ދުނިޔޭގައިވާ އެންމެ ހައިބަތު ބޮޑު ގަޑިއަކީ، މައްކާގެ ބޮޑު ގަޑި. އެ ގަޑި ބަހައްޓާފައިވާ ބިނާގެ އުސްމިނުގައި 601 މީޓަރު ހުރޭ. މައްކާގެ ކޮންމެ ހިސާބަކަށްވެސް މިގަޑި ފެންނާނެ. އެހެންކަމުން މިއީ ޙައްޖާޖީންނާއި ޢުމްރާވެރީންނަށް ނުހަނު ބޭނުންތެރި "ލޭންޑްމާކަކަށް" ވަނީވެފަ. ބިނާވެށީގެ މާހިރުން ދެކޭ ގޮތުގައި އެ ގަޑީގެ ސަބަބުން މައްކާގެ މަލަމަތީގެ ރީތިކަން އިތުރުކޮށްދޭ. އިމާރާތުގެ ހަތަރު ބިތުން ގަޑި ފެންނާނެހެން ބަހައްޓާފައި ހުރޭ. ކުރިމަތީ ބިތާއި ފަހަތު ބިތުގެ އޭރިއާއަކީ، 1849 ސުކޮޔާރ މީޓަރު. އަނެއް ދެ ބިތުގެ އޭރިއާއަކީ، 1677 ސުކޮޔާރ މީޓަރު. އެ ގަޑީގެ މަތީގައި ލިޔެފައިވާ ތަކުބީރު (الله أكبر) އަކީ، މިހާތަނަށް ލިޔެވިފައިވާ ތަކުބީރުގެ އެންމެ ބޮޑު ކަލިމަ. ލަފްޒުލް ޖަލާލަތުގެ އަލިފުގެ ދިގުމިނުގައި 23 މީޓަރު ހުރޭ. މަތީގައިވާ ހަނދުފަޅިއަކީ ދުނިޔޭގައި އިމާރާތް ކުރެވިފައިވާ އެންމެ ބޮޑު ހަނދުފަޅި. އޭގެ ދިގުހުރަހުގައިވެސް 23 މީޓަރު ހުރޭ. މި ގަޑީގެ ބަރުދަނުގައި 36000 ޓަނު ހުންނަ ކަމަށް ބުނެވޭ. ގަޑީގެ ދެ ފަރާތުގައި ޝަހާދަތުގެ ދެ ކަލިމަ (لا إله إلا الله محمد رسول الله) ލިޔެފައި ވޭ. ގަޑި ފަރުމާކޮށްފައިވަނީ، އިސްލާމިކް އާކިޓެކްޗަރ އާއި ފަންނު ދައްކުވާދޭ ރަމްޒެއްގެ ގޮތުގަ. އަދި މިއީ މައްކާ ރަމްޒުކޮށްދޭ ނިޝާނެއްގެ ގޮތުގައިވެސް ބޭނުން ކުރާ ނިޝާނެއް.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން