ކުޅި މިރުހަކީ ދިވެހިންގެ ސުފުރާމަތި ފަޅުފިލުވާލުމަށް ޓަކައި ވަރަށް މުހިންމު ދައުރެއް އަދާ ކުރާއެއްޗެކޭ ބުނުމުން ދޮގަކަށް ނުވާނެ. ނަމަވެސް މިއަދު ދައްކަން މިއުޅެނީ ދިވެހި ގިތެޔޮ މިރުހުގެ ވާހަކަ ނޫނީ ކަޑޫދޫ މިރުހުގެ ވާހަކަ އެއްވެސް ނޫން. މިފަހަރު މި ބަލައިލަނީ ދުނިޔޭގެ އެންމެ ކުޅި ގަދަ މިރުހުގެ ގޮތުގައި މިހާތަނަށް ފާހަގަ ކުރެވިފިއިވާ "ޑްރެގަންސް ބްރެތް" ގެ ނަމުން ނަން ދެވިފައިވާ  މިރުހަށް. މި މިރުހަމީ އިނގިރޭސި ވިލާތުގައި "ޓޮމް ސްމިތްސް ޕްލާންޓްސް" ގެ އޯނަރު "މައިކު ސްމިތް" ޔުނިވަރ އޮފް ނޮޓިންގހަމްގެ ރިސަރޗަރުންނާއި އެކު ތަހުލީލެއްގެ ގޮތުގައި މުޑުވަށް ކޮށްގެން އުފައްދާ ފައިވާ މިރުހެއް. މި މިރުހަކީ މީގެ ކުޅި ރަހަޔާއި އެއްވަރަށް އެހާމެ ނުރައްކާތެރި އެއްޗެއް. މީގެ މިރުހެއް ކައިފިނަމަ މިހާ "އެނަފިލިޓިކް ޝޮކަކަށް" ގޮސް ވައިނޮޅި ދިލައިގެ ސަބަބުން ބަންދުވެ ހަލާކުވެ ނޭވާ ނުލެވި މަރުވުންވެސް އެކަށީގެންވޭ. " މައިކް ސްމިތް" ހާމަ ކޮށްފައިވާ ގޮތުގަގި މީގެ މިރުސް ކޮޅެއް އޭނާ ދުލުކުރީގައި ޖައްސާލުމުން ދިލަނަގާ ވަރުން ކެއްވެސް ނުވި. ދުނިޔޭގެ އެންމެ ކުޅި މިރުހުގެ ގޮތުގައި ފާހަގަ ކުރެވިފައިވާ "ކެރޮލީނާ ރީޕަރ" މިރުހުން 1.6 މިލިއަން ހީޓް ޔުނިޓް އުފައްދާކަމަށް ސްކޯވީލް ސްކޭލްއިން ދައްކާ އިރު "ޑްރެގަންސް ބްރެތް" މިރުހުން 2.48 މިލިއަން ހީޓް ޔުނިޓް އުފައްދާ. (ސްކޯވީލް ސްކޭލް އަކީ ކެޕްސޭސިން  ނުވަތަ އިންސާނާއަށް ކުޅި އެއްޗެއް ކެވުމުން އޭގެ ދިލައާއި އިހުސާސް ކުރުވުމަށް ހަށިގަނޑުން  އުފައްދާ ކެމިކަލް މިން ކުރުމަށް ބޭނުން ކުރާ މިންގަޑަށް ދެވިފައިވާ ނަމެއް.) ދެން އުފެދޭނެ ސުވާލަކީ އިންސާނުން ކެއުމަށް މި މިރުހުގެ ބޭނުން ނުކުރެވޭނެ ނަމަ މިކަހަލަ ބާވަތެއް މުޑުވަށްކޮށް އުފެއްދުމުގެ ބޭނުމަކީ ކޮބައިބާއޭ؟ .މި ސުވާލުގެ ޖަވާބަކީ މި މިރުހަކީ  އާންމުކޮށް އައްސިކުރުމަށް ބޭނުން ކުރާ ބޭސްތަކަށް އެލަރޖިކް ވުން ފަދަ ހާލަތް ތަކުގައި ސިއްހީގޮތުން ދެވޭ ބައެއް ފަރުވާ ތަކުގައި ހަންގަނޑު އައްސިކޮށްލުމަށް ބޭނުން ކުރެވޭ
މާއްދާއެއްގެ ގޮތުގައި ބޭނުން ކުރުމަށް އުފައްދާފައިވާ މިރުހެއް. މި މިރުސް އެއްވެސް ހާލަތެއަގި ބޭނުން ކުރާނަމަ އަނގަޔާއި ނޭފަތާއި އަތް އަދި މުޅި މީހާވެސް ރައްކާތެރިކޮށް ބަހައްޓައިގެން ނޫން ގޮތަކަށް ބޭނުން ކޮށްފިނަމަ ނަގާ ދިލައިގެ ސަބަބުން ސިއްހީ ފަރުވާ ހޯދަަން ޖެހި، ފުރާނަޔަށް ނުރައްކާާވާ ހިސާބަށް ގޮސްދާނެ.