މިއީ ދިވެހި ރާއްޖޭގެ ދެކުނުގެ ރަށެއްގައި ހިނގާދިޔަ ހާދިސާއެކެވެ. މި ހާދިސާ ހިއްސާމިކޮށްލެވެނީ އެފަރާތުގެ ހުއްދައާއި އެކުގައެވެ. މިވާހަކަހިއްސާ މި ކޮށްލަނީ މިއިން އިބުރަތެއް ހާސިލުކުރުމުގެ ބޭނުމުގައެވެ.

މިއަދު އޭނާއަކީ އުމުރުން 25 އަހަރުގެ ޒުވާން ފިރިހެނެކެވެ. މާ ރަނގަޅު ތައުލީމެއް ލިބިފައި ނެތް ނަމަވެސް މިއަދު އޭނާ އަކީ ރިސޯޓެއްގައި ހަރުދަނާ ވަޒީފާއެއް އަދާކުރާ ޒުވާނެކެވެ. މަދަރުސީ ދައުރުގައި ސުކޫލުގައި އުޅުނު އެންމެ ވިޔާނުދާކުދީންގެ ތެރެއިން ކުއްޖެކެވެ. ޓީޗަރުންނަށާއި ކިޔަވާ އެހެންކުދީންނަށް ޖެއްސުން ކުރުމުގައި އެވަރެއް ނެތެވެ. ބައެއްފަހަރު އޭނާ އުޅޭ ގޮތުން އެއީ މޮޔައެއް ކަމާއި ސިކުނޑިހަމަނުޖެހޭ ކުއްޖެއްކަމަށްވެސް ބައެއް މީހުން ބުނެ އުޅެއެވެ. ދީނީ ކަންކަމާއި އެހާމެ ދުރު މިސްކިތާ އަމުދުން ދުރު ކުއްޖެކެވެ.

އޭނާގެ މައިންބަފައިން ވަނީ އޭނާ ކުޑައިރު ވަކިވެފައެވެ. އެއާއި އެކު އޭނާ އުޅެމުން އައީ އޭނާގެ މަންމައާއި އެކުގައެވެ. އޭނާގެ މަންމައަކީ ސަރުކާރު މުއައްސަސާއެއްގައި ހަރުދަނާ ވަޒީފާއެއް އަދާކުރާ ބިޒީ މަންމައެކެވެ. އެއާއި އެކު އާއިލާއަށް ވަގުތުދެވޭލެއް އެ މަންމައަށް ވަރަށް މަދެވެ.

ކޮންމެއަކަސް ދެތިން އަހަރު ރިޕީޓުވުމަށްފަހު އޭނާއަށް ސުކޫލު ނިންމާލެވިއްޖެއެވެ. ކަންދިމައިކުރިގޮތުން މާބޮޑު ދަތިކަމަކާއި ނުލާ ރިސޯޓަކުން ވަޒީފާއެއް ލިބިއްޖެއެވެ. ރިސޯޓުގައި ދުވަސްތައް ހޭދަކުރަމުން ދިޔައިރުވެސް އޭނާގެ އުޅުމަކަށް މާބޮޑު ބަދަލެއް ނާދެއެވެ. ހާއްސަކޮށް ދީނީ ކަންކަމަށެވެ. އަމިއްލަ ރަށުގައި މަންމަގެ ގާތުގައި އުޅުނު އިރު ކިރިޔާވެސް ސަމާލުކަމެއްދިން ކަމެއް ވިޔަސް ރިސޯޓަށް ދިޔަފަހުން މުޅިންހެން ދޫކޮށްލައިފިއެވެ. ލަވަޔާ މިޔުޒިކު ޖެހުމާއި ސަކަރާތްޖެހުމަކީ އަޅުކަމެއް ފަދައިން އޭނާ ކުރަމުން ދިޔަ ކަންކަމެވެ.

މިގޮތަށް ދުވަސްތައް ފާއިތުވަމުންގޮސް އެ ޒުވާނާ އަންހެން ކުއްޖަކާއި ލޯބީގެ ގޮތުން ގުޅުނެވެ. މާގިނަ ދުވަސްތަކެއް ނުވެ އެ ދެމީހުން ކައިވެނިކޮށްފިއެވެ. މި ޒުވާނާގެ އެ ވިޔާނުދާ އުޅުން ކުއްލިގޮތަކަށް ބަދަލުވާން ފެށީ ކައިވެންޏަށް ފަހުގައެވެ. އޭނާގެ އަނބިމީހައަކީ އޯގާތެރި ވަފާތެރި މީހެކެވެ. ފުދޭވަރެއްގެ ތައުލީމެއް ލިބިފައިހުރި ދީނީކަންކަމަށް ފަރުވާތެރިކަން ދޭ އަންހެނެކެވެ. ކައިވެންޏަށް އަހަރެއް ނުވަނީސް އެ ޒުވާނާގެ މުޅި ދިރިއުން ބަދަލުވެއްޖެއެވެ. ފޯނުގައި ހުރި ލަވަތަކާ މިއުޒިކުތައް ފޯނުން ފޮހެލައިފިއެވެ. ނަމާދުތަކަށް ފަރުވާތެރިވާން ފަށައިފިއެވެ. ނަމަވެސް އޭނާ ގަބޫލުކުރާ ގޮތުގައި އަދިވެސް އެންމެ ފުރިހަމައަށް އިސްލާހެއް ނުވެވެއެވެ. ނަމަވެސް އޭނާ އުންމީދު ކުރަނީ މިހާރު އޭނާގެ ކިބައިގައި ހުރި އެފަދަ އާދަތަށްވެސް ވަރަށް އަވަހަށް ފޮހެލެވޭނެކަމަށެވެ. އޭނާ ބުނާގޮތުގައި އޭނާއަށް ލިބިފައި ހުރީ ޖަވާހިރެއް ފަދަ އަންބެކެވެ.

މިއީ ވިޔާނުދާ އުޅުމެއް އުޅެމުން ދިޔަ ދިވެހި ފިރިހެނެއްގެ މުޅި ދިރިއުޅުން އިސްލާހުކޮށްދިން ހެޔޮލަފާ އަންބެއްގެ ވާހަކައެވެ. ކޮންމެ އަންބަކީވެސް އޭނާގެ ފިރިމީހާއަށް ހެޔޮ އެދޭ، އަދި ހާއްސަކޮަށް ދީނީ ކަންކަމަށް ބާރުއަޅާ މީހަކަށް ވުން ވަރަށްވެސް މިހިންމެވެ.