ކޮންމެ މީހަކީވެސް ދުނިޔޭގައި ތަފާތު މީހެކެވެ. އެކި އިންސާނުން އެކި ކަންކަމަށް ތަފާތުވާއިރު، އެއިން ކޮންމެ މީހެއްގެވެސް ހާއްސަ ސިފަތަކެއް ވާނެއެވެ. އެއީ އެމީހަކު އެ ސިފަތަކަކަށް ނުވަތަ އެކަން ކަމަކަށް ގާބިލު ނުވަތަ ނާގާބިލު ސިފަތަކާއި ކަންތައްތަކެވެ. އެމީހެއްގެ ގާބިލުކަމާއި ނާގާބިލުކަން މިނެކިރުމުގައި އެހެންމީހުން އުޅުމަކީ އަމުދަކުން ރަނގަޅުކަމެއް ނޫނެވެ.

އާދޭހެވެ! ކޮންމެ މީހަކީ ކިޔަވައިގެން ހުރި ތަޢުލީމީ ގޮތުން މޮޅު މީހަކަށް ވާކަށް ނުޖެހޭނެއެވެ. އަދި ކޮންމެ މީހަކީ ގިނަ މަސައްކަތް ދަންނަ ކެރޭ ހިތްވަރުގަދަ މީހަކަށް ވާކަށްވެސް ނުޖެހޭނެއެވެ. ކޮންމެ މީހެއްވެސް އެމީހަކަށް ހާއްސަ ރޮނގަކުން ހިނގަމުން ކުރިއަށް ދާނެއެވެ. އެކަމާ އެހެން މީހުން "ހިތްޕުޅާނުވެ" ނުވަތަ ގޮތް ފާޑުކިޔާ ހެދުމަކީ ދިރިއުޅުމުގެ ތާހިރު އާދަތަކާއި ފުށުއަރާ ކަމެކެވެ.

ބައެއްމީހުންނަކީ ދިރިއުޅުމުގައި ކިޔެވުމަށް ޝައުގުވެރިކަން ހުންނަ މީހުންނެވެ. އެމީހުންގެ ޅަދުވަހުން ފެށިގެން އެއީ ކިޔެވުމާއި ޢިލްމު އުގެނުމަށް ލޯބި ކުރާ ބައެކެވެ. މަދަރުސީ ދައުރުގައި ފާހަގަ ކޮށްލެވޭ ވަނަތައް އެކުދިން ހޯދާނެއެވެ. އޭގެފަހުގައި މަތީތައުލީމުގެ އެކި ހަތުފަތްތައް ގިރާކުރާނެއެވެ. އެކި އެކި މަރުހަލާތައް ކަޑައްތު ކުރާނެއެވެ. ކިޔެވުމުގައި އޭނާގެ ގާބިލުކަން ތަންދޭ އެންމެ މައްޗަކަށް އޭނާ ކިޔަވާނެއެވެ. ނުވަތަ ކިޔަވަން މަސައްކަތް ކޮށްފާނެއެވެ. ދުނިޔޭގެ ނިޒާމު ތަރުތީބުވެފައި ހުންނަ ގޮތުން މިފަދައިން ދިރިއުޅުން ބައްޓަން ކުރާން ގަސްތުކުޅަ މީހަކަށް އަމިއްލަ ފައިމައްޗަށް ތެދުވަން ދުވަސްކޮޅެއް ނަގާނެއެވެ. ކިޔަވާ ނިންމާލަން އަދި މާ ގިނަ ދުވަސް ނަގާނެއެވެ. ބައެއް މީހުންނަކީ ދުވަހަކުވެސް ކިޔަވާ ނިންމާލާހިތްވާ ބައެއް ނޫނެވެ. އެހެންކަމުން އެމީހެއްގެ ދިރިއުޅުމުގެ ކޮންމެ ވަގުތެއްގައިވެސް ކޮންމެވެސް އެއްޗެއް ކިޔެވުމަށް ވަގުތު ހޭދަކުރާނެއެވެ. އެފަދަ މީހުން، އެހެންމީހުންގެ ނަޒަރުގައި އެއީ ކިޔެވުމަށް "ހޭބަލިވެފައި" ތިބި ބަޔަކު ކަމުގައި ދެކިއުޅެއެވެ. ނަމަވެސް އެފަދައިން އަނެކާއާއި މެދު އެއްވެސް ބަހެއް ކިޔުމުގެ ހައްގެއް އެހެން އެއްވެސް މީހަކަށް ނޯންނާނެއެވެ. ކަން ހިނގަނީ އެހެން ކަމުގައި ވަނީނަމަ، އެހެން ދެކުނު މީހާ އާއި މެދުވެސް އަނެއްބަޔަކު ދެކޭނޭ އެފަދަ "ލަގަބެއް" ވާނޭކަމާއި މެދު އެއްވެސް ޝައްކެތް ނެތެވެ.

ދިރިއުޅުމުގައި އަނެއްބައި މީހުންނީ ތަޢުލީމީ ގޮތުން މާ ގާބިލު މޮޅު ބަޔަކަށް ނުވާނެއެވެ. އެމީހުންގެ މަދަރުސީ ދައުރުގައިވެސް މާ މުހިންމު ކަމެއް ދީގެން، ތަޢުލީމު ހާސިލުކުރަން މަސައްކަތެއް ނުކުރާނެއެވެ. އެއީ އެފަދަ މީހުންގެ ދިރިއުޅުމުގައި އެމީހުން ހިނގާ މަގެވެ. އެފަދަ މީހުން އެމީހުންގެ އަމިއްލަ ފައިމައްޗަށް ތެދުވާލެއް އަވަސްވެދާނެއެވެ. ލިބިހުރި މަދު ޢިލްމުކޮޅާއި އެކު ގަބޫލުކުރާ ފެންވަރުގެ ވަޒީފާއަކަށް އޭނާއަށް އަވަހަށް ދެވޭނެއެވެ. އެ ވަޒީފާގައި އޭނާ އޭނާގެ ހަމަ ފައިމައްޗަށް ތެދުވާނެއެވެ. ނަމަވެސް މިފަދަ މީހުންނަކީ ދުނިޔޭގެ އެކި އެކި ޢިލްމުތަކުން މަހުރޫމުވެފައިވާ ބަޔަކަށް ވެދާނެއެވެ. އާންމު އިޖްތިމާއީ ބަހުސްތަކުގައި "ހިފާލަން" ނުކެރޭ މައުލޫމާތު މަދު، ދޫ ނުހެލޭ ބަޔަކަށް ވެދާނެއެވެ. އެކަމުގައި ޢިލްމީ ގާބިލު ފަރާތްތަކުން އަނެކުންނާއި ދިމާލަށް ކުޑައިމީސްކޮށް ބަސްބުނެ ހެދުމަކީ އެމީހުންނަށް އެ ލިބިފައި ހުރި ޢިލްމެއް އެމީހުންނަށް ރޯނުފިލާ ކަމުގެ ހެއްކެކެވެ. 

ދުނިޔޭގެ ކަންކަން އެކި މީހުންނަށް އެކި ގޮތަށް ތަރުތީބުވެފައި ހުރުމަކީ ހައިރާން ވާން ޖެހޭނޭ ކަމެއް ނޫނެވެ. ކޮންމެ މީހަކުވެސް އެމީހަކަށް ދިރިއުޅުމުގައި ކުރެހިފައި އޮންނަ ހާއްސަ ރޮނގަކުން އެމީހަކު ހިނގާނެއެވެ. އެ ރޮނގު އެހެން މީހުންނާއި ކިތަންމެ ތަފާތަސް، އެ ރޮނގުގައި ކިތަންމެ "ބަޅެއް" ހުއްޓަސް، އެއީ އެމީހަކަށް އެންމެ ރަގަޅު އުޅުމެވެ. އާދޭހެވެ! މިހެން ދެންނެވި ނަމަވެސް ވިޔާނުދާ ގޯސް އުޅުންތައް އުޅޭ މީހުން މިދަންނަވާ "ރޮނގުގެ" ހާއްސަކަމުން ބަރީއަވާނެއެވެ.

ކަން އޮތީ މިހެން ކަމުން ކޮންމެ މީހެއްވެސް އެމީހެއްގެ ދިރިއުޅުގައި އެޅިފައިވާ ރޮނގުގެ މަތީގައި ސާބިތުވެ ހުންނާށެވެ. އަދި އެހެން މީހުންހެ ރޮނގަށް ފާޑުކިޔާ ނުހަދާށެވެ.