ދިވެހިންނަކީ މޫދަށް މަހެއްފަދަ، ކަނޑަށް މަރެއްފަދަ ބައުކޭ ބުނެ އުޅެއެވެ. މާނައަކީ ދިވެހިންނަކީ ކަނޑުމަށްޗަށް ފަރިތަބެކެވެ. ދިވެހިންނަކީ ވަޔާއި އޮއެވަރު ރަނގަޅަށް ދެނެތިބި ބައެކެވެ. ކަނޑު ދަތުރުފަތުރު ކުރުމުގައި އަރާހުރި ބައެކެވެ. ކަނޑުގެ ބާޒުންނަށްވެސް ޝިކާރަކޮށް ނުލެވުނު ބައެކެވެ. ކަންއޮތީ އެހެންކަމުގައި ވީނަމަވެސް މިއަދު ދިވެހިންގެ ތެރޭގައި ކަނޑުމަށްޗަށް އަރަން ޖެހިލުންވާ، ފަތަންނުދަންނަ މީހުން މަދެއް ނޫނެވެ.

ދިވެހިރާއްޖޭގެ މައިގަނޑު ދަތުރުފަތުގެ މަގަކީ ކަނޑުމަގެވެ. އިހުގައި ދުއްވާ އުޅުނު ފަން ރިޔަލު އޮޑިތައް ފޮތިރިޔަލަށް ބަދަލުވެ އިންޖީނު އެޅި، މިހާރު އިސްޕީޑު ލޯންޗުތަކުގައި ދަތުރުކޮށް އުޅެއެވެ. ކޮންމެ ޒަމާނެއްގައި ކޮންމެ އުޅަނދެއްގައި ދަތުރުކޮށް އުޅުނު ނަމަވެސް ދިވެހިންނަކީ ފަރުވާތެރި ބައެކެވެ. ނަމަވެސް މިއަދު އެ މަންޒަރު ބަދަލުވާތަން އެބަ އާދެއެވެ. ކަނޑުމަތީގައި ހިނގާ ނުރައްކާތެރި ހާދިސާތައް ގިނަވެއެވެ. މިކަންކަމުގައި ސަލާމަތީ ފަރާތްތަކުން ފާހަގަ ކުރާ ކަމަކީ ދަތުރުފަތުރުކުރުމުގައި ސަމާލުކަންނުދިނުމާއި ފަރުވާ ކުޑަކުރުމެވެ. އިސްވެ ދެންނެވުނު ފަދައިން ދިވެހީންނަކީ ކަނޑުދަތުރުފަތުރުކުރުމުގައި ފަރުވާތެރި ބައެކެވެ. އެހެންކަމުން މިއަދުގެ އަހަރެމެން ދިވެހިން ވާންޖެހޭނީ ކަނޑުދަތުރުފަތުރު ކުރުމުގައި ފަރުވާތެރިވެ ސަމާލުކަން ދޭންޖެހޭ ބަޔަކަށެވެ.

ދިވެހިރާއްޖޭގެ ރަށްތަކުގައި ދުއްވާ ކުދި ލޯންޗު ނުވަތަ ޑިންގީފަހަރުތައް މިހާރަކަށް އައިސް ވަރަށްވެސް ގިނައެވެ. އެއްބަޔަކު މި އުޅަނދުތަށް ގެންގުޅެނީ އަމިއްލަ ބޭނުންތަކާއި ހިތްހަމަ ޖައްސާލާ މަޖާކޮށްލުމަށެވެ. އަނެއްބަޔަކު ގަވައިދުން ވިޔަފާރި އުސޫލުން މި އުޅަނދުތަކުގައި ދަތުރުކޮށް އުޅެއެވެ.

މިފަދައިން ޑިންގީތަކުގައި ދަތުރު ކުރާއިރު، އެކަނި ކަނޑު ބޭރުވުމަކީ ވަރަށް އާންމު ކަމެކެވެ. ދިވެހިރާއްޖޭގައި ހެދިފައި ހުންނަ ގަވާއިދުގައި ބުނާގޮތުގެ މަތިން އެކަނި ކަނޑުދަތުރުތަކަށް ފުރުމަކީ މުޅިން މަނާކަމެކެވެ. ނަމަވެސް މި މަންޒަރު ވަރަށް އާންމުކޮށް މިހާރަކަށް އައިސް ފެނެއެވެ. ކަނޑަށް ކިތަންމެ ފަރިތަ މީހެއް ނަމަވެސް އެކަނި ދަތުރުކުރުން ރައްކާތެރިއެއް ނޫނެވެ. ކަމެއް ވާނީ ބުނެފައެއް ނޫނެވެ.

އާދެހެވެ! ތަގުދީރުގައި ކަމެއް ލިޔެވިފައިވާނަމަ އެކަމެއް އެގޮތަކަށް ހިނގާނެއެވެ. ސަބަބުތަކުގައި ކިތަންމެ ރަނގަޅަށް ހިފަހައްޓައިގެން ހުއްޓަސް މެއެވެ. މިއީ އެކަނި ދަތުރުކޮށްއުޅޭ ފަރާތްތަކުން ދީ އުޅޭ ހަރުކަށި ރައްދެކެވެ. އެހެންނަމަވެސް މިއީ ސަބަބުތަކުގައި ނުހިފާ ދޫކޮށްލުމަށް އިންސާނާއަށް ދެއްކޭނޭ އުޒުރެއް ނޫނެވެ. ދެމީހަކު ދަތުރުކުރާނަމަ އެކަކަށް ކަމެއް ދިމާވުމުން އެހީތެރިވެވޭނެއެވެ. ނުވަތަ އަންގަން ބޭނުން ފަރާތަކަށް އެންގިދާނެއެވެ. މިފަދަ ކިތަންމެ ކަމެއް ދެމީހުން ފުރާނަމަ ވާނެއެވެ. ނަމަވެސް އެކަނި ކަނޑުދަތުރުކުރަނިކޮށް ދިމާވާ އެއްވެސް ކަމެއްގައި އެހީތެރިއަކު ނުވާނެއެވެ. ހަބަރު ފޯރުކޮށްދޭނޭ އިތުރު މީހަކު ނުހުންނާނެއެވެ.

މިކަންކަން މިހެން ތަރުތީބުވެފައިވުމުން، ކަނޑުދަތުރުފަތުރުކުރާ ފަރާތްތަކުން އެކަނި ދަތުރަށް ނުފުރާށެވެ. އެކުގައި ފަޅުވެރިއަކު ގެންދާށެވެ. ކަމާބެހޭ ފަރާތްތަކުން ދޭ އިރުޝާދުތަކާއި ލަފާތަކަށް ސަމާލުވެ ފަރުވާތެރިވާށެވެ. މިއީ ސަބަބުތަކުގައި ހިފުމެވެ. އެއީ މާތް ﷲ އެކަމަކަށް އަމުރުވެސް ކުރައްވާފައިވާ ކަމެކެވެ.