ތަނބަކާއި ނުލާ އުޑާއި ވިލާތައް އުފުލިފައިވާކަން އަހަރެމެން އެންމެން ދަންނަން. ކުޑައިރުއްސުރެ މާތް ﷲ ގެ ކުޅަދުންވަންތަކަށް ކިޔާ ދަސްކުރާއިރު މިކަން މިސާލެއްގެ ގޮތުގައި ކިޔާ އުޅޭ. އާދޭހޭ! އުޑުގައި ވިލާތައް އެ ހުންނަނީ އުފުލިފަ. ކޮންމެ ވިލާގަނޑަކީ އެތަށް ޓަނެއްގެ ފެން. އެއިން ކޮންމެ ވިލާގަނޑެއްގައި އެތައް ބަރުދަނެއް އެކުލެވިފައިވާ އިރުވެސް އެ ވިލާގަނޑު އުޑުގައު ހިފެހެއްޓިފައި އެހުންނަނީ ހަމަ ގައިމުވެސް ﷲ ގެ ކުޅަދުންވަތަވެރިކަމުންކަން ޔަގީން. ސައިންސުވެރިން ބުނާގޮތުގައި ކޮންމެ ވިލާގަނޑަކީ ބޮޑު ފެންގަނޑެއް. ނަމަވެސް އެ ވިލާތަކުގައި ފެންހުންނަ ގޮތަކީ އަޖައިބެއްކަހަލަ ގޮތެއް. އެ ވިލާތަކުގައި ހުންނަ ފެން ހުންނަނީ ވަރަށް ކުދި ކުދި ތިކިތަކެއްގެ ސިފައިގަ. އެ ތިކިތައް އިންސާނާގެ ހަމަ ލޮލަށްވެސް ފެންނަން އުނދަގޫވާހާވެސް ކުދި ފެންތިކިތަކެއްގެ ގޮތުގައި. އެހެން އިބާރާތަކުން ދަންނަވާނަމަ ޖައްވުކުނޑީގެ މިންވަރަށް. ބައެއް ފަހަރަށް މިޔަށް "ދުން" ނުވަތަ "އާވި" އޭ ކީވެސް ދާނެ. މިފަދަ ކުދި ތިކިތަކެއްގެ ސިފައިގައި މި ފެންތައް ހުރުމުގެ ނަތީޖާއަކީ ބިމަށްދަމާބާރުގެ އަސަރެއް މި ފެންތިކިތަކަށް ނުފޯރުން. އެއާއި އެކު އުޑުގައި ދައުރުވާ ވަޔާއި، ވިލާގަނޑުގައި ހުންނަ ފިނިހޫނުމިނާއި، ޖައްވުގެ ފިނިހޫނުމިނާއި އަދި ވިލާގަނޑުގައި ހުންނަ ޕުރެސަރާއި ޖައްވުގައި ހުންނަ ޕުރެސަރުގެ ސަބަބުން މި ފެންތިކިތަށް ވިލާގަނޑެއްގެ ގޮތުގައި ޖަމާވެ ސިފަވޭ. ކޮންމެ ވިލާގަނޑެއް ވަކިން ސިފަވަނީ މި ސަބަބަށްޓަކައި. ކަންމިހެން ހުރުމާއި އެކު ވިލާގަނޑު އެއްވެސް ތަނބަކާއި ނުލާ އުފުލިފައިވާ ސައިންޓިފިކް ސަބަބު ހާމަވެގެންދޭ. ކުރުގޮތަކަށް ދަންނަވާނަމަ ވިލާގަނޑު އުފުލިފައި ވަނީ މައިގަނޑު ދެސަބަބަކާއި ހުރެ. އެއީ ވިލާގަނޑުގައި ހުންނަ ފެން، ކުދި ކުދި ތިކިތަކެއްގެ ސިފައިގައި ވުން. ދެވަނައީ ޖައްވުގައި ދައުރުވާ ވައި އަދި ވިލާގަނޑާއި ޖައްވުގެ ޕުރެސަރު.