އިންސާނާ ކިތަންމެ ރީތި ސިފައެއްގައި ހުރި ނަމަވެސް އަދި ކިތަންމެ ރީތި މޭކަޕެއް ކުރި ކަމުގައި ވީނަމަވެސް، އިންސާނާގެ ހަގީގީ ރީތި ކަމަކީ ފޮރުވިފައިވާ އޭނާގެ ސިފަތަކެވެ. އާދެ! އޭނާގެ އަހުލާގެވެ. އޭނާ އުޅޭ އުޅުމެވެ. ކުރާ ކަންކަމެވެ. ބުނާ ބަސްތަކެވެ. އެހެންކަމުން މީހެއްގެ ސިފައަކަށް ބަލާ އޭނާގެ ރަނގަޅުކަން މިނެކިރުމަކީ ވަރަށްވެސް ގޯސް ކަމެކެވެ.

އަދުގެ މި ޒަމާނުގައި ދިވެހި ރާއްޖޭގައިވެސް ޒުވާނުންގެ ނިސްބަތަކީ ބޮޑު ނިސްބަތެކެވެ. އެޒުވާނުންގެ ތެރެއިންވެސް އެއްބަޔަކީ ކޮންމެވެސް މައުސޫމު ތުއްތު ކުއްޖެއްގެ މަންމަ އެއް ނުވަތަ ބައްޕައެކެވެ. ނަމަވެސް ހިތާމަ އަކީ އެ މައުސޫމު އެތައް ކުދިންނެއްގެ ބެލެނިވެރީންގެ ކިބައިގައި ދުރޫސުލް އަހުލާގުގެ އެއްވެސް މިންވަރެއް ލިބިފައި ނުވުމެވެ. އެފަދަ ބައެއް މައިންބަފައިންނަކީ އެމީހުންގެ ދަރީންނަށް ނަމާދަށް ދިޔުމަށް ދުވަހަކުވެސް ނަސޭހަތެއް ދޭ ބައެއް ނޫނެވެ. އެހެނީ އެ މީހުންނަކީ ނަމާދުކޮށް އުޅޭ ބައެއް ނޫނެވެ. ޤުރުއާން ކިޔެވުންވެސް ހަމަ އެފަދައެވެ. މަންމަ ގިނަ ވަގުތު ފޯނުގައި ވަގުތު ހޭދަކުރާކަމާއި، ޓީވީ އިން އަބަދުވެސް ކޮންމެވެސް ފިލްމެއް ނުވަތަ ޑްރާމާއެއް ބަލާކަން އެކުދީންނަށް އެނގެއެވެ. އެކުދީންގެ މަންމަ އާއިއެކު އެކުދީން ކުރާކަމަކީވެސް އެއީއެވެ. ތުއްތު ކުއްޖާ އަށް އަހަރެއް ވާއިރަށް ޓެބްލެޓެއް ޒާތު އެއްޗެއް އެކުއްޖާއަށް ހޯދައިދެވޭނެއެވެ. އާދޭހެވެ! އެކަމުގައި ގޯހެއް ނެެތެވެ. ނަމަވެސް ގޯހީ އެކުދީން ލައްވާ އޭގެ ބޭނުން ކުރުވާ ގޮތެވެ.

މަންމަ އަކީ ބުރުގާ އަޅައިގެން ހުރި މަންމަ އަކަށް ނުވެއެވެ. ގަޔަށް ބާރު ކުރު ހެދުންލާ މަންމައެކެވެ. ދަރިފުޅަށް މި ފެންނަނީ އެ މަންޒަރެވެ. އެ ދަރިފުޅު ދަސްކުރަނީ އެ ގޮތްތަކެވެ. ވިސްނާލާށެވެ! އެފަދަ މަންމައަކު ބޮޑު ކުރާ ދަރިއަކު، އައުރަ ނިވާކުރުމުގެ މާ ބޮޑު ޝައުގުވެރިކަނެއް ނުހުންނާނޭކަން ހަމަ ޔަގީނެވެ.

ކުއްޖާގެ ބައްޕަ އަބަދުމެ އުޅެނީ ކުރު ސޯޓުބުރީގައެވެ. ހުކުރަށް ނޫނީ ނަމާދަކަށް ދާތީ ނުފެނެއެވެ. އަތުގައި ފާޑު ފާޑުގެ ރަބަރު އަޅާ ކަރުގައި ޗޭނު އެލުވާ ކަންފަތުގައި ދަގަނޑު ބޮޅު އެލުވާފައި ހުރެއެވެ. މިއާއިއެކު އެ ބައްޕަގެ ތަރުބިއްޔަތު ލިބި ބޮޑުވާ ދަރިފުޅަށް އެއީ ގޯސް އާދަތަކެއްކަން ދަސްވާނީ ކިހިނަކުން ހެއްޔެވެ. ބައެއް ބައްޕައިންނަކީ އެމީހުންގެ ދަރިން އުރުގައި ބައިތިއްބައިގެން ނުވަތަ އެދަރީންގެ އަތުގައި ހިފައިގެން ތިބެ، ބޭއަދަބީ ހަޑި މުޑުދާރު ބަސްތަކުން އެހެންމީހުންނާ ވާހަކަ ދައްކާ އުޅޭ ބައްޕައިންނެވެ. ވިސްނާލާށެވެ! މިފަދަ ބައްޕައެއްގެ އަތުގައި ހިފައިގެން ބޮޑުވާ ކުއްޖަކު، އެފަދަ ހަޑި ހުތުރުބަސްތައް ބޭނުން ކުރުމަކީ ވިޔާނުދާ އާދައެއްކަން ވިސްނޭނީ ފަހެ ކޮން ހަމައަކުން ހެއްޔެވެ.

މިފަދަ ކޮންމެވެސް ހާލަތެއްގައި ހަޔާތުގެ ޅަދުވަސްތައް ހޭދަކުރާ ކުޑަކުދިންގެ އަދަދު އިންތިހާއަށް ގިނައެވެ. މިއީ މާދަމާގެ ޖީލު ހަލާކުކޮށްލާ އެމީހުންގެ އަދަބު އިހުތިރާމު ކަނޑުވާލާ، ލަދުވެތިކަން އެއީ ނުވެސް ދަންނަ ސިފައަކަށް ވެގެންދާނޭ ކަމެކެވެ. މިކަމުގައި ކޮންމެ އަންހެނަކާއި ފިރިހެނަކުވެސް ވިސްނުން މުހިންމެވެ. ތިމާގެ ދަރިފުޅުގެ މަންމަ އަކަށް ވާން، ހެޔޮ އަންހެނަކު އެދޭށެވެ. ތިމާގެ ދަރިފުޅުގެ ބައްޕައަކަށް ވާން އުޅުން ރަނގަޅު ދީނީ ފިރިއަކު އެދޭށެވެ. މުޖުތަމައު އިސްލާހުވުމާއި ސުލްހަ މަސަލަސްކަން ގާއިމުވާނީ ހަމަ ގައިމުވެސް މިފަދައިން އަމަލުކޮށްގެންކަން ޔަގީނެވެ. ނޫންނަމަ ޖީލެއްގެ ބޮޑުބައި ހަލާކާއި ފަސާދާއިގެ ތެރެއަށް ގެނބިދާނޭކަން ޔަގީނެވެ.