އިންސާނާއަކީ އޭނާގެ ދިރިއުޅުމުގައި ވަރަށްވެސް ގިނަ ގޯސްތައް ހެދޭނޭ މީހެކެވެ. މިއީ ހިތި ނަމަވެސް ގަބޫލު ކުރަންޖެހޭ ހަގީގަތެކެވެ. ދުނިޔޭގެ ހަޔާތުގައި އިންސާނާ އުޅެމުން، ވަގުތު ހޭދަކުރަމުން ދާ ވަރަކަށް އޭނާ އަށް ކުރެވޭ ކުށްތަކާއި ހެދޭ ގޯސްތައް ދާނީ އިތުރުވަމުންނެވެ. ހަމަ އެގޮތަށް އިންސާނާއަކީ ހަނދާންނެތުން ގިނަ މީހެކެވެ. އެއީ އިންސާނަކަށް ވީތީ ހުންނަންވެސް ޖެހޭނޭ ސިފައެކެވެ. އެކަމުގައި އެއްވެސް މައްސަލައެއް ނެތެވެ. އިންސާނާ، އެއްޗެއް ނުވަތަ ކަމެއް ހަނދާން ނެތުމުން އެ އިންސާނަކު ބަދުނާމުކޮށް ފަޟީހަތް ކުރުމަކީ އަމުދުން އެންމެ ރަނގަޅުކަމެއް ނޫނެވެ. ހަނދާން ނެތުމަކީ އާދައިގެ ކަމެއް ކަމަށް ދެކެން އެބަޖެހެއެވެ. އެހެނީ އެއީ އިންސާނީ ޠަބީއަތްކަން ދަސްކުރަން ޖެހޭނެއެވެ.

މާތް ﷲ، އެންމެ ފުރަތަމަ އިންސާނާ، އާދަމްގެފާނު ހައްދަވާ އެކަލޭގެފާނުގެ އަރިކަށިފުޅުން ހައްވާގެފާނު ހައްދަވާ، ސުވަރުގޭގައި ލެއްވިއެވެ. އަދި ވަކި ގަހަކުން ފަރީއްކުޅު ނުވާން އަމުރުކުރެއްވިއެވެ. ނަމަވެސް ޝައިޠާނާގެ ވަސްވާހުގައި ޖެހި އެކަލާންގެ އަމުރުފުޅުމަތީން ހަނދާންނެތި އެގަހުން ފަރީއްކުޅުވުމުން އެކަލާނގެ، އިންސާނާ ދުނިޔޭގެ ބިމަށް ފޮނުއްވެވިއެވެ. މިކަމުން ދަލީލުކޮށްދެނީ އިންސާނާ ހަނދާނެތިދާނޭ ކަމެވެ.

ޢިލްމުވެރިން ވިދާޅުވާގޮތުގައި "އިންސާން" މި ބަސް އުފެދިގެން އައީ "ނަސިޔަ" ނުވަތަ "ނަސައު" މިބަހުންނެވެ. "ނަސިޔަ" ނުވަތަ "ނަސައު" މިބަހުގެ މާނައަކީ ހަނދާންނެތުމެވެ. މި ބަހުން އިންސާނާގެ ނަން ފެށިފައި ވުމުން ނުވަތަ އުފެދިފައިވުމުން ލިބިގަންނަންވީ ފިލާވަޅަކީ އިންސާނާއާއި ހަނދާން ނެތުމާއި ހުރިގުޅުމެވެ.

އިސްލާމްދީނުގެ އެެއް ރުކުން ކަމުގައިވާ ދީނުގެ ތަނބު ނުވަތަ ނަމާދަކީ ކޮންމެ ދުވަހަކު ފަސްވަގުތު ކުރުމަށް އަމުރުވެވިގެންވާ ވާޖިބެކެވެ. ތަކުރާތުކޮށް އާދަވެ ކުރެވޭ މި އަޅުކަމުގައިވެސް އޭގެ ވަގުތުން ފަސްކުޅައުމަށް އޮތް އުޒުރެއްގެ ގޮތުގައި ހަނދާންނެތުން ވަނީ ލައްވާފައެވެ. އެހެންކަމުން ޚާލިޤުވަންތަ އިލާހު މިފަދަ ހައިބަތުބޮޑު އަޅުކަމެއްގައި މިފަދައިން ހަނދާންނެތުން އުޒުރެއް ކަމުގައި ލައްވާފައިވުމީ، އިންސާނާ ހަނދާންނެތުމަކީ އިންސާނަކަށްވީތީ ވާނޭކަމެއްކަން ހާމަވާނޭ ކަމެކެވެ. މާތް ﷲ ގެ މިފަދަ މަތިވެރި އަމުރުފުޅެއް ނުވަތަ ވާޖިބެއްގެ މަތިން އިންސާނާ ހަނދާން ނެތޭއިރު، އިންސާނަކު ބުނާ ވާހަކައެއް ނުވަތަ ކުރަން ބުނާ ކަމެއް ހަނދާންނެތުން އިންސާނާގެ މައްޗަށް މާ އައުލާކަން ބޮޑެވެ.

މިކަންކަން މިހެން ތަރުތީބުވެފައިވުމުން، އިންސާނަކު ކަމެއް ނުވަތަ އެއްޗެއް ހަނދާންނެތުމުން އެ އިންސާނަކަށް ބަދުބަސްބުނެ އޭނާ ދެރަކޮށް ނިކަމެތިކުރުމެއް ނުވެއެވެ. އާދޭހެވެ! އާދަވެ ހަނދާން ނެތޭނަމަ އެއީ އިސްލާހުކުރަންޖެހޭނޭ އަމަލެކެވެ. ނަމަވެސް ކަންކަމަށް ފަރުވާތެރި، ފަރުވާ ބަހައްޓާ މީހަކު ހަނދާން ނެތުމަކީ އަމުދަކުން ގޯސްކަމެއް ނޫނެވެ. އެއީ ވަރަށްވެސް އާދައިގެ ކަމެކެވެ. ކިތަންމެ ކަންކަމަށް ފަރުވާތެރި މީހަކުވެސް ހަނދާން ނެތޭނޭކަން ޤަބޫލުކުރަން ޖެހޭނެއެވެ. ހަނދާންކޮށްދިނުމަކީ މުސްލިމުތަކުންނަށް ފައިދާ ހުރިކަމެއްކަމަށް އަންގަވާފައިވަނީވެސް ހަމަ މި ސަބަބަށްޓަކައެވެ.

ދަންނާށެވެ. މީހަކު، ކަމެއް ނުވަތަ އެއްޗެއްގެ މަތިން ހަނދާންނެތިދާނޭ ކިތަންމެ ކިތަންމެ ސަބަބެއް ދުނިޔޭގެ ތަމާޝާގައި އެކުލެވިގެން ވާނެކަން ޔަގީނެވެ. އެހެންކަމުން އެފަދަ ހާލަތެއްކައި އެކަމަކަށް ރިއާޔަތްނުކޮށް އެއްވެސް ގޮތެއް ނިންމުމަކީ އިންސާނަކު ކޮށްގެން ވާނޭ ކަމެއް ނޫނެވެ. އެހެނީ ތިއީވެސް، އަދި އެއީވެސް އާދަމުގެ ދަރީންނެވެ.

އިންސާނާ ހަނދާން ނުނެތޭނަމަ، އޭނާގެ ކިބައިގައި އިންސާނީ ސިފައެއް އުނީވީ ކަމުގައި ބުނެވިދާނެއެވެ. އެހެނީ ހަނދާންނެތުމުގެ ސިފަ އަކީ އިންސާނާއާއި އެހާމެ ބޮޑަށް ގުޅި ފަލަސްވެފައިވާ، އިންސާނާގެ އާންމު އަދި އާދައިގެ ކަމެކެވެ.