ދުނިޔޭގައި އިންސާނާ އުޅެމުންދާއިރު، އެކި އެކި ކަންކަމާއި ދިމާވާނެއެވެ. ދަތި އުނދަގޫ އެތައް ކަމަކާއި އުފާވެރި އެތައް ކަމެއް ކުރިމަތިވާނެއެވެ. އުންމީދު ކޮށްގެން ތިބޭ ކަން ކަމާއި އުންމީދު ނުކުރާ، ގަބޫލުކުރަން ދަތި ކިތަންމެ ކަމެއްވެސް ކުރިމަތިވާނެއެވެ. އިންސާނާއަށް އޮތީ މި ހުރިހާ ކަމަކަށްވެސް ނުވަތަ މި ހުރިހާ މިންވަރަކަށްވެސް އީމާންވުމެވެ.
އިންސާނާ އާއި އެކުގައި އުޅޭ، އޭނާ ލޯބިވާ ގާތް މީހެއްގެ ކުއްލި މަރެއްގެ ހަބަރަކީ ހަމަ ގައިމުވެސް އެ އިންސާނަކަށް އަޑުއަހަން ފަސޭހަ ހަބަރަކަށް ނުވާނެއެވެ. އޭނާގެ ސިކުނޑިއަށް ގަބޫލުކުރަން ފަސޭހަ ކަމަކަށްވެސް ނުވާނެއެވެ. އެފަދަ ކޮންމެ ހަބަރަކާއި އެކު އިންސާނާއަށް ކުއްލި ހައިރާން ކަމަކާއި ނަފްސާނީ ޝޮކެއް ލިބެއެވެ. ބޭއިހްތިޔާރުގައި ފެންކަޅިވެއެވެ. ނުރޯން ހިތްވަރު ކުރިޔަސް ރޮވެއެވެ. މިއީ ބަދަލުކުރަން އުޅުނަސް ބަދަލު ނުވާނޭ ކަންކަމެވެ. މިއީ އިންސާނީ ފިތުރަތެވެ. އިންސާނީ ޠަބީއަތެވެ. ނަމަވެސް އިންސާނާއަށް ބަދަލު ކުރެވޭނޭ ކަމެއް އެބަ އޮތެވެ. އެއީ އެފަދަ ހާލަތްތަކުގައި ހައްދުފަހަނައަޅައި ނުދިއުމެވެ. އެފަދަ ލޯބިވާ މީހަކު ނިޔާވުމުން ނުވަތަ އެފަދަ ހިތާމައަކާއި ކުރިމަތިވުމުން ރޮއެ ހޭރުމަކީ އޮތް ކަމެއް ނޫނެވެ. ތަންތަނަށާއި ތަކެއްޗަށް ގެއްލުން ދިނުމަކީ ހައްދުފަހަނައަޅައި ދިއުމެވެ. އަމިއްލަ ނަފްސަށް އަނިޔާވެރިވުން ނުވަތަ އަނިޔާއެއް ދިނުމަކީ ކަނޑައެޅިގެން ހަރާމް ކަންކަމެވެ. މިފަދަ ހުރިހާ ނޭދެވޭ އަމަލު ތަކަކީ އެފަދަ ހާލަތްތަކުގައި އިންސާނާ ކޮންޓުރޯލުކުރަން ޖެހޭ ނުވަތަ ކޮންޓްރޯލުކުރެވެން ޖެހޭނޭ ކަންކަމެވެ. އާދޭހެވެ! ދެރަވެސް ވާނެއެވެ. ރޮވެންވެސް ރޮވޭނެއެވެ. ނަމަވެސް ހައްދެއްގައި ހިފަހައްޓާށެވެ. މިންވަރަށް އީމާންވުމަކީ އެއީއެވެ.
ހަޔާތުގައި ދިމާވާ އެކި އެކި ކަންތައްތަކުގެ އުފާވެރިކަން އިންސާނާއަށް ކުރިމަތިވެދެއެވެ. ހިތްހަމަޖެހުމާއި ހިނިތުންވުން ގެނުވައެވެ. ޝަރަފާ ގަދަރާ މަތިވެއެވެ. އެހެންމީހުންގެ ލޯތްބާއި އަޅާލުން ތިބާ އަށް ލިބެއެވެ. މަގާމުގެ ގޮތުން ގިނަ ބައެއްގެ މައްޗަށް ތިބާއަށް އެރެއެވެ. ފުދޭވަރަކަށް ގިނަ މީހުންނަށް އަމުރުކުރުމުގައި ތިބާ އަށް ހުރެވެއެވެ. މިއީ ހަމަ ޔަގީނުންވެސް އުފާ ކުރެވޭނޭ އަދި ފަހުރުވެރިވެސް ވެވޭނޭ ކަމެކެވެ. ދަންނާށެވެ! މިހާލުގައި ބިމުގައި ބޮޑާވެގަންނަ މީހާއަކީ ގެއްލެނިވެގެންވާ މީހެކެވެ. އޭނާއަށް މިންވަރު ކުރެއްވި އެ ހެޔޮ މިންވަރަށް އީމާންވުމަކީ އޭނާގެ އެދުންތަކާއި އޭނާ ވާ އުފާ މިނެއްގައި ހިފެހެއްޓުމެވެ. އެ ކާމިޔާބީގައި ހިތް ތިރި ނުކޮށް ކިބުރުވެރިކަމާއި ބޮޑާވެރިކަން ދައްކައިފި މީހަކީ އިމުން ނެއްޓިފައި ހުރި މީހެކެވެ. މިފަދަ އުފާވެރި ހާލަތްތަކުގައި އޮތީ ﷲ އަށް ޝުކުރުވެރި ވުމާއި އެކު ހިތްތިރި ކުރުމެވެ. އެހެން މީހުންނަށް އަމުރު ކުރުމުގެ ބާރު ތިބާގެ އަތުގައި އޮތަސް އޯގާތެރި ކަމާއި ލޯތްބާއެކު އެމީހުންނާ މުހާތަބު ކުރުމެވެ. ހަގީގީ ކާމިޔާބުވެރިއަކީ މިއީއެވެ.
ދުނިޔޭގައި ކުރިމަތިވާ ހެވާއި ނުބަޔާއި މިއިން ކޮންމެ މިންވަރަކީވެސް އެ މިންވަރަކަށް އިންސާނާ އީމާންވާން ޖެހޭނޭ މިންވަރެކެވެ. ދުނިޔޭގައި ހަމަ ޖެހޭ ސާދާ ސީދާ ދިރިއުޅުމެއް އުޅެވޭނީ އޭރުންނެވެ. އުޚުރަވީ ހަޔާތުގައި ދާއިމީ ގޮވަތީގައި އަމާންކަން ލިބެނިވި މަގަކީވެސް ހަމަ އެއީއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން