ކޮންމެ މީހަކީވެސް އޭނާގެ ދިރިއުޅުމުގައި ކޮންމެވެސް ޒިންމާއެއް އަދާކުރާ ނުވަތަ އުފުލާނޭ މީހެކެވެ. މިއިން ކޮންމެ ޒިންމާއަކީވެސް އެޒިންމާތަކެއް އަދާކުރަންޖެހޭނޭ ވަކި ހާލަތްތަކަކާއި ވަގުތުތަކެއް ވާނޭ ޒިންމާތަކެކެވެ. އެހެންކަމުން އެ ޒިންމާތަަކުގެ ވަގުތަކީ އެ ޒިންމާއެއް އަދާކުރާ މީހާގެ ބޮލުގައި އެޅިފައިވާ ވަކިން ބޮޑު، އަދި އެހާމެ އަގުހުރި، މުހިންމު އަނެއް ޒިންމާއެވެ. އެހެންކަމުން ކޮންމެ މީހަކީވެސް އޭނާގެ ޒިންމާ އޭގެ ވަގުތުގައި އަދާކުރާ މީހަކަށްވުން ވަރަށްވެސް މުހިންމެވެ.

ދުނިޔޭގައި އިންސާނުން އުޅެނީ އެކެއް އަނެކެއްގެ ކިބައިން ހިތްވަރާއި އެހީތެރިކަމާއި މަދަދު އިންތިހާއަށް ލިބިގެންނެވެ. އަދި ހަމަ އެއާއި އެކު ތިމާގެ ވަށައިގެން ތިބޭ "އަވައްޓެެރިންގެ" ފަރާތުން އުނދަގުލާއި ތުރާވެސް ލިބިގެންނެވެ. އެހެންކަމުން ކޮންމެ މީހަކުވެސް ވިސްނާން ޖެހޭނޭ މުހިންމު އެއްކަމަކީ އެމީހެެއްގެ ވާޖިބު ނުވަތަ ޒިންމާ އެކަމެއްގެ ވަގުތުގައި އަދާކުރުމެވެ. ތިމާގެ ސަބަބުން އެހެން މީހެއްގެ ޒިންމާ އަދާކުރުމުގައި އޭނާގެ ވަގުތު ބޭކާރުވާން ޖެހިއްޖެ ނަމަ، ހަގީގަތުގައި އެ އަރައިގަނެވެނީ އަނެކާގެ ހައްގަކަށެވެ.

އާދޭހެވެ! މީހެެއްގެ ހައްގަކަށް އަރައިގަތުމަކީ ކޮންމެހެން އޭނާގެ މުދަލަކަށް ނުވަތަ ނަފްސަކަށް އަދި ކިއެއްތަ އަބުރަކަށް އަރައިގަތުމެއްވެސް ނޫނެވެ. އަނެކުންގެ ވަގުތު ތިމާ އިސްރާފުކުރުމަކީވެސް އަނެކާގެ ހައްގަކަށް އަރައިގަތުންކަން ހަމަ ޔަގީނެވެ. ވަކި ވަގުތަކަށް ވަކިކަމެއް ކުރުމަށް ނިންމާ އެ ވަގުތެއް އިއުލާނު ކުރުމަށްފަހު އެ ކަމެއްގައި ޝާމިލްވާ ދެފަރާތުން ކުރެ ކޮންމެވެސް އެއްފަރާތެއް އެވަގުތަށް ކަމޭ ނުހިތާ ނުވަތަ އެވަގުތު ފަސްދީ ދާއިރުވެސް އެކަމެއް ކުރަން ނުވަތަ އެތަނަކަށް ހާޒިރުނުމަކީ ވަރަށް އާންމުކޮށް މިމުޖުތަމައުގައި ދިމާވާ ކަމެކެވެ. ވެރިން މުވައްޒަފުންނަށް، އަދި މުވައްޒަފުން ވެރީންނަށް، އެދުރުން ދަރިވަރުންނަށް އަދި ދަރިވަރުން އެދުރުންނަށް، ޑަކްޓަރުން ބަލިމީހުންނަށް އަދި ބަލިމީހުން ޑަކްޓަރުންނަށެވެ. މިހެންގޮސް މިފަދަ ކިތަންމެ މިސާލެއް ދެއްކިދާނެއެވެ.

ކޮންމެ މީހެއްގެ ހަޔާތުގައި ހޭދަވާ ކޮންމެ ސިކުންތަކީވެސް ވަރަށް އަގުހުރި އެއްޗެކެވެ. އާދޭހެވެ! މި ދަންނަވަނީ ކެތްތެރިވުމަކީ ނެތް ކަމެއްކަމުގެ ވާހަކައެއް ނޫނެވެ. ކެތްތެރި ވުމަކީ އޮތްކަމެކެވެ. އަދި އެއީ އެކަމުގައި ކެތްތެރިވާމީހާއަށް އިންތިހާއަށް ޘަވާބާއި ދަރުމަ ހުރިކަމެއްވެސް މެއެވެ. ނަމަވެސް މިދަންނަވާ ވާހަކައީ ކަމެއްގައި ވަގުތެއް ކިޔައިފިނަމަ އެވަގުތަކަށް ފަރުވާކުޑަކުރަކުރާމީހާ އަކީ "އަނިޔާވެރި" އެއްކަމެވެ. އެހެނީ އިސްވެ ދެންނެވުނު ފަދައިން އެއަރައިގަނެވެނީ އަނެކާގެ ހައްކަށެވެ.

ކަންއޮތީ މިހެން ކަމުގައި ވުމުން، ކަންކަމަށާއި ތަންތަނަށް ދައުވަތުވީ ނުވަތަ ވަގުތެއް ކިޔާ ކަމެއް ކުރުމަށް ގަސްތުކުރާނަމަ ވިސްނަންވީ މުހިންމު އެއްކަމަކީ އެ ކަމެެއްގެ ވަގުތުގައި އެތަނަކަށް ނުވަތަ އެކަމަކަށް ހާޒިރުވެވޭތޯއެވެ. ފަހަރުގައި އެފަދަ ވަގުތަކަށް ފަރުވާކުޑަކުރެވިއްޖެ ނަމަ އޭގެ ސަބަބުން އެތައްބައެއްގެ ހައްގަކަށް އަރައިގަނެވިދާނެއެވެ. މިއީ މިސާލެެއްގެ ގޮތުގައި ބުނެލާ ވާހަކައެކެވެ. އަދި މިއީ މުޖުތަމައުގައި ވަރަށް ގިނައިން އިވޭ ޝަކުވާއެކެވެ. ބަލިމީހުން ޑަކްޓަރަކަށް ދައްކަންގޮސް ގަޑި ދެގަޑިއިރުވާއިރުވެސް ޑަކްޓަރުން ހާޒިރުނުވާކަމުގެ ޝަކުވާއެވެ. އާދޭހެވެ! ޑަކްޓަރުންގެ ހަޔާތަކީ ބުރަ އަދި ޒިންމާ ބޮޑު ހަޔާތެއްކަން ގަބޫލުކުރަމެވެ. ނަމަވެސް މިފަދަ ކަންކަމުގައި ވަގުތު ކިޔާއިރު ނުވަތަ ގަޑިއެއް ދޭއިރު، ހާޒިރުވެވޭނޭ ގަޑިއެއް ކިޔުމަކީ މުހިންމު ކަމެކެވެ.

ވަގުތުގެ ވާހަކަ ދެކެވޭއިރު ވިސްނާންޖެހޭނޭ ކަމަކީ އޭނާގެ ވަގުތާއި ތިމާގެ ވަގުތަކީ ހަމަ އެއް އަގެއްގެ އެއްޗެއްކަމެވެ. އެއީ މުސާރައާއި ތައުލީމާއި އަދި ވަޒީފާގެގޮތުން ކިތަންމެ ތަފާތު މީހެއްކަމުގައި ވިޔަސްމެއެވެ. އަދި ތިމާގެ ސަބަބުން އެހެންމީހެއްގެ ވަގުތު ބޭކާރުވިޔަ ނުދީވޭތޯބެލުންވެސް ވަރަށް މުހިންމެވެ.