އިންސާނުންނަށް ތަފާތު އެކި ހުނަރުތައް ވަނީ ދެއްވާފައެވެ. އަދި ބައެއް ކަހަލަ ހުނަރުތަކާއި އިލްމުތަކަކީ ބުރަ މަސައްކަތުން އިންސާނާ ހޯދާ އިލްމުތަކާއި ހުނަރުތަކެވެ. މި އިލްމުތަކާއި ހުނަރުތަކުގައި ބައެއް އިންސާނުންނަކީ ވަރަށްވެސް މޮޅު ބައެއްކަމަށް ދައުވާ ކުރާ ބައެކެވެ. ނަމަވެސް ހަގީގަތުގައި މޮޅު އިލްމުވެރިއަކީ ނުވަތަ ހުނަރުވެރިއަކީ ކާކު ހެއްޔެވެ؟

އެއްވެސް ކަމެއްގައި މޮޅު ނުވަތަ އެންމެ މޮޅުވާނަމަ އެންމެ ފުރަތަމަ އެމީހަކު ދަސްކުރާނެ ކަމަކީ އެ އިލްމެއް ނުވަތަ ހުނަރެއް އެހެން މީހަކަށް ހިއްސާކުރާނޭ މަގެއް ހޯދުމެވެ. އެ އިލްމެއް ނުވަތަ ހުނަރެއްގެ މައްޗަށް ބޮޑާވުމަކީ އެންމެ ނުބައި ކަން ކަމުގައި ގަބޫލު ކުރުމެވެ. އެ ލިބޭ މޮޅު ކަމުގެ ކާމިޔާބީގައި ހިތްތިރިކުރަން ދަސްކޮށްގެންނެވެ. މިއީ ހަގީގީ މޮޅެތި މީހުންގެ ސިފަތަކެވެ.

ތިމާއަށް ލިބިފައި ހުންނަ އިލްމަކާއި ނުވަތަ ހުނަރަކާއި ގުޅޭގޮތުން، އެ އިލްމެއް ނުވަތަ ހުނަރެއް ލިބިފައިނުވާ މީހަކާއި ދިމާލަށް ހަޅޭލަވާ އެއްޗެހި ގޮވާ އަދި ޝަކުވާ ކުރުމަކީ "ދެރަ" މީހުންގެ ސިފައެކެވެ. އެހެނީ ތިމާއަށް ނޭނގުނު އެންމެ އަސާސީ އެއް ކަމަކީ އަނެކާއަކީ ތިމާއަށް ލިބިފައި އެ ހުރި އިލްމެއް ނުވަތަ ހުނަރެެއް ލިބިފައިނުވާ މީހެއްކަމެވެ. އެކަން ނޭނގި ޝަކުވާކުރެވޭނަމަ ތިމާ ތިބުނާ "މޮޅު" މީހަކަށް ތިމާ ވީ ކީއްވެ ހެއްޔެވެ؟ އެވަރު ނުދަންނަ މީހަކަށް "މޮޅު" މީހެކޭ ބުނެވޭނޭ ހަމަ އެއްވެސް ހަމައެއް ނޯންނާނެއެވެ.

އާދޭހެވެ! އެންމެ މޮޅު މީހަކީ އަބަދުވެސް އެހެންމީހުންނަށް ކިޔައިދީ ބުނެދޭ މީހާއެވެ. އަދި ކިއެއްތަ ކިޔައިދިނުމާއި ބުނެދިނުމުގައި ނަފްރަތާއި ރުޅިވެރިކަން އެއްކިބާކޮށް އޯގާތެރިކަމާއި ހިތްވަރުދިނުމުގެ ރާގުން ބުނެދޭ މީހާއެވެ. އެހެނީ އޭނަައަަށް އެންމެ އަސާސީ ކަންތައް ރަނގަޅަށް ފަހުމްވެފައި ހުރުމެވެ. އެއީ އަނެކާ އަކީ އެ އިލްމެއް ނުވަތަ ހުނަރެއް ލިބިފައި ނުވާ، ނުވަތަ އެކަމެއް ދަސްކުރުމުގެ ޝައުގުގައި ހުރި މީހެއްކަން އެނގުނީތީއެވެ. މިއީ ކަންކަމުގައި އެންމެ މޮޅެތި މީހުންގެ ސިފަތަކެވެ.

ހަގީގަތުގައި މޮޅު މީހާއަކީ ހިތްތިރި މީހެކެވެ. އަދި ހިތްވަރު ދޭން އެނގޭ، ބުނެދޭން ކެރޭ، ކެތްތެރިކަން ދަންނަ، އޯގާތެރި މީހެކެވެ. އިލްމަކަށް ނުވަތަ ހުނަރަކަށް އެކަންކަމުގެ ދެލިގަނޑާއި ހެވިކަމަށް ކިތަންމެ މޮޅު ވިޔަސް، ހަގީގަތުގައި މޮޅު މީހަކަށް ވެވޭނީ ތިމާގެ ގައިގައި އަހުލާގީ ރީތި ސިފަތަކެއް ހުރެގެންނެވެ.