ދިވެހިރާއްޖޭގައި އެންމެ އާންމު ފެންނަ އެއް ދޫންޏަކީ ކާޅު. ކާޅަކީ އެހެން ދޫނިތަކާއި ހިލާފަށް އިންސާނުން ދިރިއުޅޭ މާހައުލުގައި އުޅޭ ވަގު ދޫންޏެއް. އާންމުކޮށް އިންސާނުންގެ ތެރޭގައި އުޅެނީ ނުވަތަ ގެންގުޅެނީ އިންސާނުން އޮޅުކޮށްގެން ގެންގުޅޭ ދޫނި އެކަނި. އެހަނަސް ކާޅަކީ އާންމުކޮށް އިންސާނުންގެ ތެރޭގައި އުޅޭ ދޫންޏެއް. ދިރާސާވެރިން ބުނާގޮތުގައި މިއީ ކާޅުގެ ބިރުކުޑަކަމުން އެސޮރު އުޅޭ ގޮތެއް. އެހެން ދޫނި ތަކާއި ހިލާފަށް ކާޅަކީ ބިރު ކުޑަ ދޫންޏެއް. އެކަން ދިވެހި ރާއްޖޭގެ މާހައުލުންވެސް ފެންނާނެ. އިންސާނުންނަށް ހަމަލާ ދިނުމަށްފަހު ކާޅު، އެސޮރުގެ ކާނާ ހޯދާ ފަހަރުތައް އާދޭ. ހަމަ އެއާއި އެކު ކާޅަކަށް އަނިޔާކޮށްފިނަމަ އެކަމުގައި ހުރިހާ ކާޅުތަކެއް ބައިވެރިވެ، އެ އަނިޔާކުރިމީހާގެ ބޮލުގަ ކޮށާ ހަދާ. އިންސާނުންނަށް ކާޅުގެ ފަރާތުން އަނިޔާ ލިބޭއިރު އިންސާނުންނަކީ ކާޅު އެންމެ ބިރުގަންނަ މީހުން. ކާޅަށް ހަމަލާ ދެވޭވަރުގެ ބޮޑެތި ބާޒުތަކަކީ ކާޅަށް ހަމަލާ ދީ ޝިކާރަ ކުރާ ދޫނިތަކެއް. އެހެންނަމަވެސް ކާޅަކީ ބާޒު ފަހާ އުދުހޭ ދޫންޏެއް. މިއީވެސް އެސޮރުގެ ބިރުކުޑަކަން ހާމަވާ އެއްކަންތައް. ދިވެހި ރާއްޖެއަށް ހިޖުރަކުރާ އެފަދަ ބޮޑެތި ދޫނިފަހަތުން ކާޅު އުދުހޭ. އެ ދޫނިތަކަށް ބިރުދައްކާ. ކާޅުގެ ކިބައިގައި ހުންނަ މި ބިރުކުޑަކަމުގެ ސިފައަކީ އެސޮރުގެ ވިސްނުތޫނުކަމާއި އެކު ލިބިފައިވާ ސިފައެއް. މިއީ މާތް ﷲ ކާޅުގައި ލައްވާފައިވާ އެސޮރަށް އެހާމެ މުހިންމު ސިފައެއް. ދުޝްމަނުންގެ ކިބައިން ސަލާމަތް ވުމަށާއި ކާނާ ހޯދުމަށް ކާޅުގެ މި ބިރުކުޑަކަން ބޭނުން ކުރޭ. ދިރާސާވެރިން ދެކިލައްވާ ގޮތުގައި ކާޅަކީ އެންމެ ބިރުކުޑަ ދޫނި.