ދުނިޔޭގައި މިހާތަނަށް ކުރެވުނު އެންމެ ދިގު ބަސް ދަތުރަކީ އިނގިރޭސި ވިލާތުގެ ލަންޑަނުން އިންޑިޔާގެ ކަލްކަތާއަށް ކުރެވުނު ބަސްދަތުރުތައް. 1957 ވަނަ އަހަރު ކުރެވުނު މި ދަތުރުތަކުގައި 12 ގައުމެއް ހުރަސް ކުރޭ. އެއްވެސް ތަނަކަށް މަޑުނުކޮށް ދާ ނަމަ ދަތުރަށް ހޭދަވާނީ 5 ދުވަސް. ނަމަވެސް ގައުމުތަކަށް މަޑުކޮށްފައި އަންނަ ނަމަ މި ދަތުރު 110 ދުވަހަށްވެސް ދިގުދެމިފައި އެބަހުރި. އެންމެ ފުރަތަމަ ބަސް ދަތުރުގައި 20 ފަސިންޖަރުން ދަތުރުކުރި އިރު މީގެ ތެރެއިން 7 ފަސިންޖަރަކު އެނބުރި ލަންޑަނަށް ދިޔަ. ބަސް ދަތުރުގެ އަގަކީ ލަންޑަން ކަލްކަތާ 85 ޕައުންޑް އަދި ކަލްކަތާ ލަންޑަން 65 ޕައުންޑް. މި ބަސް ދަތުރު ކުރާނީ ފްރާންސް، ބެލްޖިއަމް، ވެސްޓް ޖާރމަނީ، އޮސްޓްރިޔާ، އިޓަލީ، ޔުގޮސްލާވިޔާ (އޭރުގެ ނަމުން) ބަލްގޭރިޔާ، ތުރްކީ، އީރާން، އަފްޣާނިސްތާނު، އަދި ޕާކިސްތާނުގެ ތެރެއިން ލާފައި. މިބަހުގައި ފޮތްކިޔުމާއި، ނިދުމުގެ އިތުރުން މިއުޒިކާއި ފަންކާ އަދި ހީޓަރު ވެސް ހުރޭ.