ދުނިޔޭގެ ޤުދުރަތީ މާހައުލާއި އިންސާނާ ވަނީ ގުޅި ލާމެހިފައެވެ. މާތް ﷲ ދުނިޔޭގައި ޤުދުރަތްތެރިކަމުގެ އެތައް ފުރިހަމަ މިސާލުތަކެއް ވަނީ ލައްވާފައެވެ. މި ހުރިހާ ނިއުމަތްތަކަކީ މި އިންސާނާގެ ހިތްހަމަ ޖެހުމާއި ދިރިހުރުމަށް ލައްވާފައިވާ ނިއުމަތްެތަކެކެވެ. ވީއިރު މި ޤުދުރަތްތެރިކަމާ ބީރައްޓެހި އިންސާނާގެ އަތްތަކުން އުފައްދާފައިވާ އެކި ޒާތް ޒާތުގެ މެޝިންތަކަކީ ހަގީގަތުގައި އިންސާނާއަށް އުފާވެރިކަމަށްވުރެ ބޮޑަށް މާޔޫސް ކަމާއި ހިތާމަ ގެނުވާނޭ އެއްޗެއްސެވެ.
އިންސާނާ ފުރިހަމަ ސިއްހަތެއްގައި ހުރުމަށްޓަކައި އޭނާގެ ޖިސްމާނީ ދުޅަހެޔޮކަމާއި ނަފްސާނީ ދުޅަހެޔޮކަން އިންތިހާއަށް ބޭނުންވެއެވެ. މި ދެކަންތައް ފުރިހަމަ ނުވާ މީހެއް ނަމަ އޭނާގެ ސިއްހަތު ފުރިހަމައެއް ނުވަތަ ދުޅަހެޔޮކޮށެއް ނުހުންނާނެއެވެ. މި ދެކަންތަކުން ކުރެ އިންސާނާ ފަރުވާ ކުޑަ ކުރާ އެއް ކަމަކީ އޭނާގެ ނަފްސާނީ ދުޅަހެޔޮކަމެވެ. މިއަދު ކާރޫބާރޫ ބޮޑު، ގަނަތެޅެން ޖެހިފައިވާ ދިރިއުޅުމުގައި އިންސާނާގެ ޖިސްމާނީ ފުދުންތެރިކަން ހުރިވަރަކަށް އިންސާނާ މަސައްކަތް ކުރަމުންދެއެވެ. ނަފްސާނީ ދުޅަހެޔޮކަމުގެ މަތިން ހަނދާން ނައްތާލެވެއެވެ. މި ދުނިޔޭގައި އިންސާނާ ކުރާ ހަމަ އެކަނި ކަމަކީ ވަޒީފާ އަދާކުރުން ކަމުގައި ދެކި، އުޑެއް އަދި ބިމެއް ވާކަން ހަނދާންނައްތާލާ، ހަތަރު ފާރުގެ ތެރޭގައި ވަގުތުތައް ހޭދަކުރަމުން އެބަ ދެއެވެ. މިއީ ހަގީގަތުގައި ހިތާމަ ހުރި ކަމެކެވެ. އެހެނީ މިއީ އިންސާނާގެ ނަފްސާނީ ދުޅަހެޔޮކަމަށް ނޭދެވޭ އަސަރެއް ކުރުވާނޭ ކަމެކެވެ.
ހިތްހަމަ ޖެހުމާއި އުފާވެރި ކަމަކީ ނަފްސާނީ ދުޅަހެޔޮކަމެއްގެ އެންމެ އަސާސީ ކާނާއެވެ. ނަމަވެސް މި އުފާވެރި ކަމާއި ހިތްހަމަ ޖެހުން ޤުރުބާން ކޮށް ފައިސާގެ ބޭނުމުގައި ކެނޑި ނޭޅި މަސައްކަތް ކުރެވެއެވެ. އެހެނީ އެ ފައިސާއިން އުފާވެރިކަން ހާސިލު ކުރެވޭނޭ ހިތާއެވެ. އިންސާނާގެ ހިތްހަމަ ޖެހުމަށްޓަކައި ޤުދުރަތީ ގޮތުން ދުނިޔޭގައި ލައްވާފައިވާ ތަކެއްޗާއި ތަންތަނަކީ ހަގީގީ ހިތްހަމަ ޖެހުން އިންސާނާއަށް ގެނުވާނޭ ތަކެއްޗާއި ތަންތަނެވެ. އުފާވެރި ކަމަކީ ފައިސާއެއް ނޫނެވެ. އަދި ފައިސާއަކުން ހަގީގީ އުފާވެރިކަމެއް ނުވެސް ގަނެވޭނޭމެއެވެ.
އިސްވެ ދެންނެވުނު ފަދައިން އުފާވެރި ކަމެއް ހިތްހަމަ ޖެހުމެއް ނެތް މީހަކީ ނަފްސާނީ ގޮތުން ބަލި މީހެކެވެ. މި އުފާވެރިކަމަށްޓަކައި ޤުދުރަތީ މާހައުލެއްގައި ހިތްގައިމު ކޮށްލުން ވަރަށްވެސް މުހިންމެވެ. ތިބާ ލޯބިވާ މީހުންނާއި އެކީ ވަގުތު ހޭދަކުރުން ވަރަށްވެސް މުހިންމެވެ. ހެލިފެލިވެ އުޅެލާ ކުޅިވަރެއް ކުޅެލާ ހީލާ ސަމާސާކޮށްލަން ޖެހެއެވެ. އިރު އަރާ މަންޒަރު ހަމަ ލޮލުން ދެކިލަން އެބަ ޖެހެއެވެ. ސާފު ވައިން ނޭވާލާން އެބަ ޖެހެއެވެ. ގޮނޑުދޮށަށް ރާޅު ބީހިލާ އަޑު އަހާލާ އެ މަންޒަރު ދެކެން އެބަ ޖެހެއެވެ. ޖައްވުގައި އުދުހޭ ދޫނިތަށް އެކި ރާގަށް ގޮވާލާ އަޑު އަހަން އެބަ ޖެހެއެވެ. މޫދުގައި މަސް ދުވާ މަންޒަރު ދެކެން އެބަ ޖެހެއެވެ. މައިންބަފައިންނާއި އެކީ ގިނަ ވަގުތު ހޭދަކުރަން އެބަ ޖެހެއެވެ. ލޯބިވާ އަނބިމީހާ ނުވަތަ ފިރިމީހާ އާއި އެކު އުފާވެރި ވަގުތުތަށް އިތުރުކުރަން އެބަ ޖެހެއެވެ. ދަރިންގެ ކޮލުގައި ބޮސްދީ ބައްދާލުންތައް އިތުރުކުރަން ޖެހެއެވެ. އާއިލީ ކެއުންތައް ގިނަ ކޮށް ގުޅުންތައް ބަދަހި ކުރަން އެބަޖެހެއެވެ.
މިއީ ހައްތަހާވެސް ނަފްސާނީ ދުޅަހެޔޮކަމަށް ކުރެވިދާނެ އާދައިގެ ކުދި ކުދި ކަންތައްތަކެކެވެ. ހިތްހަމަ ޖެހުމާއި އުފަވެރިކަމަކީ ނަފްސާނީ ދުޅަހެޔޮކަމުގެ ތަޅުދަނޑިއެވެ. އެކުވެރި ބަދަހި، ޤުދުރަތީ ރީތި މާހައުލު ތަކަކީ ހިތްހަމަޖެހުމާއި އުފާވެެރި ކަމުގެ ތަޅުދަނޑިއެވެ.