ޑަޗް ލޭޑީ ކިރަކީ ދިވެހިންގެ ތެރޭގައިވެސް ވަރަށް މަގުބޫލު ބުއިމެއް. އެ ކުންފުނީގެ ނުވަތަ އެ ބްރޭންޑުގެ ކިރުގެ ބާވަތެއް ބޭނުން ނުކުރާ ދިވެއްސަކު މިޒަމާނުގައި މަދުވާނޭ ބުނުން ދޮގަކަށް ނުވާނެ. ދުނިޔޭގައިވެސް ޑަޗް ލޭޑީގެ އުފެއްދުންތަކަކީ ބޮޑު މަގުބޫލުކަމެއް ހޯދާފައިވާ އުފެއްދުންތަކެއް. ޑަޗް ލޭޑީގެ ނަމަށް ބަލައިލާނަމަ "ޑަޗް" މި ބަހަކީ ޑަޗުންނަށް ނުވަތަ ނެދަލޭންޑުގެ ރައްޔިތުންނަށް މުހާތަބުކުރާ ނަމެއް. "ލޭޑީ" ގެ މާނަ އަކީ އަންހެނާ ނުވަތަ އަންހެންމީހާ. މި ކުންފުނީގެ ނަމުގައި ޑަޗް އޮތް ނަމަވެސް މިއީ މެލޭޝިއާގެ ކުންފުންޏެއް. 1960 ގެ އަހަރުތަކުގައި އުފެދުނު މި ކުންފުނި އޭގެ ކުރިން ހިންގަމުން އައީ ޑަޗުންގެ ބައެއް ކަމަށްވޭ. މެލޭޝިއާ ބަޔަކު އެ ކުންފުނި އެމީހުން އަތުން ގަތީކަމަށްވޭ. މިކުންފުނީގެ ނަމަކަށް ޑަޗް ބޭބީ ވެސް ކިޔާފައިވޭ. ނަމަވެސް 1998 އާއި 2000 ވަނަ އަހަރާއި ދޭތެރޭ މި ކުންފުނީގެ ނަން ޑަޗް ލޭޑީ އަށް ވަނީ ބަދަލު ކޮށްފަ. މިއީ އެ ކުންފުނީގެ އަސްލުކަމުގައި ވި ޑަޗުންގެ އެ ކުންފުންޏަށް އިހްތިރާމް ކުރުމުގެ ގޮތުން ދިން ނަމެއް ކަމަށް ވޭ. އަދި މިހާރު ޑަޗް ލޭޑީ އާއި ޑަޗުންގެ ކުންފުންޏަކާއި ކޮންމެވެސް ޒާތެއްގެ ގުޅުމެއް ވޭ. އެއީ ސަބަސިޑަރީ ކުންފުންޏެއްގެ ގުޅުން. އެއްވެސް ހާލެއްގައި މި ކިރަށް ޑަޗް ލޭޑީ އޭ ކިޔުނީ ޑަޗުންގެ އަންހެނަކު ބާލިދީއެއް ޒާތު އެއްޗެއްގައި ކެރި ކިރު ވިއްކަން އުޅުމުންނެއް ނޫން.