ކިނބިއްސަކީ ނޭފަތަށް ނުވަތަ ފުއްޕާމެއަށް ނުގުޅޭ އެއްޗެއް ނުވަތަ ކުނޑިއެއް ނުވަތަ ވަހެއް ނުވަތަ އެނޫންވެސް އެފަދަ އެއްޗެއް ދިއުމުގެ ސަބަބުން ސިކުނޑިން ފޮނުވައިދޭ މެސެޖެއްގެ ސަބަބުން ހިނގާ، ބޭއިހްތިޔާރީ ހަރަކާތެއް. މިއީ އިސްވެ ދެންނެވުނު ނުގުޅޭ އެ އެއްޗެއް ހަށިގަނޑުން ބޭރުކޮށްލުމަށް ޤުދުރަތީ ގޮތުން ލައްވާފައިވާ ވަރަށް ފުރިހަމަ ނިޒާމެއް. އެއްބައިމީހުން ކުރުކޮށް ކިނބިހި އަޅާފާނެ. އަނެއްބަޔަކު އަޑުބާރުކޮށް ކިނބިހި އަޅާފާނެ. އެއްބަޔަކު ކިނބިހި ހިފައްޓަފާނެ. އަނެއްބަޔަކަށް ކިނބިހި ހުއްޓުވަން އުޅުނަސް ކިނބިހި ނުހުއްޓިދާނެ. އެކި މީހުން ކިނބިހި އަޅަނީ ނުވަތަ އެޅެނީ އެކި ގޮތައް. ނަމަވެސް ޖެއްސުމަށް އަޑުބާރުކޮށް ކިނބިހި އަޅާމީހުންވެސް އުޅޭ. އެހެނަސް ކޮންމެ މީހަކަށްވެސް އާދަވެ ކިނބިހި އެޅޭ ގޮތަކީ އެމީހެއްގެ އިހްތިޔާރުގައި ވާކަމެއް ނޫން. ކޮންމެ މީހަކަށްވެސް އެމީހަކު ކިނބިހި އެޅޭނޭ ވަކި ހާއްސަގޮތެއް ވޭ. ގިނަފަހަރަށް މިއީ އާއިލާގެ ފަރާތުން ވާރުތަ ކުރާކަމެއް. ނުވަތަ ޖެނެޓިކްސްގެ ސަބަބުން ވާރުތަވާ ކަމެއް. މިކަމާއި ބެހޭގޮތުން މަޝްހޫރު ޑަކްޓަރު ކާއޯ ވިދާޅުވެފައިވަނީ ކިނބިހި އެޅުމަކީ އިންސާނާ ދަސްކުރާކަމެއް ނޫން ކަމަށާއި އެއީ އުފެދުމުގައި ހުންނަ ކަމެއް ކަމަށް. އެހެންކަމުން އެއީ ޖެނެޓިކަލީ ވާރުތަ ކުރާ ކަމެއް ކަމަށްވެސް އޭނާ ވަނީ ވިދާޅުވެފަ.