އިންސާނާއަށް ބޭނުންވާ ފައިދާހުރި މާއްދާތަކުގެ ތެރެއިން ދަގަނޑުގެ ބާވަތަކީ ވަރަށްވެސް މުހިންމު ބާވަތެކެވެ. ހަށިގަނޑުގައި ހުންނަ ލޭގެ ހަތާތައް (ސެލްތައް) އުފެދުމުގައި ދަގަނޑު އަދާކުރަނީ ވަރަށްވެސް މުހިންމު އަދި އެހާމެ ބޮޑު ދައުރެކެވެ. އެހެންކަމުން އިންސާނާގެ ހަށިގަނޑަށް ބޭނުންވާ މިންވަރަށް ދަގަނޑުގެ މާއްދާ ލިބޭތޯ ކަށަވަރުކުރަން ޖެހޭނެއެވެ.
ހަށިގަނޑަށް ބޭނުންވާ ދަގަނޑުގެ މިންވަރު ހޯދުމަށް އިންސާނާ ކާ ކެއުމުގައި ދަގަނޑުގެ މާއްދާ ހިމެނުން މުހިންމެވެ. ނަމަވެސް ވިސްނަން ޖެހޭ ވަރަށްމުހިންމު ކަމެއް އެބަ އޮތެވެ. އެއީ ދަގަނޑުގެ މާއްދާ އެކުލެވޭ ކާނާ އެކަނި ކައިގެން ނުފުދޭނެކަމެވެ. އެހެނީ ދަގަނޑު އޭގެ ޒާތުގައި ހަށިގަނޑުގެ ތެރެއަށް ނުވަތަ ލޭގެ ތެރެއަށް ނެގުމުގައި ލަސްކަމެއް އުޅޭތީއެވެ.
އިންސާނާ ކާ ކެއުމުގައި ހުންނަ ދަގަނޑުގެ މާއްދާ، ލޭގެ ތެރެއަށް ނެގުމުގައި އެންމެ މުހިންމު ދައުރެއް އަދާ ކުރަނީ ވިޓަމިން ސީ އެވެ. އެހެންކަމުން ދަގަނޑުގެ މާއްދާ އެކުލެވޭ ކެއުން ނުވަތަ ކާނާ ކާ އިރު، ވިޓަމިން ސީ އެކުލެވޭ ކެއުންތައް ނުވަތަ ކާނާ ކެއުމަށްވެސް ސަމާލުކަން ދޭންވާނެއެވެ.
ދަގަނޑުގެ މާއްދާ ގިނައިން އެކުލެވޭ ކާނާގެ ލިސްޓުގައި އެއްގަމު މަހާއި ކަނޑުމަސް ހިމެނެއެވެ. އެއްގަމު މަހުގެ ތެރެއިން ގެރިމަސް ވަކިން ފާހަގަ ކޮށްލެވެއެވެ. އަދި އެއްގަމު މަހާއި ކަނޑު މަހުގެ ފުރަމޭ އަކީ ވަރަށް ގިނައިން ދަގަނޑުގެ މާއްދާ އެކުލެވޭ ކާނާތަކެވެ. މީގެ އިތުރުން ފެހިކުލަ ގަދަ ފަތާއި ބައެއް ގޮވާމުގެ ބާވަތްތަކުންވެސް ދަގަނޑުގެ މާއްދާ ލިބެއެވެ.
މިއާއި އެއްކޮށް ކެއުމަށް އިރުޝާދު ދެވޭ ވިޓަމިން ސީ އެކުލެވޭ ކާނާތަކުގެ ލިސްޓަކަށްވެސް ބަލައިލާނަމެވެ. އެގޮތުން ހުތްކަން ގަދަ މޭވާ ނުވަަތަ ހުތްމޭވާ ތަކަކީ އޭގައި ގިނަ އަދަދަކަށް ވިޓަމިން ސީ އެކުލެވޭ މޭވާތަކެވެ. މި މޭވާތަކުގެ ލިސްޓަކީ ވަރަށްވެސް ދިގު ލިސްޓެކެވެ. އެހެންކަމުން ލިސްޓެއްގެ ގޮތުގައި ބަޔާން ނުކުރި ނަމަވެސް ހުތް މޭވާއެއް ނަމަ އެ ލިސްޓުގައި ހިމަނާލާށެވެ.
މިކަންކަން ތަރުތީބަކުން އިންތިޒާމުވެފައި ހުރުމުން ދޭހަވަނީ ބެލެންސް ޑައިޓެއްގެ މުހިންމު ކަމެވެ. ހަމައަށް ބަހާލައިގެން، އިންސާފުކުރެވޭ ނާސްތާ ތަކުގެ މުހިންމު ކަމެވެ. ދަގަނޑުގެ މާއްދާ ހޯދުމަށް ދަގަނޑުގެ މާއްދާ އެކުލެވޭ ކާނާ އެކަނި ކައިގެން ނުފުދޭނެއެވެ. އެއާއި އެކު ހަމަ ހަމަ ވާނޭ އިންސާފުވެރި އުސޫލެއްގެ ދަށުން ކެއުން ބެހެއްޓުން މުހިންމެވެ.