ނޫޑުލްސް ބާގާރ އޭ ބުނުމުން މިއީ ކޮން އެއްޗެއްކަން ނޭނގިދާނެއެވެ. އަދި މިއީ ކިހިނެތް ހުންނަ އެއްޗެއްކަން ވެސް ނޭނގިދާނެއެވެ. ނަމަވެސް މިއީ އަނގަޔަށް މީރު، ތަފާތު ކެއުމެކެވެ. ގޭގައިވެސް މި ކެއުން ތައްޔާރުކޮށްލެވިދާނެއެވެ.
ބޭނުންވާތަކެތި:
. ބަޓަރ
. 1 ފިޔާ (ކޮށާފައި)
. ½ ޓޮމާޓޯ (ކޮށާފައި)
. ކެޕްސިކަމް ( 3 ސަމްސާ އަށް ވާވަރަށް ކޮށާފައި)
. 2 ބީންސް (ކޮށާފައި)
. ކެރެޓް ( 3 ސަމްސާ އަށް ވާވަރަށް ކޮށާފައި)
. ލޮނު (ރަހަލާވަރަށް)
. ¼ ސަމްސާ އަސޭމިރުސް
. ¼ ސަމްސާ ޗިލީ ޕައުޑަރ
. ½ ސަމްސާ ޗިލީ ސޯސް
. ½ ސަމްސާ ވިނެގަރ
. ½ ސަމްސާ އޮރެގާނޯ
. މެޔޮނައިސް
. 1 ލެޓިއުސްފަތް
. 1 ޗީޒް ސްލައިސް
ތައްޔާރުކުރާނެގޮތް:
އެންމެ ފުރަތަމަ އުނދުން މައްޗަށް ތަވާ އުދާލުމަށް ފަހު ބަޓަރުކޮޅު ވިރުވާލާށެވެ. ދެން އޭގެތެރެއަށް ފިޔާ، ޓޮމާޓޯ، ކެޕްސިކަމް، ކެރެޓް، ބީންސް އަޅާފައި އެއްކޮލާށެވެ. ދެން ލޮނު، އަސޭމިރުސް، ޗިލީ ޕައުޑަރ، ޗިލީ ސޯސް، އޮރެގާނޯ އަދި ވިނެގަރ އަޅާލުމަށް ފަހު ރަނގަޅަށް އެއްކޮށްލާށެވެ. އެއަށްފަހު އޭގެތެރެއަށް ފެންފޮދެއް އެޅުމަށްފަހު ނޫޑުލްސް އަޅާލުމަށްފަހު ނޫޑުލްސް ރޯފިލަންދެން މަޑުގިނީގައި ކައްކާލާށެވެ.
ދެން ތަވަޔަކަށް ބަޓަރު ކޮޅެއްލުމަށްފަހު ބާގާރ ބަނަސް މެދުން ކަފާލާ ދެފަޅި ހޫނުކޮށްލާށެވެ. އެއަށްފަހު އެއް ފަޅިޔަށް މެޔޮނައިސް އަދި ކެޗްއަޕް އެއްކޮށްލުމަށްފަހު އުގުޅާލާށެވެ. ދެން އޭގެމައްޗަށް ލެޓިއުސްފަތް އަދި ޗީޒް ސްލައިސް އެއް ލާށެވެ. ދެން ތައްޔާރު ކުރި ނޫޑުލްސް ކޮޅު އަޅާލާ އޭގެމައްޗަށް ފިޔާ އަދި ޓޮމާޓޯ ފޮތިކޮށްފައި އަޅާލާށެވެ. އެއަށްފަހު ބާގާރގެ އަނެއްފަޅި އޭގެ މަތިން ބާއްވާލުވުމުނަ ނޫޑްލްސް ބާގާރ ތައްޔާރުކޮށް ނިމުނީއެވެ.