ސާފުތާހިރުވުމާއި އެކަމުގެ މުހިންމު ކަމަކީ ކުއްޖާ އެންމެ ތުއްތު އިރުއްސުރެ ދަސްކޮށްދޭ ކަންކަމެވެ. އެއާއި އެކު އެކުދިންނަކީ ބޮޑުވަމުން އަންނަ އިރު ސާފުތާހިރުކަމަށް އިންތިހާއަށް ލޯބިކުރާ ކުދިންތަކެކެވެ. މިއަދުގެ ޒުވާނުންގެ ކިބައިން ސާފުތާހިރުކަމަކީ ވަރަށްވެސް ރަނގަޅަށް ފެންނަމުންދާ ސިފައެކެވެ. ނަމަވެސް ހިތާމައަކީ އެ ޒުވާނުން ސާފުކުރަނީ އެޒުވާނުންގެ ހަށިގަނޑު އެކަންޏެވެ. ފެންވަރާ ނަލަ ހެދި، މީރުވަސްދުވާ ސެންޓުތައް މުޅި ގަޔަށް ޖަހާ، ރީތިވެގެން މަގުތަކަށް ނުކުންނަ އިރު، މަގުތަކުގެ ސާފުތާހިރުކަމަށް ސަމާލުކަން ދެވޭ ޒުވާނުން މަދެވެ.

އިންސާނާގެ ހަށިގަނޑުގެ ސާފުތާހިރުކަން އިސްކުރާ ފަދައިން މަގުތަކުގެ ސާފުތާހިރުކަމަށްވެސް ސަމާލުކަން ދޭންވާނެއެވެ. މަގަކީ އޭގެ ބޭނުން އެންމެންވެސް ކުރާ އެންމެންގެ ތަނެކެވެ. ރަށެއްގެ މަގުތައް ރީތިވުމަކީ އެރަަށެއްގައި ދިރިއުޅޭ ކޮންމެ ރައްޔިތަކަށްވެސް ލިބޭ ވަރަށްބޮޑު ހިތްހަމަޖެހުމަކާއި އުފަލެކެވެ. 

މާތްވެގެންވާ އިސްލާމްދީނުގައިވެސް މަގުތަކުގެ ހައްގު އެ މަގުތަކަށް ދިނުމަށް ވަރަށްބޮޑަށް ވަނީ ބާރުއަޅުއްވާފައެވެ. މަގުތައް ސާފުކޮށް ބެހެއްޓުމަށްޓަކައި ދިވެހިންގެ އާދަކާދައިގެ ތެރެއިން، ދިރިއުޅުމުގެ ވައްޓަފާޅިއެއްގެ ގޮތުން، މަގުތައް ކަހާ ސާފުކޮށް ހެދުމަކީ ވަރަށްވެސް ރީތި އެހާމެ ރަނގަޅު އާދައެކެވެ. ފަތިހު ފަތިހާ ތެދުވެ، ދުވާލުގެ އަލިކަން ފާޅުވުމުގެ ކުރިން އެ މަގުތައް ކުނި ކަހާ ސާފުކޮށް ހަދަނީ އެއީ ދީނީ، ގައުމީ އަދި ރަށްވެހި ވާޖިބެއް ކަމުގައި ދެކިގެންނެވެ.

މަގުތަކުގައި ހިނގާބިނގާވެ އުޅޭ މީހުންގެ ފަރާތުން މަގުތަކަށް ކުނިއެޅުމަކީ ބައެއްފަހަރަށް ދިމައިވާ ކަމެކެވެ. ފަހަރުގައި ކުޑަކުޑަ ކަރުދާސްކޮޅެއް އެއީ މާ ބޮޑު އެއްޗެއް ކަމަށް ބައެއް މީހުނަށް ހީނުވެދާނެއެވެ. ނަމަވެސް އޭގެ ސަބަބުންވެސް އެ ގެއްލެނީ މަގުގެ ހައްގެކެވެ. އެހެނީ މަގަކީ ކުނި އެޅުން އެއްގޮތަކަށްވެސް ހުއްދަ ތަނެއް ނޫނެވެ. އެހެންކަމުން ހުއްދަ ނޫން ކަމެއް، ހުއްދަނޫން ތަނެއްގައި ކުރުމަކީ އެތަނުގެ ހައްގަކަށް އަރައިގަތުން ކަމުގައި ބުނެވިދާނެއެވެ. އެހެންކަމުން މިއީ ވަރަށްބޮޑަށް ވިސްނަން ޖެހޭނޭ ކަމެކެވެ.

މަގުމަގުގައި ޑަސްބިން ބެހެއްޓުމަކީ މަގަށް ކުނިއެޅޭ މިންވަރު މަދުކުރެވޭނޭ ނިޒާމެކެވެ. މި ނިޒާމު ގާއިމުކުރުމުގައި ދިވެހި ރާއްޖޭގެ ގިނަ ރަށްތައް ދަނީ ކުރިއަށެވެ. އެހެންކަމުން ކޮންމެ ރައްޔިތަކުވެސް، ފަރުދީ ޒިންމާ ނަގައިގެން މަގުތަކުގެ ހައްގު މަގުތަކަށްދީ، މަގުތަކުގެ ސާފުތާހިރުކަމަށް ސަމާލުކަން ދިނުމަކީ މުހިންމު ކަމެކެވެ.