ކޮންމެ މުޖުތަމައެއްގައިވެސް ކުށްކުރާ މީހުން އުޅޭނެއެވެ. އެކަން ޖެހޭނީ އަހަރެމެން އިންސާނުން ގަބޫލުކުރާށެވެ. ދިވެހި ރާއްޖޭގައިވެސް އެކި ކަހަލަ ކުށްތައް ކުރާ މީހުން އިންތިހާއަށް ގިނައެވެ. ވައްކަމާއި ފޭރުމުގެ މައްސަލަތަކާއި މަސްތުވާތަކެތީގެ މައްސަލަތަކާއި، ހިޔާނާތާއި އޮޅުވާލުމާއި، ގެވެށި އަނިޔާއާއި ޖިންސީ ފުރައްސާރަ ފަދަ ކިތަންމެ ކިތަންމެ ކުށްތަކެއް މި ދިވެހި ވަސްގަނޑުގައި މިހާރު މިވަނީ އާންމުވަމުންނެވެ.

މަސްތުވާ ތަކެތީގެ ވަބާ ނުފޯރާ ރަށެއް މި ރާއްޖޭގައި ނުހުންނާނޭ ބުނުން ދޮގަކަށް ނުވާނެއެވެ. އެހާވެސް އާންމު އެއްޗަކަށް މަސްތުވާތަކެތި ވެއްޖެއެވެ. ރާއްޖޭގެ ވެރިކަން ކުރާ މާލެ ސަރަހައްދުގައި ކެފޭ އުސޫލުން ލުއިކާނާ ވިއްކާ ކައި ބޮއެ ހަދާހެން މަސްތުވާތަކެތި ބޭނުން ކުރަމުން ދަނީއެވެ. ރަށްރަށުގައިވެސް ހަމަ މިހާ އާންމުކޮށް ބޭނުން ކުރަމުން ދެއެވެ.

މާލޭގެ ވާހަކަ އިހަށް ބާއްވާލުމަށްފަހު ހާހުން ދަށުގެ އާބާދީތައް އޮންނަ ކުދި ކުދި ރަށްރަށުގައިވެސް މަސްތުވާތަކެތީގެ ވަބާ އެހާމެ ބޮޑެވެ. އެ ތަކެތި އެ ރަށްރަށަށް އެތެރެކޮށް، ވިއްކާ އެއިން އާމްދަނީ ހޯދާ މީހުން މަދެއް ނޫނެވެ. މިއީ އެއްވެސް މީހަކު ހައިރާންވެ ކަންބޮޑުވާ ކަމެއް ހެންނެއް އިހުސާސެއް ނުވެއެވެ. އެހާވެސް އާންމެވެ.

ކުދި ކުދި ރަށްރަށުގައި އެރަށްރަށަށް މަސްތުވާތަކެތި އެތެރެކުރަނީ ކާކުކަން އެ ރަށްތަކުގެ މަސްއޫލުވެރީންނަށާއި އެ ރަށްތަކުގެ އެންމެންނަށް އެނގެއެވެ. އެބަޔަކު އެ އެއްޗެހި ވިއްކަނީ ރަށުގެ ކޮން ކޮން ބަޔަކަށް ކަންވެސް އެހާ ސާފުކޮށް އެނގެއެވެ. އެމީހުން އެ އެއްޗެއްގެ އިސްތިއުމާލު ކުރާ ތަންތަނާއި އެ ތަންތަނުގެ އަހުލުންނާއި، އެމީހުން އެ އެއްޗެހި ބޭނުން ކުރާ ވަގުތާ ސާއަތާއި ހުރިހާ މައުލޫމާތެެއް ދުވާލުގެ އިރު ފަދައިން އެނގި ހާމަވާން ހުރެއެވެ. ނަމަވެސް ކަހާތަން ހިރުވާލާނޭ ހަމަ އެކަކުވެސް ނޫޅެއެވެ. ވަގަށް ބޮންޏާ އެއީ ހުއްދަކަމެކޭވެސް ހީވާކަހަލައެވެ. ނަމަވެސް މި ހީވުން ބާތިލުވަނީ އެ ބޯ ބަޔަކު ބޮނީ ވަގަށް ނޫންކަން އިނގޭ ހިސާބުންނެވެ. އެހެނީ އިސްވެ ދެންނެވުނު ހުރިހާ މައުލޫމާތެއް އެ ރަށްރަށުގެ ރައްޔިތުންނަށާއި މަސްއޫލުވެރީންނަށް އެނގެއެވެ. ކުރެވޭ ކަމެއް، އެޅޭނޭ ހަމަ އެންމެ ފިޔަވަޅެއްވެސް ނެތެވެ.

ބައެއް ރަށްރަށުގައި ފުލުހންގެ މަރުކަޒު ގާއިމު ވެފައި ހުރެއެވެ. އަނެއްބައި ރަށްރަށުގައި ފުލުހުންގެ މޭޒެއް ގާއިމުވެފައި ހުރެއެވެ. ވާ ހަމަ ކަމެއް އެއްކަމެއްވެސް ނޯވެއެވެ. މަސްތުވާތަކެތި ބޭނުން ކުރާ މީހުން، އާދައިގެ މަތިން އެކަން ކުރަމުން ދެއެވެ.

މިކަންކަމުގައި އުޅޭ މައްސަލައަކީ ކޮބައިހެއްޔެވެ؟ މިކަންކަން ނުހުއްޓުވެނީ ކީއްވެ ހެއްޔެވެ؟ ގާނޫނު ނެތީހެއްޔެވެ؟ ދީނުގެ ހުކުމް ހަނދާން ނެތުނީ ހެއްޔެވެ؟ ތަންފީޒު ކުރާނޭ މީހަކު ނެތީ ހެއްޔެވެ؟ އަމުދުން އެންމެންގެ އީމާންތެރިކަންވެސް ނެތީހެއްޔެވެ؟ މިއީ ހިތާމަ ހުރިކަމެކެވެ. މިއީ މާދަމާ އެންމެންވެސް ކަރުނަ އަޅާ ރޯންޖެހޭނޭ ވަރުގެ ބޮޑު އިހުމާލެކެވެ. އެދުވަހުން ޒިންމާ ވާނޭ އެކަކުވެސް ނުހުންނާނެވެ. އެހެނީ އެންމެންވެސް ޒިންމާއިން ރެކޭނެތީއެވެ. ކިއެއްތޯއެވެ! މިއަދުވެސް އެތިބެވެނީ ރެކެވިގެންނެވެ.