެއް އިސްލާމްދީނުގައި ވަނީ ބަޔާންކުރައްވާފައެވެ. މިއިން ކޮންމެ ކަމެއްވެސް ގުޅެނީ ކިޔުމާއެވެ. ދުލުން ކުރެވޭ ޒިކުރެއް ނުވަތަ ދުޢާ އަކާއެވެ. މި ލިޔުމުގައި އަޅިގަނޑު މި ހިމަނާލާ ނުކުތާތަކަކީ 2009 ވަނަ އަހަރު ފަންފަތް މަޖައްލާގައި ޝައިއުކޮށްފައިވާ ލިޔުމަކުން ތަރުތީބު ކުރެވިފައިވާ ނުކުތާތަކެކެވެ.
ސިހުރުން ސަލާމަތްވުމަށް ނުވަތަ ރައްކާތެރިވުމަށް ކުރެވިދާނެ ކަންތައްތަކަށް ބަލައިލަމާ ހިނގާށެވެ. އެގޮތުން އެންމެ ފުރަތަކަމަކީ ސަބަބުތަކުގައި ހިފުމާއި އެކު މާތް ﷲ އަށް ވަކީލު ކުރުމެވެ. އެހެނީ އައް ޠަލާޤް ސޫރަތުގެ 3ވަނަ އާޔަތުގެ މާނަގައި މާތް ﷲ އަށް ވަކީލު ކޮށްފި މީހާއަށް ﷲ ފުދިގެންވާ ކަމަށް އޮތުމުންނެވެ. ދެވަނަ ކަމަކަށް ކުރެވިދާނެ ކަންތައްތަކުގެ ތެރޭގައި ހެނދުނާއި ހަވީރުގެ ދުޢާތައް ކުރުން މުހިންމެވެ. މިފަދައިން ހެނދުނާއި ހަވީރު ކިއުމަށް އެތައް ދުޢާތަކެއް ވެއެވެ. އެ ދުޢާތައް ބަޔާންކުރާ ފޮތްތަކާއި މޯބައިލް އެޕްލިކޭޝަންތައް މިހާރު މަދެއް ނޫނެވެ. އެފަދަ ވަސީލަތަކަން އެ ދުޢާތައް ހޯދާ ކިޔުން ވަރަށްވެސް މުހިންމެވެ.
ސޫރަތުލް ބަޤަރާ އަކީ ދިގު ސޫރަތެކެވެ. އެހެންނަމަވެސް އެ ސޫރަތުގައި ސިހުރުވެރިންގެ ވާހަކަ ބަޔާންވެގެން ވެއެވެ. ޢިލްމުވެރިން ވިދާޅުވާގޮތުގައި ބަޤަރާ ސޫރަތް އެ ގެއެއްގައި ކިޔަވާނަމަ، އެ ގެއަކަށް ސިހުރުގެ ނުބައިކަން ނުފޯރާނެއެވެ. އެހެނީ އެކަމަށް އިޝާރާތްކުރާ ޙަދީޘް ބަސްފުޅެއް ވާތީއެވެ.
ފާހާނާއަކީ ޝައިތާނުން އެތަނަކަށް ގަޔާވާ ތަނެކެވެ. އެހެން ކަމުން ފާހާނާއަށް ވަނުމުގެ ކުރިން ރައްކާތެރިކަމުގެ ފިޔަވަޅު އެޅުން މުހިންމެވެ. އެގޮތުން ފާހާނާއަށް ވަންނަ ހިނދު ކިޔާ ދުޢާ ކިޔުން ވަރަށްވެސް މުހިންމެވެ. އަދި ފާހާނާއިން ނުކުންނަމުން ކިޔާދުޢާ އަކީވެސް އެހާމެ މުހިންމު ދުޢާ އެކެވެ.
ދިވެހިން ޒަމާނުންސުރެ ކުރަމުން އަންނަ އެއް ކަމަކީ ނިދުމުގެ ކުރިން ކުރުސި ކިޔެވުމެވެ. އާދެ އާޔަތުލް ކުރުސިއެވެ. މިއީ ޤުރުއާނުގައިވާ އެންމެ މާތް އެއް އާޔަތެވެ. ނިދުމުގެ ކުރިން ކުރުސި ކިޔައިފިނަމަ އޭނާ ހޭލުމާއި ދެމެދު، އޭނާ އަށް ރައްކާތެރިކަން ހުއްޓެވެ. ހަމަ އެފަދައިން ނިދިން ހޭލެވުމާ އެކުވެސް އާޔަތުލް ކުރުސި ކިޔުން މުހިންމެވެ.
ކޮންމެ މީހަކުވެސް އޭނާ އުޅެމުން ދާ ގެއިން ނުކުންނަ ނަމަ ގެއިން ނުކުންނަ ދުޢާ ކިޔުން މުހިންމެވެ. އެނބުރި ގެއަށް ވަންނަ ނަމަ ދުޢާ ކިޔުން މުހިންމެވެ. އަމުދުން ގޭގެއަށް ވަނުމުގެ ކުރީން ސަލާމްގޮވުމަކީވެސް ރައްކާތެރިކަން ލިބިގެންވާ ކަމެއް ކަމުގައި ޢިލްމުވެރިން ބަޔާންކުރައްވައެވެ.
ކަދުރަކީ މާތް ރަސޫލާ އެ މޭވާއަކަށް ތައުރީފު ކުރައްވާފައިވާ މޭވާއެކެވެ. އެގޮތުން ކޮންމެ ދުވަހެއްގެ ހެނދުނު ހަތް ކަދުރު ކެއުމަށް މާތް ރަސޫލާ އިރުޝާދު ދެއްވާފައިވެއެވެ. އަދި އެ ޙަދީޘްފުޅުގައި މަދީނާގެ ކަދުރު ވަކިން ފާހަގަ ކުރައްވާފައިވެއެވެ. ޢިލްމުވެރިން ބަޔާންކުރައްވާ ގޮތުގައި ހެނދުނާ ހަތް ކަދުރު ކައިފި މީހަކަށް، އެއްޗެއް ކެވުމުގެ ސަބަބުން ޖެހޭ ސިހުރު ޖެހުން ދުރުކޮށްދެއެވެ.
މިބަޔާންކުރެވުނު ކަންތައްތަކުގެ އިތުރުންވެސް ސިހުރުން ރައްކާތެރިވުމަށް ކުރެވިދާނެ ކިތަންމެ ކަމެއް ހުންނާނެއެވެ. އިސްލާމްދީނުގައި ބަޔާންކުރައްވާފައިވާ މިފަދަ ރައްކާތެރިކަމުގެ ފިޔަވަޅުތަކަށް ތަބާވާނަމަ، ސިހުރާއި އެސްފީނާ ފަދަ ނުބައި ޢަމަލުތަކުން އިންސާނަ ރައްކާތެރިކޮށްދޭނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން