އިންސާނުންގެ ކަރަކީ ހަރަކާތް ކުރެވޭ ގުނަވަނެއް. އެކި އިންސާނުންގެ ކަރުގެ ދިގުމިން ތަފާތުވެދާނެ. އެވްރެޖު އިންސާނެއްގެ ކަރުގެ ދިގުމިނުގައި ހުންނަނީ 10 ސެންޓިމީޓަރާއި 12 ސެންޓިމީޓަރު. އެހެންނަމަވެސް ކޮންމެ އިންސާނެއްގެ ވެސް ކަރުގައި ހުންނަ ބަދައިގެ އަދަދު އެއްވަރު ވާނެ. މައި ބަދައިގައި ހުންނަ އެކި އެކި ބަދަތަކުގެ ތެރެއިން އިންސާނާގެ ކަރުގައި ހުންނަނީ 7 ބަދަ. ޖަންގަލީގާ ދިރިއުޅޭ ޖަނަވާރުން ތެރެއިން އެންމެ ކަރު ދިގު ޖަނަވާރަކަށް ވާނީ ޒަރާފާ. ޒަރާފާ އަކީ އެސޮރުގެ ކަރު ވަރަަށް ދިގުކޮށް ހުންނަ ޖަނަވާރެއް. އެކަމުގެ ހިކުމަތަކީ ގަސްގަހުގެ އުސް ހިސާބުތަކުގައި ހުންނަ ފަތްޕިލާވެލި ފަސޭހަ ކަމާއެކީ އެސޮރަށް ކެވުން. އެވްރެޖު ޒަރާފާއެއްގެ ކަރުގެ ދިގުމިނުގައި 6 ފޫޓު ހުރޭ. އިންސާނެއްގެ ކަރާއި ޒަރާފާއެއްގެ ކަރުގެ ދިގުމިނަށް ބަލާއިރު ޒަރާފާގެ ކަރުގެ ދިގުމިން އެތައް ގުނައަކަށް ދިގު. އެހެންނަމަވެސް އިންސާނުންނާއި ޒަރާފާގެ ކަރުގައި ހުންނަ ބަދަ ވަނީ އެއްވަރު. ޒަރާފާގެ ކަރުގައިވެސް އަދި އިންސާނާގެ ކަރުގައިވެސް ވަނީ ޖުމުލަ 7 ބަދަ. ތަފާތަކީ ބަދަތަކުގެ ދިގުމިން. ޒަރާފާގެ ކަރުގައި ހުންނަ ބަދަތަކުގެ ދިގުމިން އިންސާނުންގެ ކަރުގެ ބަދަތަކަށްވުރެ އެތައް ގުނައަކަށް ދިގު. އިންސާނާގެ ކަރު އެގޮތް މިގޮތަށް ހަރަކާތް ކުރަނީ މި 7 ބަދައިގެ އެހީގައި. އެ އުސޫލުން ޒަރާފާގެ އެ ދިގު ކަރުވެސް ހަރަކާތް ކުރަނީ ހަމަ 7 ބަދައިގެ ބާރުގައި.