އިންސާނުން އެހެން އިންސާނުންގެ ކިބައިން ކަންކަމަށް އެދެއެވެ. އެހީތެރިކަމުގެ އަތެއް ދިއްކޮށްލުމަށް އެދެއެވެ. އަމުދުން އެހީތެރިވެސް ވެއެވެ. މިފަދައިން އެހީތެރިވާއިރު، އެއްބަޔަކު އެހީތެރިވަނީ ބައެއްގެ ދިރިއުޅުމުގެ އަސާސީ ހިދުމަތްތަކެއް ކަށަވަރުކޮށްދިނުމަށެވެ. އަދި އަނެއްބަޔަކު، ބައެއްގެ ވިޔަފާރީގައި އެހީތެރިވެއެވެ. އެއްބައި މީހުންނީ، އެމީހުންނަށް އެހީތެރިވެދޭ ބަޔަކަށް ބަދަލެއް ދިނުމަކާއި ނުލާ އެހީތެރިވެދޭ މީހުންނެވެ. އަނެއްބަޔަކީ އެފަދަ އެހީތެރިކަމުގެ ބަދަލުގައި ކޮންމެވެސް ހަދިޔާއެއް، އިނާމެއް ނުވަތަ އެ މަސައްކަތެއްގެ އުޖޫރައެއް ކަނޑައެޅުމަށްފަހު އެހީތެރިވެދޭ ފަރާތްތަކެވެ.

އެކެއް އަނެކަކަށް ވެވޭ މިފަދަ އެހީތެރިކަމުގައި، މަސައްކަތުގެ އުޖޫރަ ކަނޑައަޅާ ހާލަތްތަކުގައި، އެ އުޖޫރަ ދޭން ޖެހޭނެއެވެ. އެއީ އެ ކަމެއް ހަވާލުކުރާ ފަރާތާއި ކިތަންމެ ގާތް މީހެއް ކަމުގައި ވީނަމަވެސް މެއެވެ. އެހެނީ އެފަދައިން ވެވޭ އެއްބަސްވުމަކީ އަހުދެކެވެ. އަގުދެކެވެ. ވައުދެކެވެ.

ތިބާއަށް އެ އެހީތެރިވި މީހަކީ ތިބާއާއި އާއިލީގޮތުން ގުޅުން ހުރި މީހެއް ނުވަތަ ގާތް ރަހުމަތްތެރިއެއް ކަމުން، އޭނާގެ އުޖޫރަ ނުދީ ލަސްކުރެވޭ މަންޒަރުފެނެއެވެ. އާދޭހެވެ! އޭނާ އެކަމާ ޝަކުވާއެއް ނުކުރާނެއެވެ. ދެވޭނެ ދުވަހަކުން ދިން ކަމުގައި ވިޔަސް ޝަކުވާއެއް ނުކޮށްފާނެއެވެ. ނަމަވެސް ހަނދާނުގައި އަބަދުމެ ބަހައްޓަންވީ، މީހެއްގެ ހައްގެއް ތިބާގެ މުށުތެރޭގައި އޮތްކަމެވެ. އިސްލާމްދީނުގައި އަންގަވާފައިވަނީ، މަސައްކަތެއް ކުރުމަށްފަހު، އޭނާގެ ގައިން ދާ ހިކުމުގެ ކުރިން އެ މަސައްކަތެއްގެ އުޖޫރަ ދޭން ޖެހޭނެކަމަށެވެ. މިކަމުން ދަލީލުކޮށްދެނީ އުޖޫރަ ނުވަތަ މުސާރަ އޭގެ ހައްގުވެރީންނަށް ވީ އެންމެ އަވަހަކަށް އަދާކޮށްދިނުމުގެ މުހިންމުކަމެވެ. އަދި ލަސްކުރުމުގައި ގެއްލުން ބޮޑުކަމެވެ.

ހެޔޮހިތުން މީހަކަށް ވެދޭ އެހީއެއް ނަމަވެސް، މަސައްކަތުގެ ކުރީން އުޖޫރައެއް ނުވަތަ މުސާރައެއް ހައްގުވާފަދަ އިބާރާތަކުން އެކަމުގެ ސީޣާ ވާނަމަ، އެ މަސައްކަތް ކުރާމީހަކީ "މަސައްކަތްތެރިއެކެވެ". މާނައަކީ އެ އުޖޫރަ އޭނައަށް ހައްގުވާނޭ ކަމެވެ.

ބޮޑެތި ވިޔަފާރިވެރީން އެމީހުންގެ މުވައްޒަފުންނަށް އުޖޫރަ ނުދޭ ޝަކުވާއަކީ ގިނަ، ބޮޑު ޝަކުވާއެކެވެ. އެހެންކަމުން މިއީ ވިޔަފާރިވެރީން ސަމާލުވާން ޖެހޭނޭ ކަމެކެވެ. ބައެއްގެ ހައްގު، ތިމާމެންގެ މުށުތެރޭގައި ގައިދުކޮށްގެން ގެންގުޅުމީ، އާހިރުގައި ތިމަ ތިމާމެންގެ ހައްގު ގައިދުވެދާނޭ ކަމެކެވެ. އެހެންވެއްޖެ ނަމަ އެދުވަހުން ކުރަންޖެހޭ ހިތާމަ މާ ބޮޑުވާނެއެވެ.