ޒަމާނަކީ ބައެއް ފަހަރަށް ވަރަށް ރަނގަޅު، އަދި އަނެއްބައި ފަހަރަށް ވަރަށް ވިޔާނުދާ އެއްޗެކެވެ. ޒަމާން އަބަދުވެސް އިންސާނުންނަށް ތަފާތު، އެކި އެކި ކަންކަން ދައްކައިދީ ދަސްކޮށްދެއެވެ. މިއިން ކޮންމެ ކަމަކީ ފެޝަނެއް ކަމަށް ދެކި އެކަންކަމަށް އިންސާނާގެ ހިތްލެނބި، އެކަންކަމުގެ ފަހަތުން އަބަދުވެސް އިންސާނާއަށް ދެވެއެވެ.

މިފަދައިން ޒަމާން، ބަދަލުކުރުވާ ކިތަންމެ ކަމެއް އެބަހުއްޓެވެ. އިންސާނުން ދިރިއުޅޭ ގޮތާއި، ކުރާކަންކަމެވެ. އިންސާނާ ކައިބޮއެ ހަދާ ތަކެއްޗާއި، އުނުއޮރިޔާން ނިވާކުރަން ލާ އުޅުނު އަންނައުނެވެ. މިހެންގޮސް ޒަމާން، އެކަމެއްގެ ތެރެއަށް ތަދައްޚުލު ނުވާ ހަމަ އެއްކަމެއްވެސް ނުހުންނާނެއެވެ.

ޒަމާނާއި އެކު މި އަންނަ އައުކޮންމެ ކަމަކީ ހަގީގަތުގައި އަހަރެމެން އެކަމެއް ބަލައިގަނެ އެކަމަކަަށް "ކުރުނީސް" ކުރަން ޖެހޭނޭކަންކަމެއް ނޫނެވެ. އެ ކަމަކީ އެކަމެއްގެ ސަބަބުން ލިބޭ ގެއްލުން ބޮޑު ކަމެއް ނަމަ އެކަމުގެ ފަހަތުން ގިނަ ބަޔަކު ދުވި ނަމަވެސް އެއީ އަހަރެމެން އެކަމެއްގެ ފަހަތުން ދާން ޖެހޭނޭ ކަމެއް ނޫނެވެ. ޒަމާނާއި އެކު އައި މިފަދަ ވިޔާނުދާ ބަދަލު ތަކުގެ ތެރޭގައި ތައާރަފުވަމުންދާ އެއް ކަމަކީ މައިންބަފައިންނާއި ވަކިން ދިރިއުޅުމުގެ ވައްޓަފާޅިއެކެވެ. ދުނިޔޭގެ ތަހުޒީބުވެފައިވާ ބޮޑެތި ގައުމުތަކުގައި މިއީ ވަރަށް އާންމު ކަމެކެވެ. މި މަންޒަރު ދިވެހިންގެ ތެރެއިންވެސް ފެންނަކަމީ ހިތާމަ ހުރި ކަމެކެވެ.

މި ޒަމާނުގައި މީހުންނާއި އިނުމަށްފަހު އެމީހުންގެ މައިންބަފައިންނާއި އެކު އެއްގެއެއްގައި އުޅުމަކީ ތަހުޒީބާއި ފުށުއަރާކަމެއް ކަމަަށް ބަޔަކު އަންނަނީ ދައްކަމުންނެވެ. ކުއްޖާ ބޮޑުވެ މީހަކަށްވުމުން، މައިންބަފައިންގެ ބަސް އެހުމަކީ މާ މުސްކުޅިގޮތެއް ކަމަށާއި ޒަމާނާއި އެކު ތަހުޒީބު ފެޝަނަކީ އަމިއްލަ އަށް ފެންނަ ގޮތަކަށް ކަންކަން ކުރުން ކަމަށް ބުނެދޭ "ދަރުސް" ތައްވެސް މިޒަމާނުގައި މަދެއް ނޫނެވެ. ދަރިންގެ ދިރިއުޅުމުގައި މައިންގެ ލަފާ ހޯދަން ޖެހޭނީ އެ ދަރިން ކުޑައިރުގައި ކަމާއި، ބޮޑުވެ ތަސައްރަފު ފުދުމުން މައިންބަފައިންނަށް، އެ ދަރިންގެ އިހުސާސްތައް ނޭނގޭނޭ ކަމަށް ވެސް މި ޒަމާނުގެ "ފެޝަން" ބުނެދެއެވެ. މިއީ މިނިވަންކަން ކަމަށާއި މިއީ ހައްގު ކަމަށް ބުނެ ވަކާލާތު ކުރެވެއެވެ. ހަގީގަތުގައި މިއީ ބަޔަކު އަޑީގައި ތިބެ ހިންގާ ވަރަށް ނުބައި ބިޔަ ބޮޑު ހަރަކާތެއްގެ ބައެކެވެ. އިސްލާމްދީނާއި ބީރައްޓެހި ވައްޓަފާޅިތައް އިސްލާމީ މުޖުތަމައު ތަކުގައި ފަތުރާ، ދީނާ ދުރު ވައްޓަފާޅިއެއްގައި އުޅޭ ބަޔަކަށް އިސްލާމުން ހެދުމަށްޓަކައި ދުރާލާ، ރާވައިގެން ހިނގާ އަޑިނޭނގޭ ޕްރޮޕެގެންޑާ ތަކެއްގެ ނަތީޖާއެވެ.

މިއީ ޒަމާން ވިޔާނުދާވާ ހާލަތެކެވެ. އެހެންކަމުން ޒަމާން ދަސްކޮށްދޭ މި ވިޔާނުދާ ވައްޓަފާޅިއަކީ އަހަރެމެން މުސްލިމުން އެ ވައްޓަފާޅިއަކާއި ދުރުވާން ޖެހޭނޭ ކަމެކެވެ. ހަގީގީ ފެޝަނަކީ ނުވަތަ ތަހުޒީބަކީ މައިންބަފައިން، މަރު ދުވަހާއި ޖެހެންދެން ދަރިންގެ އަރިހުގައި ގެންގުޅުންކަން ގަބޫލުކުރަން ވާނެއެވެ. އެއް ފުރާޅެއްގެ ދަށުގައި އަބަދު އެމީހުންގެ ލޯމަތީގައި އުޅުމަކީ ލޮލާއި ހިތުގެ ފިނިކަން ކަމުގައި ދެކެންވާނެއެވެ. ޒަމާން ކޮންމެ ކުލައެއް ދެއްކިޔަސް، ކިތަންމެ އުފަލެއް ތަސްވީރު ކުރުވިޔަސް، ހަގީގީ އުފަލާއި ހިތްހަމަ ޖެހުމަކީ މައިންބަފައިންނާއި އެކުގައިވެ އެމީހުންގެ ފައިތިލަ ދަށުން ނޫނީ ނުލިބޭނޭ އެއްޗެއްކަން ގަބޫލުކުރަން ވާނެއެވެ.