ކޮންމެ މީހަކުވެސް އެމީހެއްގެ ދެ ލޮލުގެ ކޮއެ ފަދައިން އެމީހުންގެ ދަރިން ދެކެ ލޯބިވާނެއެވެ. ކޮންމެ މީހަކުވެސް، އޭނާގެ ދަރިންނަކީ ބަސްއަހާ ކިޔަމަންތެރި ދަރިންނަށް ވުމަށް އެދޭނެއެވެ. އެހެން ކަމުން ތިމާގެ ދަރިއަކު ގޯސް މަގަކުން ފިޔަވަޅެއް އަޅައިފިނަމަ، އެ ދަރިއަކާއި މެދު ހަރުކަށިކަމާއި ހިތްހަމަ ނުޖެހުން ފާޅު ކުރެވޭ މަންޒަރު ވަރަށް އާންމުކޮށް ފެނެއެވެ. ދަރިން ބަސް ނޭހުމާއި ވިޔާނުދާ އުޅުންތައް އުޅޭ މައްސަލަތައް އިތުރުވަމުން އަންނާތީ އެކަމުގެ ޝަކުވާކޮށް އަދި ދަރިން ދެކެ ރުޅި އައިސް ކަންކަން ކުރުމުގެ ކުރިން ތިމާގެ ޒިންމާ އެކަމުގައި އޮތް މިންވަރަށް ބަލާލަންވާނެއެވެ. އެހެނީ ތިމާ އަކީ އެ ކުއްޖާގެ މަންމަ ނުވަތަ ބައްޕައެވެ. 

އެއްވެސް ޢާއިލާއެއްގެ އެއްވެސް ދަރިއަކު ގޯސް މަަގަކުން ހިނގާކަށް އެއްވެސް މީހަކު ނޭދޭނެއެވެ. އެއީ އެ ދަރީންދެކެ އިންތިހާއަަށް ލޯބިވާތީއެވެ.

އަނބިދަރިންނަށް ތިމާ ހަރަދު ކުރާ ފައިސާ އަކީ ކިހިނެތް އަދި ކޮންގޮތަކަަށް ތިމާ ހޯދާ ފައިސާއެއްތޯ ބަލަން ވާނެއެވެ. އެހެނީ އަހަރެމެންނަށް ނޭނގި ނަމަވެސް އެ ފައިސާ އަކީ "ހަރާމް" ފައިސާއެއް ނަމަ އޭގެ ނޭދެވޭ އަސަރު ދަރިންނަށް ކުރާނެއެވެ. ކޮންމެވެސް އެއްގޮތަކަށް ކުރާނެއެވެ.

ސަތޭކަ އިންސައްތަ ޙަލާލު ފައިސާއިން ޚަރަދުކޮށްގެން ޢާއިލާ ބެލެހެއްޓި ނަމަވެސް ގޯސްމަގަކުން ދަރިއަކު ހިނގައިދާނެއެވެ. ނަމަވެސް ޢާއިލާއެއްގެ ގިނަ ދަރިން މަގުފުރެދިފައިވާނަމަ އެއީ މައްސަލައެކެވެ. އެކުދިން ބަލައި ބޮޑުކުރަން ފައިސާ ޚަރަދުކުރި ގޮތާއިމެދު ފުންކޮށް ވިސްނާށެވެ! އަނބިދަރިންނަށް ޙަލާލު ތަކެތި ކާންދޭން ޖެހެނީ މި ސަބަބަށްޓަކައެވެ.

ބައެއް މީހުންގެ އާދައަކީ މީހުންނަށް މަކަރުހަދައިގެންނާއި ވައްކަންކޮށްގެން ފައިސާ ހޯދުމެވެ. އަދި ބޮޑެތި އަދަދުތަކުން ފައިސާ ލިބުމުން އެކަން ތަކުރާރުކޮށް އެމަގުން ކުރަމުން ގެންދެއެވެ. އެހެނީ ފައިސާއިން ދުނިޔޭގެ ހިތްހަމަޖެހުން ހޯދެން ހުރި މަގުތައް ގަނެވޭތީއެވެ. ދުނިޔޭގެ ޝަހުވަތްތަކާއި އަރާމާއި ލައްޒަރު ގަނެލެވޭތީއެވެ. މިފަދައިން ކުރާވައްކަންތައް ހީވެސް ނުކުރާހާ ގިނައެވެ. ވަޒީފާއަދާކުރާތަނުން ވައްކަންކުރެއެވެ. ވެރިމީހާއަށާއި ތިމާގެ ދަށުން މަސަައްކަތް ކުރާ މިހުންނަށް މަކަރާއި ޙީލަތް ހަދައެވެ. ކަސްޓަމަރުންނަށް އޮޅުވާލައެވެ. މިފަދަ އެތައް ހީލަތްތަކާއި މަކަރަކުން އެތައް ފައިސާއެއް އަތުލައެވެ. އެ ފައިސާތަކުން ތިމާގެ އަނބިންނަށާއި ދަރިންނަށް ހަރަދުކުރެއެވެ. ކާންދެއެވެ. އަންނައުނު ގަނެދީ ހަދައެވެ. ހިތުގައި ހަމަ އެއްވެސް ބިރުވެރިކަމެއް ނެތީހެއްޔެވެ؟ އީމާން ތެރިކަމޭ މިކިޔާ ކަމުގެ އަސަރެއްވެސް ހިތުގައި ނެތީހެއްޔެވެ؟

ހަރާމްތަކެތި ކައިގެން ގައިގައި ޖަހާ މަހަކީ ނަރަކައަށް ދާނޭ ކަމެއްކަން ޞަޙީޙް ޙަދީޘްފުޅުން އެންމެންނަށްވެސް އެނގޭނެއެވެ. އެކަން ނުއެނގޭ އެންމެ މުސްލިމަކުވެސް ނުހުންނާނޭ ބުނުން ދޮގަކަށް ނުވާނެއެވެ. ބައެއް މީހުންނަށް ހީވަނީ ޙަރާމް ތަކެތި ކެއުމަކީ އޫރު މަސް ކެއުމާއި ބަނގުރާ ބުއިމާއި މަސްތުވާ ތަކެތި ބޭނުން ކުރުން ކަމުގައެވެ. ނަމަވެސް އެއީ އެއްގޮތަކަށްވެސް އެހައި ތިލަކޮށް ނިންމައި ލެވެން އޮތް ކަމެއް ނޫނެވެ. ތިމާއަށް ޙަލާލު ނޫން އެންމެ ވަކިލާރިއެއް ފޮށްޗެއްވެސް ބޭނުން ކުރުމުން އެ ކެވެނީ ހަމަ ޙަރާމް ތަކެއްޗެވެ. ވައްކަމާއި ކޮރަޕްޝަން ފަދަ އަމަލުތައްކޮށްގެން ހޯދާ ކޮންމެ އެއްޗަކީ ޙަރާމް އެއްޗެކެވެ. އެކެވެނީ ޙަރާމް ތަކެއްޗެވެ. މަކަރާ ހީލަތް ހެދުމާއި އޮޅުވާލުމަކީ ކަނޑައެޅިގެން ހަރާމް ކަން ކަމަށްވާއިރު އެފަދަ މަގަކުން ހޯދާ ކޮންމެ އެއްޗެއް ހަރާމް ވާނޭ ކަމާއި މެދު އެއްވެސް ޝައްކެއްނެތެވެ.

ބައެއް މައިންގެ ފަރާތުން ފެންނަ ހުތުރު އަދި ނަޖިސް އަމަލެއް މި ދިވެހި ފަސްގަނޑުންވެސް ފެނެއެވެ. އަތްމަތިދަތިވުމުން ޒިނޭކުރުމާއި ޙަރާމްކަންކަން ކޮށްގެން ފައިސާހޯދައި ޚަރަދުކުރެއެވެ. ދަރިންނަށް ކާން އެދެވެނީ ކަނޑައެޅިގެން ޙަރާމް ތަކެއްޗެވެ.

ބައެއް މީހުންނަށް މަޤާމެއް ލިބުމުން ދައުލަތުގެ ފައިސާއިން ވައްކަންކުރާއިރު މިކުރެވެނީ ކިހައިވަރެއްގެ ކަމެއްކަން ނުވެސް އެނގެނީ ކަމަށްވެދާނެއެވެ. ރައްޔިތުންގެ ފައިސާއިން ވައްކަންކުރުމަކީ ބިރުހުރި ކަމެކެވެ. ޤަމުގައި ތިބި ހުރިހާ ޔަތީމުންގެ ފައިސާވެސް ދައުލަތުގެ ފައިސާގައި ހިމެނޭތީ އެ ބިރުވެރިކަން އިންތިހާއަށް އިތުރުވެއެވެ.

ވީމާ ތިމާގެ ދަރިންނަކީ ﷲ ތަޢާލާއަށް ބިރުވެތިވާ ތެދުވެރި މުސްލިމުންގެ ގޮތުގައި ތަރުބިއްޔަތުކުރަން ބޭނުން ނަމަ ޙަރާމް ގޮތުގައި ފައިސާ ނުހޯދާށެވެ. އެފައިސާއިން އެކުދިންނަށް ކުރާ ޚަރަދުތަކުން ހޯދައިދެވޭ އުފާވެރިކަމަކީ ތިބާ އެންމެ ލޯބިވާ ދަރިން ނަރަކައިގައި އަނދާނެ ދަރަށް ވެދާނެ ކަމަށްޓައެވެ. ބިރުވެތިވާށެވެ. ތިބާގެ އަތުން ތިބާގެ ދަރިންގެ ހަލާކު ނުކުރާށެވެ. ހަލާކުގެ ތެރެއަށް އެއްލައި ނުލާށެވެ.