ގައުގަނޑެއް ރަނުން ގިރިޓީ ކުރިޔަސް އެ ގައުގަނޑެއް ރަންގަނޑަކަށް ވާނޭ ގޮތީ ހަމަ ނެތް ގޮތެކެވެ. އާދޭހެވެ. ދަންނަވަން މިއުޅެނީ މީހުންގެ ލޯމަށްޗަށް އެއީ މޮޅު ހުނަރުވެރި ހަރުދަނާ މީހެއް ކަމުގައި ފެނުނަސް އެމީހާގެ އެތެރޭގައި ވާ އެއްޗެއް ނެރެ ދައްކާލުމުން ނޫނީ އެ މީހެއްގެ އެ ބުނާ މޮޅުކަމެއް ނުވަތަ ހަރުދަނާކަމެެއް ހާމައެއް ނުވާނެއެވެ.

މުޖުތަމައުގައި އެކި ދާއިރާތަކުން މަޝްހޫރު މީހުންނާއި އެކި ކަންކަމުގައި މަޤުބޫލު މީހުން އުޅެއެވެ. އެއީ ޓީޗަރަކަށް ވިޔަސް، ޑަކްޓަރަކަށް ވިޔަސް، ޤާނޫނީ ވަކީލަކަށް ވިޔަސް، ލަވަކިޔުންތެރިއަކަށް ވިޔަސް، ފުޓުބޯޅަ ކުޅުންތެރި އަކަށް ވިޔަސް އަދި މަސްވެރި ދަނޑުވެރި އަކަށް ވިޔަސް މެއެވެ. އެމީހެއް ކުޅަ ކަމަކުން ނުވަތަ އެމީހަކު ފާހަގަކޮށްލެވޭ ކަމަކުން އެމީހަކު ކުރިއަރައިގެން ގޮސް އެމީހަކީ މުޖުުތަމައިގައި މަޤުބޫލު މީހަކަށްވެ، މީހުންގެ މަޝްހޫރުކަން އެމީހަކަށް ލިބުމަކީ އެމީހާގެ އަގު އަދި ވަޒަން ކުރެވޭނޭ ކަމެއް ނޫނެވެ.

އިސްވެ ދެންނެވުނު ފަދައިން ގިރިޓީކޮށްފައި ހުރި ކުލައެއް ނޫން އެނޫން އެއްޗެއް އަހަރެމެން އިންސާނުންނަކަށް ނުފެންނާނެއެވެ. ހުނަރުވެރި ޓީޗަރަކު އޭނާގެ ދަރިވަރުންނާއި މެދު ކުދި ކިޔާނަމަ އެއީ ހުނަރުވެރި މީހެއް ނޫނެވެ. އޯގާތެރި ޑަކްޓަރަކު އޭނާގެ ބަލި މީހުންނަށް ހިނިތުންވުމެއް ދެއްކި ނަމަވެސް އެނބުރި ފުރަގަސްދީ މުސީބާތަށް ގޮވާނަމަ އެއީ އޯގާތެރި ޑަކްޓަރެއް ނޫނެވެ. ފަނޑިޔާރު މަނިކުފާނުގެ އަރިހުގައި ތަޖުވީދު މަގުން ވަކާލާތުކޮށް، ކޯޓުން ބޭރުގައި ފައިސާގެ ދަޅައަށް ބެލޭނަމަ އެއީ ހަލާކެއްގައިވާ ޤާނޫނީ ވަކީލެކެވެ. ރީތި މަޚްރަޖުން ލަވަ ކީ ނަމަވެސް އާންމުގެ ތެރޭގައި ހެއްދެވި ނުހެއްދެވިއަށް ގޮވޭނަމަ އެއީ ހުނަރުވެރި ލަވަ ކިޔުންތެރިއެއްވެސް ނޫނެވެ. ރީތިކޮށް ކޮށްޓާ ނައްޓާފަ ގޯލު ޖެހިޔަސް، ދަނޑުމަތީ ރުޅި ކޮންޓުރޯލު ނުވާނަމަ އެއީ ހުނަރުވެރި ފުޓުބޯޅަ ކުޅުން ތެރިއެއްވެސް ނޫނެވެ. މިހެން ގޮސް ދެއްކިދާނެ ކިތަންމެ މިސާލުތަކެއް އެބަ ހުއްޓެވެ.

މި ދެންނެވުނު ވާހަކަތައް ކުރު ހުލާސާއަކުން ބުނެދޭނެމަ ބުނެދެވޭނީ ކިތަންމެ މޮޅަސް، ތިބާގެ ކިބައިގައި އުޅުމެއް ނުވަތަ ރީތި އަހުލާގެއް ނެތްނަމަ، ރީތި އަދަބަކާއި ސުލޫކެއް ނެތްނަމަ ތިބާއީ ހަގީގަތުގައި ތިބާ ހީކުރާ ކަހަލަ މޮޅު މީހެއް ނޫނެވެ. ރަނުން ގިރިޓީ ކުރިއަސް ގައުގަނޑެއް ރަންގަނޑަކަށް ވާނޭގޮތީ ހަމަ ނެތް ގޮތެކެވެ.