އިންސާނުންނަށް މާތް ﷲ ދެއްވި ނިޢުމަތްތަކުގެ ތެރެއިން ދުޅަހެޔޮ ސިއްހަތަކީ ކޮންމެ މީހަކުވެސް އެދޭނޭ ނިޢުމަތެކެވެ. ނަމަވެސް އެ ސިއްހަތުގެ ދުޅަހެޔޮކަން ފިލާ، އިންސާނާ ބަލި ވާ ހާލަތްތަކާއި ވަގުތުތައް މި ދުނިޔެ ކުރިމަތި ކުރުވައެވެ. އެފަދަ ބަލި މީހުންނަށް އަޅާލުމާއި ބަލިމީހުންނަށް ޒިޔާރަތް ކުރުމަކީ އިސްލާމްދީން ނުހަނު ބާރު އަޅާ ކަމެކެވެ. އެފަދައިން ބަލި މީހެއްގެ ގާތަށް ޒިޔާރަތް ކުރާއިރު ސަމާލުކަންދޭންވީ ބައެއް ނުކުތާތަކަށް އަލި އަޅުވާލާނަމެވެ.

އެގޮތުން ބަލިމީހާއަށް ކެވޭނެ، އޭނާއަށް މީރު، ފައިދާހުރި ކާއެއްޗެއް ގެންދެވިދާނެއެވެ. ބަލިމީހަކަށް ކާން ދިނުމަކީ ޤިޔާމަތްދުވަހު ތިބާއަށް ހަމައެފަދަ އެއްޗެއް ސުވަރުގެއިން ލިބުމަށް އުންމީދުކުރެވެން އޮތް މަގެއް ކަމަށް އަހަރެމެން ދީން ދަސްކޮށްދެއެވެ. އަދި މިއީ މިއަދުވެސް މި ދިވެހި މުޖުތަމައުގައި އާދަވެ ކުރެވޭ ރީތި ޢަމަލެކެވެ.

ބަލިމީހާއަށް ފައިދާކުރާނެ ނުވަތަ ބޭނުމެއް ހިފޭނޭ އެހެން އެއްޗެއްވެސް ގެންގޮސް ދެވިދާނެއެވެ. އެގޮތުން ދީނީ ލިޔުން، ޢިބްރަތްތެރި ވާހަކަ ފަދަ އެއްޗެތިވެސް ގެންދެވިދާނެއެވެ. ބަލި އެނދުގައި އޮންނަ މީހަކަށް އޭނާގެ ޙާލަތު ތަންދޭނަމަ އެފަދަ ތަކެތި ކިޔުމަށް ބާރު އެޅިދާނެއެވެ.

މީގެ އިތުރުން ހިތްހަމަޖެހޭނެ ފަދަ ތަކެތިވެސް ގެންގޮސްދެވިދާނެއެވެ. ބަލި އެނދުގައި އޮންނަ މީހަކަށް ހިތް ހަމަޖެހުން ވަރަށް ބޮޑަށް ބޭނުންވާނެއެވެ. އެއީ ބޭހާއި އެއްވަރަށް އޭނާގެ ބަލިހާލު ރަނގަޅު ކޮށްދޭނޭ ކަމެކެވެ. ބަލި މީހަކީ ކުޑަކުއްޖެއްނަމަ އެކުއްޖާ ގަޔާވާނޭފަދަ ކުޅޭ އެއްޗެއްވެސް ގެންގޮސްދެވިދާނެއެވެ.

ބަލިމީހާގެ ގާތުގައި ހޭދަކުރާ ވަގުތު މަދުކުރުން މުހިންމެވެ. އެހެނީ ގިނައިރުވުމުން ބައެއް މީހުންނަށް އުނދަގޫވެދާނެއެވެ. ވީމާ އޭނާއަށް އުނދަގޫ ނުވާކަން ކަށަވަރުކުރުން މުހިންމެވެ. އަދި އެގޮތަކަށް އަމަލުކުރުންވެސް އެފަދައެވެ.

ބަލި މީހާ އާއި ބައްދަލުކުރަންވާނީ ހިނިތުންވެ ހުރެއެވެ. އެއީ އޭނާއަށްޓަކައި ތިބާ ދޭ ޞަދަގާތެކެވެ. އަދި އޭނާއަށް އަވަސް ޝިފާއަކަށް އެދި ދުޢާކުރަންވާނެއެވެ. އަޑު ހަރުކޮށް ބަލި މީހާގެ ކުރިމަތީ ދުޢާ ކުރުމެއް ނޫނެވެ. މާތް ﷲ ގެ އިރާދައާއި އެކު އަވަސް ޝިފާއެއް ލިބުން އެދޭކަމަށް ބުނެލުމުން ވެސް ފުދޭނެއެވެ. ބަލި މީހާއަށް ޝިފާއަށް އެދޭކަން ހާމަކޮށްދިނުން ވަރަށްވެސް މުހިންމެވެ.

މީގެ އިތުރުން ބަލިމީހާއަށް އެކަންކަން އެނގުމުން އުނދަގޫވާނެ ޒާތުގެ އެއްވެސް ވާހަކައެއް ދައްކައިގެން ނުވާނެއެވެ. އެފަދަ ކަންކަން އެނގުމުން އެކަންކަމަށް ވިސްނުމަކީ ބަލިމީހާ އަށް އިތުރު ބުރައާއި ތަކުލީފު ލިބޭނޭ ކަމެކެވެ. 

ހަމަ އެއާއިއެކު ބަލިމިހާއަށް ހިތްވަރުދޭންވާނެއެވެ. ބައްޔަށް ބަލައި ޑަކްޓަރުން ކޮންމެ ގޮތަކަށް ބުނި ނަމަވެސް ﷲ ޝިފާ ދެއްވެވުމުން ފަސޭހަ ނުވާނެ ބައްޔެއް ނޯންނާނެކަން ވިސްނައިދޭންވާނެއެވެ. ބަލިމީހާގެ އަތުގަ ހިފާލާ ނުވަތަ ބޮލުގާ ފިރުމާލާ ހޭހަން ކޮށްދިނުންވެސް ވަރަށް މުހިންމެވެ.

ބަލިމީހަކަށް ޒިޔާރްތްކުރާނަމަ މި ކަންތަކަށް ސަމާލުކަން ދޭންވާނެއެވެ. މިއަދު ބަލި އެނދުގައި އެހެންމީހަކު އޮތަސް، މާދަމާ އެ އެނދުގައި އޮންނަން ޖެހޭނީ ތިބާނޫން ކަމެއްވެސް ނޭނގެއެވެ. އެހެންކަމުން އަބަދުވެސް ބަލި މީހުންނަށް އަޅާލާ އޯގާތެރިވާން ވާނެއެވެ.