ދިރިއުޅުމުގައި އަބަދުވެސް އެކި ކަންކަމާއި ދިމާވާނެއެވެ. ތަފާތު އެކި އެކި ގޮންޖެހުންތަކާއި ގަބޫލު ކުރަން ދަތި އެތައް ހާދިސާތަކެއް ހިނގައިފާނެއެވެ. ދިރިއުޅުމުގައި ދިމާވާ އެކި އެކި ކަންކަމުގެ މައްޗަށް ކެތްތެރިކަން އިސްކޮށް ސާބިތުވުމަކީ އިންސާނާގެ މައްޗަށް އޮތް ވާޖިބެކެވެ.

ޝައްކާއި ވަހުމަކީ އިންސާނާ ހަލާކުކޮށްލާ، ބަލިކޮށްލާ އެއްޗެކެވެ. އެހެންކަމުން އަބަދުވެސް އިންސާނާ ކުރަންޖެހޭނެ ކަމަކީ ކޮންމެ ކަމެއް ނަމަވެސް، ޝައްކު ނުކޮށް ޔަގީން ކުރުމެވެ. މާނައަކީ އެ ކަމެއްގައި ބަލިކަށިކަމެއް ނުވަތަ ސުވާލު އުފެދޭ ކަންތައްތަކެއް ވާނަމަ އެކަމެއް ތިމާ ގަބޫލު ނުކުރުމެވެ. ނަމަވެސް އެކަމެއްގައި އުފެދޭ ސުވާލުތަކަށް ޖަވާބު ދެވުމަށްފަހު ކަމުގެ ހަގީގަތް އެނގި ޔަގީންވުމުން، އެކަން ގަބޫލު ކުރާށެވެ. އެނޫން ގޮތަކަށް ޝައްކެއްގެ މައްޗަށް ބިނާވެ ހުރެ ގޮތް ނުނިންމާށެވެ.

ތިމާ ގަބޫލު ކުރާ ކަންކަމާއި ތިމާ ނިންމާ މުހިންމު ނިންމުން ތަކަކީ އެފަދަ ޝައްކެއް ނުވަތަ ވަހުމެއްގެ މަށްޗަށް ބިނާވެހުރެ ނިންމާ ނިންމުމެއް ނަމަ އޭގެ ސަބަބުން ނޭދެވޭ އެތައް އަސަރެއް ކުރާނެއެވެ. އެފަދަ ބައެއް ކަންކަމުގެ ސަބަބުން، މުޅި އުމުރުގައި ހިތާމަ ކުރަން ޖެހިދާނެއެވެ. ކަރުނަ އަޅާ ރޯން ޖެހިދާނެއެވެ.

އާދޭހެވެ! ދިރިއުޅުމުގައި ޝައްކު އުފެދޭ އެތައް ކަމެއް ދިމައިވާނެއެވެ. އެތައް ހާލަތްތަކެއް ކުރިމަތިވެދާނެއެވެ. މިފަދަ ކޮންމެ ސާއަތެއްގައި އިންސާނާގެ މައްޗަށް އޮތީ އޭނާ އަށް ދެއްވާފައިވާ ބުއްދީގެ ބޭނުން ހިފުމެވެ. ކެތްތެރިކަން އިސްކުރުމެވެ. ހިކުމަތްތެރިކަން މަތިކުރުމެވެ. ކޮންމެ ޝައްކަކާއި އެކު އެތައް ބައިވަރު ސުވާލުތަކެއް އުފެދޭނޭކަން ޔަގީނެވެ. ބައެއް ފަހަރު މިފަދަ ޝައްކުތަކުގެ ވަރަށް އަވަހަށް ގޮތް ނިންމަން ޖެހޭ ހާލަތްތަކެއްވެސް މި ދުނިޔެ އިންސާނާއާއި ކުރިމަތިކުރުވަފާނެއެވެ. ނަމަވެސް އިސްވެ ދެންނެވިފަދައިން ކެތްތެރިކަމާއި ހިކުމަތްތެރިކަން އިސްނުކޮށް ގޮތެއް ނިންމުމަކީ އެދެވޭ ކަމެއް ނޫނެވެ.

ޝައްކު ޔަގީނަށް ހެދުމަކީ ކޮންމެހެން ކުރަން ޖެހޭނޭ ކަމެކެވެ. އެކަމުގައި އޮތް އެންމެ ރަނަގަޅު ގޮތަކީ ޝައްކާއި އެކު އުފެދޭ ސުވާލުތަކަށް ޖަވާބު ހޯދުމެވެ. އެއީ ދަތި އުނދަގޫ ކަމެއް ނަމަވެސް ހިތްވަރާއި ހިކުމަތްތެެރިކަމާއި އެކީ އެ ސުވާލުތަކުގެ ޖަވާބު ހޯދޭނެއެވެ. އަދި ހޯދާށެވެ. އޭރަށް އެ ޝައްކެއް ޔަގީން ވެގެން ދާނެއެވެ. އެއްގޮތަކީ ޝައްކު ކުރެވުނު ގޮތަށް ޔަގީން ވުމެވެ. އަނެއް ގޮތަކީ ޝައްކު ކުރެވުނު ގޮތާއި އިދިކޮޅަށް ޔަގީން ވެގެން ދިއުމެވެ.

މި ލިބުނު ޔަގީންކަމާއި އިތުބާރަކީ އެ ޝައްކުގެ ސަބަބުން ތިބާ ނިންމަން ގަސްތުކުޅަ ގޮތެއް ނުވަތަ ކަމެއް، ނިންމުމަށް ލިބޭނޭ ވަރަށް ބޮޑު ހިތްވަރެކެވެ. ޝައްކާއި ވަހުމުގެ މަތީގައި ހުރެ ނިންމާ ނިންމުންތަކުގެ ސަބަބުން އެތައް އާއިލާއެއް ރޫޅި އެތައް މިތުރުންނެއް ހަތުރުންނަށް ވެފައި އެބަހުއްޓެވެ. އެހެން ކަމުން އަބަދުވެސް އެ ޝައްކު ޔަގީނަށް ބަދަލުކުރުމަށް ފަހުގައި ނޫނީ އެއްވެސް އެފަދަ ނިންމުމެއް ނިންމައިގެން ނުވާނެއެވެ. އާދޭހެވެ! ކުރަންވީހާވެސް ކަމަކީ ޝައްކުނުކޮށް ޔަގީން ކުރުމެވެ. މައްސަލަތައް ހައްލުވުމުގައި އަދުލުވެރި އިންސާފުވެރި ނިޔާއެއް ކަނޑައެޅޭނީ އޭރުންނެވެ.