ޤައުމީ ދުވަހަކީ ދިވެހިން ފާހަގަ ކުރަމުންދާ ވަރަށް ޚާއްސަ ދުވަހެކެވެ. މިދުވަހުގެ ހަގީގަތް ދަންނަ މީހުން އަދުގެ ޖީލުގައި ވަރަށްވެސް މަދެވެ. ނަމަވެސް މިއީ ފަނޑުވުމެއް ނުވާނޭ ގޮތެއްގައި ދިވެހިން ހަނދާން ކުރަމުން އައި ދުވަހެކެވެ. ފާހަގަ ކުރަމުން އައި ޤައުމީ ޒިކުރާއެކެވެ.

މީގެ 448 އަހަރު ކުރީގެ ދުވަސްވަރަށް ކަޅިއެއް އެއްލުމުން އަޅުގަނޑުމެންނަށް ފެންނަން އޮތީ އަޅުވެތިކަމުގެ އޮރިޔާންކަމާއި ހައިހޫނު ކަމުގެ ވޭނީ އިހުސާސްތަކެވެ. މި ދެ ހިތްދަތިކަމުގައި ދިވެހިން ބަނދެވިފައި ވީ އިރު އެންމެ ބޮޑު މުސީބާތަކަށް ވެގެން ގޮސްވައިވަނީ އަޅުވެތިކަމުގެ ވިހަގަދަ ވަކިތަކެވެ.

އެދުވަސްވަރު ކަނޑުގެ އެންމެ ބާރުގަދަ ލަޝްކަރު ކަމުގައިވި ކަނޑުގެ ބާޒުންގެ ލަޝްކަރުގެ ކަޅު ހިޔަނި ވަނީ މުޅި ރާއްޖޭގެ މަށްޗަށް އަނދިރިކަން ވެރިކުރުވާފައެވެ. އެ ހިތްދަތިކަމާއި ނާމާން ކަމުން ސަލާމަތް ވާނޭ މަގެއްގެ އިންތިޒާރުގައި ކަރުހިއްކައިގަނެފައި ތިބި ދިވެހިންގެ މޭގަނޑު ބިރުން ވިރެމުން ދެއެވެ.

މީލާދުން 1573 ވަނަ އަހަރުގެ ރަބީޢުލް އައްވަލް މަހުގެ ހަނދު ދިވެހި އުންމަތުގެ އުދަރެހުން ފާޅުވީ ހޯމަ ވިލޭރެއެއްގައޭ ބުނެވެއެވެ. އެރޭގެ މެންދަމުގެ ވަގުތަކީ އަޅުގަނޑުމެން މިއަދު މިދެކޭ ދިވެހި ރާއްޖެ ދިވެހިންނަށް މިލްކުވި ދެވަނަ ވަގުތެވެ. މާތްވެގެންވާ އިސްލާމް ދީނާއި ދިވެހި ޤައުމުގެ ސިޔާދަތު ދެމެހެއްޓުމަށްޓަކައި ދިވެހި ޒުވާނުންކޮޅެއް އަށް އަހަރުވަންދެން، ކެތްތެރިކަމާއި ޙިކުމަތް ވަންތަކަމާއި އެކީ ކުރަމުން ދިޔަ ޖިހާދުގެ ފޮނި ރަހަ ދިން ވަގުތެވެ. އުތީމު ތިންބެއިންގެ މަތިވެރި ޖިހާދުގެ ކާމިޔާބީ މިންވަރު ކުރެއްވި ވަގުތެވެ. ޕޯޗުގީޒުންގެ ލާއިންސާނީ، ލާދީނީ ވިހަގަ ވަކިތަކުގެ ތޫނުކަމުން މި ދީބު ސަލާމަތް ކުރެއްވި ކަމަށްޓަކައި މާތް ﷲ އަށް ހަމްދާއި ޝުކުރު ހުއްޓެވެ. މި މަތިވެރި ޖިހާދުގައި ޝާމިލްވި ހުރިހާ ފަރާތްތަކެއްގެ ފާފަ ފުއްސަވާ ސުވަރުގޭގެ ދާއިމީ ނިއުމަތް މިންވަރު ކުރައްވާށިއެވެ. ތިޔަ އަބުޠާލުންގެ ހަނދާންތަކަކީ ދުވަހަކުވެސް މި ޤައުމުން ފޮހެވޭނޭ ހަނދާން ތަކެއް ނޫނެވެ.

އާދޭހެވެ! ޤައުމިއްޔަތޭ ނުވަތަ ޤައުމީ ރޫހޭ އަޅުގަނޑުމެން ބުނަމުއެވެ. ތަކުރާރުކޮށް ކިޔަމުއެވެ. މީސްމީޑިޔާގައި ހިއްސާވެސް ކުރަމެވެ. ނަމަވެސް ދުލާއި އިނގިލިތަކުގެ ކުރިންނެވެ. މި ބުނުމުގައި އެއްވެސް މާނައެއް ބުރަދަނެއް އެކުލެވިގެން ނުވާ ގޮތެއްގައެވެ. އާދޭހެވެ! ޤައުމިއްޔަތުގެ ހަގީގީ މާނަ މިއަދު ދަންނަނީ ކާކު ހެއްޔެވެ؟ ބައެއް މީހުން މިކަން އެނގެން ބޭނުން ވެސް ނުވަނީއެވެ. ޤައުމީ ދުވަހަކީ ކޮން ދުވަހެއްކަން ވެސް ނުދަނެއެވެ. ނަމަވެސް ރީތި ނަލަ ހެދުމުގައި ދުވަސް ފާހަގަ ކުރެއެވެ. އެކަމެއް ނުވެސް ދަނެ އެކަމެއް ކުރުން ނުވަތަ ފާހަގަކުރަން އަޅެ ފަހެ ތިއައީ މޮޔަ ބައެއް ހެއްޔެވެ؟ ކުރާނެ ކަމެއް ނެތެވެ. އަދުގެ ޖީލުގެ ހާލަކީ މިއީއެވެ.

މިއީ މިއަދު ވިސްނަން ޖެހިފައިވާ ވަރަށް ބޮޑު ކަމެކެވެ. އިހުމާލު ވެވެން ނެތް ކަމެކެވެ. ފަރުވާ ކުޑަކޮށްފިނަމަ ޤައުމީ ދުވަހަކީ ފާހަގަވެސް ނުކުރާނޭ ދުވަހަކަށް ވެގެން ހިނގައިދާނެ ކަމުގެ ބިރު ހީވާން ފަށައިފިއެވެ. މިފަދަ ދުވަސްތަކަކީ ކޮން ދުވަހެއް ކަމާއި މިފަދަ ދުވަސްތަކުގައި ޤައުމީ ރޫހާއި ހިތުގައި ޤައުމަށް އޮންނަ ލޯތްބާއި ޝުއޫރު ކެކި އުތުރެން ވާނެއެވެ. ނަމަވެސް މިކަން ދަންނަނީ ކާކުހެއްޔެވެ؟ މި ދުވަސްތަކުގެ ހަގީގަތާއި މިދުވަސްތަކުން ލިބިގަންނަ އިބުރަތާއި ފިލާވަޅަކީ މަދަރުސާ ތަކުގައި ބުނެދެވި ކުދީންގެ ދިރިއުޅުމުގައި ބޭނުން ކުރާ ކަންކަމަށް ވާނަމަ، މިފަދަ ދުވަހެއް ޤައުމަށް އައުމަކީ ޤައުމަށް، ޤައުމީ އީދެއް އައުން ފަދަ ކަމަކަށް ވެގެން ހިނގައިދާނެއެވެ. މިފަދަ ކޮންމެ ދުވަހަކުންވެސް އަހަރެމެން ދަސްކުރަންވީ ފިލާވަޅުތަކެއް ވާނެއެވެ.

ރީތި ހެދުމަކާއި ވަސްގަނދަ ސެންޓެއް ޖެހުމުގެ ބަދަލުގައި މިއީ ކޮންދުވަހެއްތޯ ހޯދާ ބަލާ ދެނެގަތުން މާ މުހިންމެވެ. މިއަދު ކޮންމެ ދިވެއްސަކުވެސް ޤައުމުދެކެ އިރުތަށް ލޯބިވާން އައު އަޒުމެއް ކަނޑައަޅަން އެބަޖެހެއެވެ. ޤައުމީ ޝުއޫރު ހިތުގައި ރަނގަޅަށް ހިއްޕާލަން އެބަޖެހެއެވެ. މިދުވަސް ނިސްބަތްވެ ވަޑައިގަންނަވާ އުތީމު ތިންބެއިންނާއި އެ ޖިހާދުގައި ބައިވެރިވި އެންމެން އެ ދެއްކެވި ޤައުމީ ރޫހު މިއަދު ނެރެން އެބަޖެހެއެވެ. މިނިވަންކަމުގެ ފިނި ހިޔާ ދޫކޮށް އަޅުވެތި ކަމުގެ ދިލަ ހޫނަށް ދެނެއް ދިވެހިން ދިޔަ ނުދޭނަމޭ ކޮންމެ ދިވެހި ދަރިއަކު ބުނަން އެބަޖެހެއެވެ. ޤައުމު ރަމްޒުވާ ކޮންމެ ކަމެއްގައި އެކަމެއްގެ އެންމެ ކުރިން ތިމަންނާ ފެންނާނަމޭ ބުނަން އެބަ ޖެހެއެވެ. 

ނަސީބު ކަންދިމާކުރި ގޮތުން މިދުވަސްވަރަކީ ދިވެހި ޤައުމީ ފުޓުބޯޅަ ޓީމު ސާފް ޗެމްޕިއަންޝިޕުގައި ވާދަކުރަމުންދާ ދުވަސްވަރެވެ. މިއީ މިފަދަ ޤައުމީރޫހެއް ދިވެހިން ނެރެންޖެހޭނެ ވަގުތެވެ. ކޮންމެހެން ކަނޑި ބަޑީގެ ހަނގުރާމަ ތަކުގައި އުތުރޭ އެއްޗަކަށް ޤައުމީ ޖޯޝު ވާނަމަ އެއީ އަދި މުޅިއަކުން ޤައުމީ ޖޯޝެއް ނޫނެވެ. ޤައުމު ތަމްސީލުވާ ކޮންމެ ކަމެއްގައި އެ ޝުއޫރާއި ޖޯޝު އުތުރެން ވާނެއެވެ. އަހުރެންވަންތަ ކަން ދޫކޮށްލާ އަހުރެމެން ވަންތަކަން އިސްކުރަން ވާނެއެވެ. ޤައުމީ ދުވަހެއް ފާހަގަކޮށް ނިމިގެން ދާއިރު، މިފަދަ ފިލާވަޅެއް ދަސްނުވާ ނަމަ އެއީ ކަނޑުކޮހެއް ކަހަލަ މީހެކެވެ.