ކޮންމެ މީހަކީވެސް އޭނާގެ ހަޔާތުގައި ހިނގާ ކަންކަމާއި މެދު ވިސްނާ ފިކުރު ކުރާނޭ މީހެކެވެ. މިފަދައިން އިންސާނާ އޭނާގެ ދިރިއުޅުމާއި މެދު އެތައް ގޮތަކަށް ވިސްނިދާނެއެވެ. އޭނާގެ މާޒީން އިބުތަރެއް ނުވަތަ ފިލާވަޅެއް ލިބިގަނެވޭތޯ ވިސްނިދާނެއެވެ. ނުވަތަ މާޒީގެ ތާވަލާއި މެދު ވިސްނިދާނެއެވެ. ވަށައިގެންވާ މާހައުލާއި ތިމާގެ އަމިއްލަ ނަފުސުގެ އުޅުމުގެ މައްޗަށް ވިސްނިދާނެއެވެ.

އެގޮތުން ކޮންމެ މީހަކުވެސް އެމީހެއްގެ އަމިއްލަ ޙަޔާތާއިމެދު ފުންކޮށް ވިސްނައިލުން ވަރަށްވެސް މުހިންމެވެ. އެހެނީ އޭނާގެ ޙަޔާތުގައި ކުރެވޭ ކަންތައްތަކުގެ ތެރެއިން މާތް ﷲ ނަހީކުރެއްވި ކަންތައްތަކާއި، ހުއްދަކަންތައްތައް މިނެ ހިސާބު ކުރުމަށެވެ. ޤަބޫލުކުރާށެވެ، އިންސާނާއަށް ފާފައާއި ކުށްވެސް ކުރެވޭނެއެވެ. އެހެނަސް އެއްބައި މީހުންނީ އެމީހުންގެ ދިރިއުޅުމުގައި ގިނަގިނައިން ފާފަކުރަމުންދާ ބައެކެވެ. އެމީހުން އަމުދުން ވިސްނާލުން މުހިންމެވެ. މާތް ﷲ އަންގަވާފައިވާ އުރެދުންތަކަށް އަރައިގަންނަމުން ދާއިރުވެސް އެމީހުންގެ ބޭނުންތައް ފުއްދަވައި ދެއްވަވަމުން ގެންދަވާ ކަމާއިމެދު ވިސްނާލުން ކީއްތޯއެވެ. އެއްވެސް ނިޢްމަތެއް އުނި ނުކުރައްވަވައި ދެއްވަވަމުން ގެންދަވާ ކަމާއިމެދު ވިސްނާލުން އަމުދުން ކީއްތޯއެވެ.

މިއީވެސް ވިސްނާލުން ވަރަށް މުހިންމު ނުކުތާއެކެވެ. ތިބާގެ މުވައްޒަފަކު ނުވަތަ ތިބާގެ ބެލުމުގެ ދަށުގައި މަސައްކަތްކުރާ މީހަކު، ތިބާގެ އަމުރުތަކަށް ނުކިޔަމަންތެރިވެ ކަންކަން ކުރަމުން ގެންދާނަމަ، އެމީހަކާއި ދޭތެރޭ ތިބާއަށް ކަންތައް ކުރެވޭނެ ގޮތާއިމެދު ވިސްނައިލާށެވެ. ތިބާގެ އަމުރުތަކަށް ފާޅުގައި އެމީހަކު ގޮންޖަހަމުން، މަސައްކަތައް ފާޅުގައި އިންކާރުކޮށް ފަރުވާކުޑަކުރަމުން ދާއިރުގައިވެސް އޭނާ އެދޭ ކަންތައް ތިބާ ކޮށްދޭނަމު ހެއްޔެވެ؟ އޭނާގެ އެ ކުށަށް އެއްވެސް އަދަބެއްވެސް ނުދޭނަމު ހެއްޔެވެ؟ އެކަންކަމާއި އަޅާނުލާ އޭނާ އުޅޭނެހާ ގޮތަކަށް އުޅެން ތިބާ ފުރުސަތު ދޭނަން ހެއްޔެވެ؟ ވިސްނާލާށެވެ. ރަނގަޅަށް ފުންކޮށް ވިސްނާލާށެވެ.

އާދޭހެވެ! މީސްތަކުންގެ ނުކިޔަމަންތެރިކަން ހައްދުފަހަނައަޅައިދާ ހިނދުގައިވެސް ﷲ ތަޢާލާގެ ދީލަތިވަންތަކަން ދެކިބަލާށެވެ. ފާފައިގެ މަތީ ދެމި ހުންނަ މީހާއަށްވެސް، ފުރިހަމަ ސިއްޙަތަކާއި، އޭނާ ކުރާ ވިޔަފާރީގައި ފައިދާ މިންވަރުކޮށްދެއްވައެވެ. މިއީ ފާފަކުރަމުންދާ އިންސާނާ ވިސްނާ ފިކުރު ކުރަންޖެހޭ ކޮންފަދަ ބޮޑު ކަމެއްތޯއެވެ. އެ ހާލުގައި ވެސް މާތް ﷲ އޭނާއަށް އެ ދެއްވާ ނިއުމަތްތަކަށް އޭނާ ޝުކުރުވެރިވުންނޫން އިތުރު ގޮތެއް، އޭނާއަށް އެބަ އޮތް ހެއްޔެވެ؟ އެފަދަ ނިއުމަތްތަކަށް ޝުކުރުވެރިވުމަށް ކުރަން އޮތްކަމަކީ ތައުބާވެ ﷲ ތަޢާލާގެ މަގަށް ރުޖޫޢަވުމެވެ. ފާފަތައް ކުރުން ހުއްޓާލައި ހެޔޮ އަމަލުތައް ކުރުން ގިނަ ކުރުމެވެ. އިންސާނަކު މަރުވާނޭ ސާއަތެއް އެކަކަށްވެސް ނޭނގޭނެއެވެ. ލަސް ކުރުމެއް، ފަސްކުރުމެއް އިންސާނާގެ މައްޗަކަށް ނުވެއެވެ.

ފާފައިގެ އަހުލުވެރިއަކަށް ފުރިހަމައަށް ނިއުމަތްތައް ލިބެމުންދާއިރު، އޭނާ ތައުބާވެ ﷲ ގެ މަގަށް ރުޖޫއަ ވެއްޖެނަމަ އެކަލާންގެ އެމީހަކަށް ދެންވަން ހުރި ނިއުމަތްތަކުގެ އަގު ވަޒަންކުރެވޭނެހެއްޔެވެ؟ މިއީ ދިރިއުޅުމުގައި ކޮންމެ މީހަކުވެސް ވިސްނަން ޖެހޭ މުހިންމު ކަމެކެވެ. މާތް ﷲ ގެ ދީލަތިވަންތަކަމާއި މެދު ފިކުރުކޮށް އެ ދީލަތިވަންތަކަމަށް ގިނަގިނައިން ޝުކުރުވެރިވުން އިންސާނާގެ މައްޗަށް ވާޖިބެވެ. އެހެނީ އެއީ ނިއުމަތްތައް ދެމިގެން ދިއުމާއި އިތުރުވުމަށް އޮތް ވަރަށްވެސް ފަހި މަގެކެވެ.