އ.ދ ގެ އާންމު މަޖިލީހުގެ ރިޔާސަތު ބަލަހައްޓަވަން އިނީ ދިވެއްސެކެވެ. މިއީ މުޅި ދުނިޔެ ދިވެހިން ބަލައިގަންނަކަން ހާމަވާ އަލިގަދަ ހެއްކެކެވެ. މިފަހުން އ.ދ ގެ އާންމު މަޖިލީހެއްގައި، ރިޔާސަތާއި މުހާތަބުކޮށް ގިނަ ގައުމުތަކަކުން ވަނީ ވާހަކަ ދައްކާފައެވެ.

މި މަޖިލީހުގައި ދިވެހި ރާއްޖޭގެ އިއްޒަތްތެރި ރައީސުލް ޖުމްހޫރިއްޔާވެސް ވަނީ ވާހަކަފުޅު ދައްކަވާފައެވެ. އެ މަނިކުފާނުގެ ވާހައިގައި މުޅިންހެން ވީ ޖަޒުބާތެވެ. އަސަރުން ފުރިގެން ދިޔަ އެ ވާހަކަފުޅުގެ އަސަރު އިތުރަށް ގަދަވެގެން ދިޔައީ އެ ވާހަކަފުޅު ދިވެހި ބަހުން ހިއްސާ ކުރެއްވީތީއެވެ. މުޅި ދުނިޔެއަށް، ފަށުވި ދިވެހި ލަފުޒު ތަކަކާއި ތޫނު ދިވެހި ޖުމުލަ ތަކަކުން އަޑު އިއްވަމުންނެވެ. މިއީ ދިވެހި ބަހަށާއި މި ދީބަށް ލިބުނު ވަރަށްވެސް ބޮޑު ފަހުރެކެވެ.

ރައީސްގެ މި ވާހަކަފުޅަށްފަހު މީސްމީޑިއާގެ އެކި އެކި މަންސަ ތަކުގައި ރައީސްގެ މި އަމަލުފުޅަށް ތައުރީފު އޮހެމުން ދިޔައެވެ. ހާއްސަކޮށް ދިވެހި ބަހުން ވާހަކަފުޅު ދެއްކެވުމުން އެކަމަށް ހާއްސަ ފޮނި ތައުރީފުތަކެއް އޮހެމުން ދިޔައެވެ. ތައުރީފުގެ މިފަދަ އެތައް މެސެޖުތަކެއް ފެންނަމުން ދިޔައިރު، ބައެއް ފަހަރަށް ދިވެހި ބަސް ވަރަށް ބޮޑަށް ކުރި އަރައިގެން ދިޔަކަމަށް ބައެއް މީހުންނަށް ހީކުރެވިފައި ހުއްޓެވެ. މިފަދަ އިބާރާތް ތަކާއި ޖުމުލަތައް އެކުލެވޭ ކިތަންމެ މެސެޖެއް ފެންނާން ހުއްޓެވެ. ކިތަންމެ ޕޯސްޓެއް ދައުރުވާން ހުއްޓެވެ.

އާދޭހެވެ! ދުނިޔޭގެ އެފަދަ ބޮޑު ޖަލްސާއެއްގައި ދިވެހި ބަހުން ވާހަކަފުޅުދެއްކެވުމަކީ ބަހަށް ލިބުނު ކުރިއެރުމެކެވެ. އެކަން ހިތުގެ އަޑިން ޤަބޫލު ކުރަމެވެ. އެހެން ނަމަވެސް ހަގީގަތުގައި އެފަތަ ޖަލްސާއެއްގައި ދިވެހިބަހުން ވާހަކަ ދެއްކުމަކީ "ދިވެހި ބަހަށް" ލިބުނު އެއްވެސް ކުރިއެރުމަކަށް ނުވާނެއެވެ. އެހެނީ ދިވެހި ބަހުން ވާހަކަ ދައްކަން ތިބި މީހުން އެބަހުން ވާހަކަ ދެއްކުމުގައި ކުރަފި އަރުވާތީއެވެ. ޖަލްސާއެއްގައި ވާހަކަ ދެއްކެވި ބޭފުޅަކު ދިވެހި ބަހުން ފަށުއިކޮށް ވާހަކަ ދެއްކުމަކީ އެބޭފުޅެއްގެ މޮޅުކަމެވެ. އެއީ ދިވެހި ބަހުން ވާހަކަ ދައްކަން ތިބި އެހެން މީހުންގެ މޮޅުކަމެއް ނޫނެވެ. 

ދިވެހިން ދިވެހި ބަހުން ވާހަކަ ދެއްކުމުގައި ދިވެހި ބަހަށް މަލާމާތް ކުރެއެވެ. ގަސްތުގައެއް ނޫނެވެ. ނޭނގި ތިބެއެވެ. ދިވެހި ބަހާއި ފަރަންޖީ ބަސް މަސްހުނި ކުރެއެވެ. ރީތި ދިވެހި ބަސް ބަހުގެ ބަދަލުގައި ދުލަށް ނުފަރިތަ ފަރަންޖީ ބަސްބަސް ބޭނުން ކުރެއެވެ. މި އާދަ ދިވެހިންގެ ކަށީގައި ހިފައި، ދިވެހި ބަހަށް ދިވެހިން ބީރައްޓެހިވަމުން ދާނަމަ، އެފަދަ ބޮޑު ކިތަންމެ ތަގުރީރެއް ކިތަންމެ ތަނެއްގައި ކިތަންމެ ބަޔަކު ދިނަސް ހަގީގަތުގައި ދިވެހި ބަހަށް ލިބޭ ކުރި އެރުމެއް ނެތެވެ.

އާދޭހެވެ! ދިވެހި ބަހުގެ ބޭރު ތޮށި ކިތަންމެ ރީއްޗަސް އެތެރެ އޮތީ ފާވެފައެވެ.